Pasalao

*(ຂປລ): ພາຍຫລັງກົມມໍລະດົກ ກະຊວງຖະແຫລ່ງຂ່າວ ແລະ ວັດທະນະທຳ ຄົ້ນພົບເສົາ ຫີນຫລັກ ເມືອງບູຮານຈຳນວນ 97 ໜ່ວຍ ໃນວັນທີ 29 ທັນວາ ຜ່ານ ມາ, ຈາກນັ້ນ ໃນວັນທີ 30 ທັນ ວາ 2009 ທ່ານ ນາຍົກລັດຖະມົນຕີ ບົວສອນ ບຸບຜາວັນ, ພ້ອມດ້ວຍຄະນະລັດຖະບານ ໄດ້ລົງ ກວດກາວັດຖຸບູຮານດັ່ງກ່າວ ຢູ່ບໍ ລິເວນກະກຽມການປຸກ ສ້າງຫໍຫລັກເມືອງ ບ້ານເພຍວັດ, ເມືອງສີສັດຕະນາກ, ນະຄອນຫລວງວຽງຈັນ.

ຕາມການໃຫ້ຂໍ້ມູນ ຂອງ ທ່ານ ທອງສາ ໄຊຍະວົງຄຳດີ ຫົວໜ້າກົມມໍລະດົກ ກະ ຊວງ ຖະແຫລ່ງຂ່າວ ແລະ ວັດທະນະທຳໃຫ້ຮູ້ວ່າ: ເສົາຫີນຈຳນວນ 97 ໜ່ວຍທີ່ ຄົ້ນພົບໃນຄ້ງນີ້ເປັນເທື່ອທີສອງ, ຊຶ່ງການຄົ້ນພົບ ຄັ້ງທຳອິດ ແມ່ນວັນທີ 17 ມັງ ກອນ 2007 ໃນໂອກາດສຳຫລວດບູຮານວິທະຍາ ກ່ອນການກໍ່ສ້າງສ້ອມແປງ ຖະໜົນເສດຖະທິລາດ ໃນໂຄງການກໍ່ສ້າງເສັ້ນທາງນະຄອນຫລວງວຽງຈັນເລກ 1. ເວລານັ້ນນັກບູ ຮານວິ ທະຍາ ຂອງກອງບູຮານ ວິທະຍາກົມມໍລະດົກ ກະຊວງ ຖະ ແຫລ່ງ ຂ່າວ ແລະ ວັດທະນະທຳ ໄດ້ພົບເຫັນ ເສົາຫີນ ລັກສະນະນີ້ ຈຳນວນ 193 ໜ່ວຍ, ໃນນັ້ນໜ່ວຍໜຶ່ງໄດ້ລົງຊາຕາລາສີຈາລຶກ ວັນ ເດືອນ ປີ ຂອງ ການກໍ່ສ້າງ, ຜ່ານການວິໄຈເຫັນວ່າ ວັນ ເດືອນ ປີ ນັ້ນ ກົງກັບ ວັນຈັນ, ວັນທີ 16 ກຸມພາ ຄສ 1540.

ໃນຈຳນວນເສົາຫີນທີ່ຄົ້ນພົບໃໝ່ນີ້ ສ່ວນໃຫຍ່ເປັນຮູບຄ້າຍຄືໃບເສມາ, ພອກຄຳປິວຢ່າງຈົບງາມ, ມີ ໜ່ວຍ ໜຶ່ງຕັ້ງຢູ່ໃຈກາງ ສູງປະມານ 35 ຊັງຕີແມັດ, ມີການ ແກະສະລັກປະດັບຕົກແຕ່ງຢ່າງສວຍງາມ ເປັນຄື ເສົາພະສຸເມນ, ປະກອບດ້ວຍ 8 ຫລ່ຽມ, ມີຍອດສ້ວຍຄືດອກບົວຈູມ ແລະ ອີກໜ່ວຍໜຶ່ງມີຕົວອັກສອນບູຮານ ຈາລຶກໄວ້ເປັນ 3 ແຖວ. ກົມມໍລະດົກສັນນິຖານວ່າ: ເສົາຫີນຈຳນວນ 97 ໜ່ວຍນີ້ ກໍຢູ່ໃນຍຸກສະໄໝດຽວກັບ ກຸ່ມເສົາຫີນທີ່ພົບເມື່ອປີ 2007. ການຝັງເສົາຫີນ ໃນ ສະໄໝບູຮານ ຖ້າອີງຕາມໜ່ວຍທີ່ມີສີລາຈາລຶກ ສາມາດ ຢົ້ງ ຢືນວ່າແມ່ນຝັງໃນ ຄສ 1540 ຫລື 20 ປີກ່ອນວຽງຈັນກາຍເປັນນະຄອນຫລວງ ຂອງອານາຈັກລາວ ລ້ານ ຊ້າງ./.