Pasalao

ບໍ­ລິ­ສັດ​ແຄມ​ແຄນ ເອ​ເນີ​ຈີ ຈຳ­ກັດ ໄດ້​ຮັບ​ອະ­ນຸ­ຍາດ​ສຳ​ປະທານ​ໂຄງ­ການ​ຊອກ​ຄົ້ນ​ບໍ່​ນ້ຳ­ມັນ ແລະ ແກັດ ໃນ​ຂອບ​ເຂດ​ເນື້ອ­ທີ່ 11.974 ກິ​ໂລ​ຕາ​ແມັດ ເຊິ່ງ​ນອນຢູ່​ໃນ​ເຂດ​ແຂວງຄຳ​ມ່ວນ ສະຫວັນ​ນະ​ເຂດ ແລະ ສາ­ລະ​ວັນ ຂອງ ສປປ ລາວ.

ພິ­ທີ​ຖະ­ແຫຼງ​ຂ່າວ​ເປີດ​ໂຕ​ບໍ​ລິສັດ​ແຄມ​ແຄນ ເອ​ເນີ​ຈີ ຈຳ­ກັດ ໄດ້​ຈັດ​ຂຶ້ນ​ໃນ​ວັນ​ທີ 29 ຕຸ­ລາ 2013 ນີ້ ທີ່​ໂຮງ­ແຮມ​ລາວ​ພລາຊາ ໂດຍ​ເປັນ​ກຽດ​ເຂົ້າ​ຮ່ວມ​ຂອງທ່ານ ຄຳ​ລຽນ ພົນ​ເສ­ນາ ລັດຖະ​ມົນ­ຕີ​ຊ່ວຍ​ວ່າ­ການ​ກະ­ຊວງແຜນ­ການ ແລະ ການ​ລົງ­ທຶນ ທ່ານ ສົມ­ບູນ ຣາ​ຊາ​ສົມ­ບັດ ລັດຖະ​ມົນ­ຕີ​ຊ່ວຍ​ວ່າ­ການ​ກະ­ຊວງ​ພະລັງ​ງານ ແລະ ບໍ່​ແຮ່ ພ້ອມ​ດ້ວຍທ່ານ ປີ​ເຕີ ຮາ​ເວັນ​ຊັນ ປະ­ທານຄະ­ນະ​ຜູ້​ບໍ­ລິ­ຫານ​ບໍ­ລິ­ສັດ​ແຄມແຄນ ເອ​ເນີ​ຈີ ມີ​ບັນ­ດາ​ແຂກ ແລະ ພາກ­ສ່ວນ​ທີ່​ກ່ຽວ­ຂ້ອງ​ເຂົ້າຮ່ວມ.

ທ່ານ ປີ​ເຕີ ຮາ​ເວັນ​ຊັນ ໄດ້​ໃຫ້ຮູ້​ວ່າ: ຂ້າ­ພະ­ເຈົ້າ​ມີ​ຄວາມ​ຍິນ​ດີ ແລະ ຂອບ­ໃຈ​ມາ​ຍັງ​ລັດ­ຖະ­ບານລາວ  ທີ່​ໄດ້​ເປີດໂອ­ກາດ​ໃຫ້​ບໍ­ລິ­ສັດ​ຂອງ​ພວກ​ຂ້າພະ​ເຈົ້າ ​ໄດ້​ຮັບ​ສຳ​ປະ­ທານ​ໃນໂຄງ­ການ​ຊອກ​ຄົ້ນ-ສຳ​ຫຼວດນ້ຳ­ມັນ ແລະ ອາຍ​ແກັດ ​ໃນ​ຄັ້ງ​ນີ້  ບໍ­ລິ­ສັດ​ແຄມ​ແຄນ ເອ​ເນີ​ຈີ ຈຳກັດ ແມ່ນ​ບໍ­ລິ­ສັດ​ກາ​ນາ​ດາ ເຊິ່ງຖືກ​ສ້າງ­ຕັ້ງ ແລະ ບໍ­ລິ­ຫານ ໂດຍທີມ​ງານ​ຊ່ຽວ­ຊານທີ່​ມີ​ຄວາມ​ຊຳນານ​ດ້ານ​ເຕັກ­ນິກ​ສູງ ມີ​ປະ­ສົບການ ແລະ ຊື່​ສຽງ​ຈາກ​ຫຼາຍໆ ໂຄງ­ການ​ໃນທົ່ວ​ໂລກ​ຂອງ​ຂະແໜງ​ອຸດ­ສາ­ຫະ­ກຳ​ນ້ຳ­ມັນ ແລະ ແກັດ ໃນ​ລະ­ດັບ​ສາ­ກົນ ທາງ­ບົກ ແລະ ທາງ­ນ້ຳ ໃນ​ການ​ປະ­ຕິ­ບັດວຽກ​ງານ​ຮອບ­ດ້ານ​ໃນ​ໄລ­ຍະຜ່ານ​ມາ ເປັນ­ຕົ້ນ​ແມ່ນ​ດ້ານ​ສຸຂະພາບ ຄວາມ​ປອດ​ໄພ ດ້ານ​ສິ່ງແວດ​ລ້ອມ ແລະ ການ​ນຳ​ໃຊ້ເຕັກ​ໂນ​ໂລ​ຊີ​ທີ່​ສະ­ອາດ ປອດ​ໄພ ແລະ ເປັນ​ມິດ​ກັບ​ສິ່ງ­ແວ­ດລ້ອມ ພວກ​ຂ້າ­ພະ­ເຈົ້າ​ມີ​ຄວາມ​ມຸ່ງ​ໝັ້ນ ແລະ ຕັ້ງ­ໜ້າ​ໃນ​ການ​ປະ­ຕິ­ບັດໂຄງ­ການ ໂດຍ​ໄດ້​ຮັບ​ໂອ­ກາດເຮັດ​ວຽກ​ງານ​ຮ່ວມ​ກັບ​ພາກ­ສ່ວນຕ່າງໆ​ຢູ່​ຂັ້ນ​ສູນ​ກາງ ແລະ ທ້ອງຖິ່ນ ແລະ ພາກ­ສ່ວນ​ທີ່​ກ່ຽວຂ້ອງ​ຂອງ ສປປ ລາວ ຢ່າງໃກ້­ຊິດ ໃນ​ການ​ຮ່ວມ​ມື​ເຊິ່ງ​ກັນ ແລະ ກັນ ເພື່ອ​ຊອກ​ຄົ້ນ​ແຫຼ່ງ​ພະ­ລັງ­ງານ ແລະ ຫວັງ​ວ່າພວກ​ເຮົາຈະ​ສາ­ມາດ​ຄົ້ນ​ພົບ​ນ້ຳ­ມັນ ແລະ ອາຍ​ແກັດ ທີ່​ມີ​ປະ­ລິ­ມານ​ສະ​ສົມຢ່າງ​ພຽງ­ພໍ ໃນ​ການ​ກາຍ­ເປັນແຫຼ່ງ​ເສດ­ຖະ­ກິດ ເຊິ່ງ​ຈະ​ຊ່ວຍສ້າງ​ໃຫ້ ສປປ ລາວ ມີ​ຊື່​ສຽງ​ໃນເວ­ທີສາ­ກົນ.