ແຂວງວຽງຈັນ ຈະສ້າງ 4 ເມືອງເປັນວົງແຫວນການທ່ອງທ່ຽວ
ໂດຍ: ພູຂອງ
ພະແນກຖະແຫຼງຂ່າວ-ວັດທະນະທໍາ ແລະ ທ່ອງທ່ຽວ ແຂວງວຽງຈັນ ຫວັງຈະສ້າງ 4 ເມືອງທົ່ງພຽງຄື: ໂພນໂຮງ, ວຽງຄໍາ, ແກ້ວອຸດົມ ແລະ ທຸລະຄົມໃຫ້ກາຍເປັນວົງແຫວນຂອງການທ່ອງທ່ຽວ ໂດຍອາໄສເສັ້ນທາງຫລວງແຫ່ງຊາດເລກ 13 ເໜືອ ແລະ ທາງຫຼວງແຫ່ງຊາດເລກ10, ເຊິ່ງຄວາມພະຍາຍາມນີ້ເປັນປີທີສອງແລ້ວ ຂະນະທີ່ປີກາຍກໍ່ໄດ້ມີການຈັດກອງປະຊຸມຂຶ້ນທີ່ເມືອງໂພນໂຮງ ແລະ ປີນີ້ຈະຈັດຂຶ້ນທີ່ເມືອງທຸລະຄົມຕິດພັນກັບງານບຸນພະທາດມາຫຼ້າເລີ່ມແຕ່ວັນທີ 7-14 ກຸມພາ 2014.
ທ່ານ ບົວລີ ມີລັດຕະນະແພງ ຮອງຫົວໜ້າພະແນກຖະແຫຼງຂ່າວ-ວັດທະນະທໍາ ແລະ ທ່ອງທ່ຽວແຂວງວຽງຈັນໃຫ້ຮູ້ວ່າ: ແຂວງວຽງຈັນມີແຜນຈະສ້າງ 4 ເມືອງທົ່ງພຽງ ເຊິ່ງປະກອບ ດ້ວຍເມືອງໂພນໂຮງ, ວຽງຄໍາ, ແກ້ວອຸດົມ ແລະ ທຸລະຄົມ ໃຫ້ກາຍເປັນວົງແຫວນການທ່ອງທ່ຽວແຫ່ງໜຶ່ງທີ່ກ່ຽວພັນກັນຄວາມພະຍາຍາມອັນນີ້ເປັນປີທີສອງ ເຊິ່ງປີນີ້ຈະໄດ້ຈັດໃຫ້ມີການປະຊຸມຮ່ວມກັນ ເພື່ອສ້າງຄວາມເປັນເອກະພາບໃນທາງປະຕິບັດຊອກໃຫ້ເຫັນສິ່ງຄ້າງຄາ ແລະ ແກ້ໄຂ ເພື່ອໃຫ້ຄວາມຫວັງອັນນີ້ກາຍເປັນຮູບປະທໍາຂຶ້ນມາ, ປະຈຸບັນແມ່ນມີຄວາມຄືບໜ້າພໍຄວນເພາະບັນດາເສັ້ນທາງຕ່າງໆແມ່ນເຊື່ອມຈອດກັນເປັນທີ່ຮຽບຮ້ອຍແລ້ວ ໂດຍອາ ໄສສອງຄື: ເສັ້ນທາງຫຼວງແຫ່ງ ຊາດ 13 ເໜືອ ແລະ ເສັ້ນທາງແຫ່ງຊາດເລກ 10 ເປັນຂົວຕໍ່ທີ່ສໍາຄັນ ເຊິ່ງນັກທ່ອງທ່ຽວທັງ ພາຍໃນແລະຕ່າງປະເທດທີ່ເດີນ ທາງຜ່ານນະຄອນຫຼວງວຽງຈັນ ສາມາດນໍາໃຊ້ເສັ້ນທາງຫຼວງແຫ່ງຊາດ 13 ເໜືອມຸ່ງໜ້າສູ່ເມືອງໂພນໂຮງ ໂດຍແວ່ເຂົ້າທາງແບ່ງບ້ານລິ່ງຊັນຊົມສະຖານທີ່ທ່ອງທ່ຽວທາງວັດທະນະທໍາ, ວັດພະທອງສາມສີ, ເຮືອບູຮານ, ຂ້າມນ້ໍາງື່ມຂຶ້ນປ່າແປກພູເຂົາຄວາຍ, ທ່ຽວອ່າງນ້ໍາມັງ, ອ່າງນ້ໍາປອດ, ສວນ ສັດທີ່ບ້ານເກິນ ແລ້ວເດີນທາງຕາມທາງຫຼວງແຫ່ງຊາດເລກ 10 ຊົມສິລະປະການຕໍ່ສູ້ຟ້ອນລາຍງ້າວທີ່ປາກະຍຸງ ແລ້ວມຸ່ງຫນ້າຂຶ້ນເຂື່ອນໄຟຟ້ານ້ໍາງື່ມ I ແລະ ອອກໄປຊົມອະນຸສອນສະຖານພະເຫວດສັນດອນທີ່ບ້ານແກ້ວກູ່, ຊົມຄວາມງາມຂອງແກ້ງກະຈາງຕາມສາຍນ້ໍາລີກອອກໄປຊົມດານພະ, ແຫຼ່ງທ່ອງທ່ຽວວັງຊ້າງ ແລະ ກ້ຽວໄປຊົມວັດວຽງຄໍາບູຮານສະໄໝເຈົ້າຟ້າ ງຸ່ມ ແລະ ອື່ນໆອີກ.
ປະຈຸບັນຄວາມພ້ອມໃນການສ້າງສີ່ເມືອງດັ່ງກ່າວເປັນວົງແຫວນຂອງການທ່ອງທ່ຽວແມ່ນມີຄວາມພ້ອມທາງດ້ານເສັ້ນທາງ, ຮ້ານອາຫານ ແລະ ສະຖານທີ່ພັກອາໄສ ສ່ວນສະຖານທີ່ທ່ອງທ່ຽວຫລາຍແຫ່ງທີ່ໄດ້ກ່າວມາຂ້າງເທິງນັ້ນຍັງຂາດທຶນຮອນໃນການພັດທະນາໃຫ້ກາຍເປັນແຫລງທ່ອງທ່ຽວທີ່ສາມາດຮັບໃຊ້ໃຫ້ແກ່ນັກທ່ອງທ່ຽວໄດ້ເທື່ອ; ສໍາລັບນັກລົງທຶນທ່ານໃດຫາກມີຄວາມສົນໃຈຍື່ນມືເຂົ້າໄປພັດທະນາແຫຼ່ງທ່ອງທ່ຽວເຫລົ່ານັ້ນສາມາດເຂົ້າໄປປະສານງານຂໍຂໍ້ມູນທີ່ເປັນພື້ນຖານນໍາພະແນກຖະແຫລງຂ່າວ-ວັດທະນະທໍາ ແລະ ທ່ອງທ່ຽວ ແຂວງວຽງຈັນໄດ້.
ແນວໃດກໍ່ດີ ສໍາລັບງານນະມັດສະການພະທາດມາຫຼ້າປີນີ້ຈະມີງານຕະຫຼາດນັດ ເພື່ອວາງຂາຍຜະລິດຕະພັນສົ່ງເສີມການທ່ອງທ່ຽວທີ່ຜະລິດຈາກສີມືຂອງປະຊາຊົນ ແລະ ຫ້ອງຮ້ານຕ່າງໆເຂົ້າວາງສະແດງຫລາຍກວ່າ 150 ຮ້ານ, ທາງດ້ານສາ ສະໜາກໍ່ຈະມີຂະບວນແຫ່ປາສາດເຜິ້ງ ແລະ ຕົ້ນກັນ, ກາງຄືນມີການສະແດງສິລະປະພື້ນບ້ານຂອງປະຊາຊົນ ແລະ ໃນຕອນ ເຊົ້າກໍ່ມີການທໍາບຸນຕັກບາດຕາມທີ່ເຄີຍປະຕິບັດກັນມາສ່ວນໄລຍະການຈັດງານແມ່ນໃນລະຫວ່າງວັນທີ 7-14 ກຸມພາ.
ສ່ວນຫຼາຍໂຄງການງາມແຕ່ຮູບ
ບາດເຮັດອອກມາໂຕຈິງ ແມ່ນຂີ້ຮ້າຍ ຕ່າງກັນ ປານຟ້າກັບດິນ
ຊົມເຊີຍ ! ນີ້ລະຈຶ່ງສົມເປັນພັກນໍາພາທີ່ສະຫລາດສ່ອງໃສຮູ້ນໍາໃຊ້ເງິນທີ່ໄດ້ມາຈາກການຂາຍບໍ່ແຮ່
ຂາຍໄຟຟ້າ ຂາຍໄມ້ ແລະ ຂາຍອື່ນໆມາສ້າງສາພັດທະນາບ້ານເມືອງຢ່າງແທ້ຈິງ.
ໃຜມີຮູບສະຖານທີ່ທ່ອງທ່ຽວດັ່ງລຸ່ມນີ້ ໂພດລົງໃຫ້ເບີ່ງແດ່ແຕ່ລະບ່ອນຢູ່ບ້ານໃດບອກແດ່ ທັງໝົດນີ້ສາມາດທ່ຽວໄດ້ພາຍໃນ1ມື້ບໍ່
ວັດພະທອງສາມສີ, ເຮືອບູຮານ, ຂ້າມນ້ໍາງື່ມຂຶ້ນປ່າແປກພູເຂົາຄວາຍ, ທ່ຽວອ່າງນ້ໍາມັງ, ອ່າງນ້ໍາປອດ, ສວນ ສັດທີ່ບ້ານເກິນ ແລ້ວເດີນທາງຕາມທາງຫຼວງແຫ່ງຊາດເລກ 10 ຊົມສິລະປະການຕໍ່ສູ້ຟ້ອນລາຍງ້າວທີ່ປາກະຍຸງ ແລ້ວມຸ່ງຫນ້າຂຶ້ນເຂື່ອນໄຟຟ້ານ້ໍາງື່ມ I ແລະ ອອກໄປຊົມອະນຸສອນສະຖານພະເຫວດສັນດອນທີ່ບ້ານແກ້ວກູ່
ຂໍຂອບໃຈ
ຕັດລາຍການ ຂຶ້ນປ່າແປກພູເຂົາຄວາຍ ສີໄດ້ຢູ່ມື້ນຶ່ງ
ແຕ່ກອ່ນຂຶ້ນພູເຂົາຄວາຍໄປເກັບດອກກະຈຽວ
ດຽວນີ້ບໍ່ຮູ້ເປັນແນວໃດ ເພາະອ່າງນຳ້ເຂື່ອນ ນຳ້ມັງຖວ້ມ
ວັນທີ 11/02/2014 - ເວລາ 11:47:18 ເບິ່ງ 50
