Pasalao

Anonymous wrote:

---

 ຄຳວ່າ  ເຈົ້າ  ແລະ ຈ້າວ  ໃນພາສາລາວ ໂດຍລວມແມ່ນ ໃຊ້ ຄຳໃດທີ່ຖືກຕ້ອງ ແລະໃຊ້ເປັນທາງການ

ສະນັ້ນ ຂໍຮຽນຖາມມາຍັງ ທ່ານ ສາດສະດາຈານ ຜູ້ ທີ່ມີຄວາມຮູ້ກ່ຽວກັບ ພາສາລາວ ແລະ ໃຫ້ຄຳແນາະນຳທີ່ຖືກຕ້ອງ ແດ່ ຂ້າພະເຈົ້າ

 

ຂໍ ຂອບໃຈນຳທ່ານເປັນຢ່າງສູງ

 

---

 ຄຳວ່າ ເຈົ້າ ກັບ ຈ້າວ ນັ້ນ ເປັນຄົນລະຄຳກັນ ຄວາມໝາຍບໍ່ໄດ້ຄືກັນກັນ

ເຈົ້າ(1) ຄຳແທນນາມບູລຸດທີສອງ

ຕົວຢ່າງ: ເຈົ້າໄປໃສມາ?

ເຈົ້າ(2) ຄຳຄຸນນາມ ແລະ ຄຳນາມເປັນໄດ້ທັງສອງ ມີຄວາມໝາຍວ່າ ທີ່ສຸດ ສູງສຸດ (ຢູ່ໃນຮູບແບບແຍກໃຊ້ໄດ້)

ຕົວຢ່າງ:

-   ປະຊາຊົນເປັນເຈົ້າ  (ຄຳຄຸນນາມ)

-   ເຈົ້າປັນຍາ   (ຄຳຄຸນນາມ)

-   ເຈົ້າຊີວິດ         (ຄຳຄຸນນາມ)

-   ເຈົ້າແຫ່ງຄວາມຮູ້   (ຄຳນາມ)

-   ເຈົ້າແຫ່ງເວຫາ     (ຄຳນາມ)

ເຈົ້າ (3)ເປັນຄຳນາມແປວ່າ ຫົວໜ້າ, ຜູ້ບັນຊາ, ຫົວໜ້າເຂດຂັ້ນປົກຄອງ (ມີສອງພະຍາງແຕ່ເປັນຄຳດຽວ Single Unit ບໍ່ຢູ່ໃນຮູບແບບຂອງການແຍກ ເພາະເປັນຄຳດຽວ)

-   ເຈົ້າແພງນະຄອນ, ເຈົ້າເມືອງ, ເຈົ້າແຂວງ, ເຈົ້ານາຍ

-   ເຈົ້າກຳນາຍເວນ   (ຄຳນາມ)

ຈ້າວ (1)ແມ່ນຄຳກິລິຍາວິເສດ ເປັນຄຳຂານຕອບທີ່ສຸພາບ

ຕົວຢ່າງ:

-   ທ້າວ ກ: ໄປໄວໆເດີ

-   ທ້າວ ຂ: ຈ້າວ

ຈ້າວ (2) ເຂົ້າຈ້າວເປັນຄຳນາມ ເປັນຊື່ເຂົ້າຊະນິດໜຶ່ງທີ່ໃຊ້ຫູງກິນ ອັນທີ່ຈິງ ຂຽນວ່າ ເຂົ້າຈ້າວ ມີສອງພະຍາງແຕ່ເປັນຄຳດຽວ ໜ່ວຍດຽວ (Single Unit) ແຍກອອກຈາກກັນບໍ່ໄດ້ ແຕ່ເມື່ອຜູ້ເວົ້າເວົ້າຫຍໍ້ ກໍ່ສາມາດໃຊ້ແຕ່ຄຳວ່າ ຈ້າວ ຄຳດຽວ ກໍ່ໄດ້ ຕັດຄຳວ່າ ເຂົ້າ ອອກເພາະຢູ່ໃນຖານະທີ່ເຂົ້າໃຈແລ້ວລະຫວ່າງຜູ້ສົນທະນາ

ຕົວຢ່າງ: ຂ້ອຍຊິອອກໄປຊື້ເຂົ້າ ຊິເອົາຈ້າວຫຼືໜຽວ?

ແຕ່ການໃຊ້ໃນລັກສະນະແບບນີ້ ມັນບໍ່ເປັນທາງການດອກ ເປັນການໃຊ້ຄຳເວົ້າຫຍໍ້ໆໃນການສົນທະນາຊື່ໆ ແຕ່ໂດຍທົ່ວໄປແລ້ວຈະໃຊ້ “ເຂົ້າຈ້າວ” ສອງພະຍາງ ແຕ່ເປັນໜ່ວຍດຽວ