ຕາມການປະເມີນຄວາມທຸກຍາກ ໃນທ້າຍປີ 2013 ອັດຕາຄອບຄົວທຸກຍາກໄດ້ຫລຸດຍັງເຫຼືອພຽງ 10,57% ບ້ານທຸກຍາກກໍຫຼຸດລົງຍັງເຫຼືອ 26,72% ຫລືເທົ່າກັບ 2.291 ບ້ານ ແລະ ເມືອງທຸກຍາກຍັງເຫຼືອ 25,52% ໃນຂະນະດຽວກັນ ບ້ານພັດທະນາໄດ້ເພີ່ມຂຶ້ນ 27,45% ແລະ ຄອບຄົວພັດທະນາເພີ່ມຂຶ້ນກວມ 65,60%.
ໃນວັນທີ 10 ຕຸລາ 2013 ນີ້, ທ່ານ ບຸນເຮືອງ ດວງພະຈັນ ລັດຖະມົນຕີປະຈຳຫ້ອງວ່າການລັດຖະບານ ຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ໄດ້ຖະແຫຼງຂ່າວຕໍ່ສື່ມວນຊົນ ເນື່ອງໃນໂອກາດວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ 17-24 ຕຸລາ 2013 ໂດຍຊີ້ໃຫ້ເຫັນວ່າ: ພັກ-ລັດຖະບານ ຍາມໃດກໍມີຄວາມພະຍາຍາມ ໃນການຍົກຄຸນນະພາບຊີວິດຂອງປະຊາຊົນບັນດາເຜົ່າ ລວມທັງດ້ານການພັດທະນາ ທັງໃນຕົວເມືອງ ແລະ ຊົນນະບົດ ໃຫ້ດີຂຶ້ນເປັນກ້າວໆ ຍ້ອນ ສປປ ລາວ ມີສະພາບຈຸດພິເສດດ້ານພື້ນທີ່ສ່ວນໃຫຍ່ເປັນຊົນນະບົດ ພົນລະເມືອງປະມານ 80% ເປັນຊາວກະສິກອນ ແລະ ດຳລົງຊີວິດຢູ່ຊົນນະບົດ ການດຳລົງຊີວິດ ແລະ ການຜະລິດສ່ວນໃຫຍ່ຂອງປະຊາຊົນ ຍັງເປັນແບບທຳມະຊາດ ລະດັບຄຸນນະພາບຊີວິດຍັງຕ່ຳ ພື້ນຖານວັດຖຸເຕັກນິກ ແລະ ໂຄງລ່າງດ້ານເສດຖະກິດ-ສັງຄົມ ຍັງຈຳກັດຫລາຍດ້ານ ດ້ວຍເຫດນີ້ ພັກ-ລັດຖະບານ ຍາມໃດກໍຖືເອົາວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ເປັນວຽກຍຸດທະສາດ ເປັນວຽກບູລິມະສິດຕົ້ນຕໍ ແລະ ເປັນໜ້າທີ່ຕົ້ນຕໍຂອງປວງຊົນລາວທັງຊາດ ແນໃສ່ເຮັດໃຫ້ວຽກງານພັດທະນາຊົນນະບົດ ກາຍເປັນສະໜາມຮົບອັນດັບໜຶ່ງຢ່າງແທ້ຈິງ ພ້ອມນັ້ນໄດ້ວາງຄາດໝາຍສູ້ຊົນ ຫຼຸດອັດຕາຄວາມທຸກຍາກໃຫ້ຕ່ຳກວ່າ 10% ແລະ ບັນລຸເປົ້າໝາຍສະຫັດສະວັດ ເພື່ອການພັດທະນາໃນປີ 2015 ທັງນຳເອົາປະເທດຊາດ ໃຫ້ຫຼຸດພົ້ນອອກຈາກສະພາວະຄວາມດ້ອຍພັດທະນາ ໃນປີ 2020.
ຢ່າງໃດກໍຕາມ ໃນແຕ່ລະປີ ລັດຖະບານໄດ້ສຸມທຶນຮອນເຂົ້າໃນການປະຕິບັດ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ກໍຄືການຄ້ຳປະກັນສະບຽງອາຫານເປັນຈຳນວນຫລາຍພໍສົມຄວນ ສະເພາະປີ 2013 ມີມູນຄ່າ 1,6 ຕື້ກວ່າກີບ ໂດຍທຶນດັ່ງກ່າວ ບໍ່ໄດ້ລວມເອົາການລົງທຶນຂອງພາກສ່ວນເສດຖະກິດ ທັງພາຍໃນ ແລະ ຕ່າງປະເທດ ທຶນຊ່ວຍເຫລືອລ້າ ແລະ ກູ້ຢືມຂອງຂະແໜງການທີ່ຈັດຕັ້ງປະຕິບັດຢູ່ທ້ອງຖິ່ນ ຜົນສຳເລັດທີ່ຍາດມາໄດ້ນັ້ນ ກໍຍ້ອນມີການປະກອບສ່ວນອັນສຳຄັນຂອງທຸກຊັ້ນຄົນໃນສັງຄົມ ທັງພາຍໃນ ແລະ ຕ່າງປະເທດ, ລວມທັງການຊ່ວຍເຫຼືອຂອງປະເທດເພື່ອນມິດ ສະຖາບັນການເງິນ ອົງການຈັດຕັ້ງສາກົນ ທີ່ເປັນຄູ່ຮ່ວມພັດທະນາ ແລະ ອົງການທີ່ບໍ່ສັງກັດລັດຖະບານ ພ້ອມນີ້ໄດ້ຮຽກຮ້ອງເຖິງທຸກຊັ້ນຄົນ ແລະ ພາກສ່ວນໃນສັງຄົມ ຈົ່ງຮ່ວມແຮງຮ່ວມໃຈກັນຕໍ່ສູ້ກັບຄວາມທຸກຍາກ ແລະ ໄພອຶດຫິວຢູ່ໃນທົ່ວໂລກ ກໍຄືໃນ ສປປ ລາວ ໃຫ້ມີຜົນສຳເລັດຕາມຄາດໝາຍທີ່ວາງໄວ້.
ທ່ານ ບຸນເຮືອງ ດວງພະຈັນ ກ່າວຕື່ມວ່າ: ຄວາມທຸກຍາກ ແລະ ຄວາມອຶດຫິວເປັນບັນຫາໃຫຍ່ຂອງໂລກ ທີ່ມີມາຫຼາຍທົດສະວັດແລ້ວ ຊຶ່ງອົງການສະຫະປະຊາຊາດ ກໍໄດ້ມີຄວາມພະຍາຍາມແກ້ໄຂບັນຫາດັ່ງກ່າວມາໂດຍຕະຫຼອດ ປັດຈຸບັນ ປະຊາກອນທົ່ວໂລກຫຼາຍລ້ານຄົນ ຍັງດຳລົງຊີວິດໃນຄວາມທຸກຍາກຂາດເຂີນ ບໍ່ມີວຽກເຮັດງານທຳ ແລະ ມີລາຍຮັບຕ່ຳກວ່າ 1 ໂດລາສະຫະລັດ/ຄົນ/ມື້ ເພື່ອເປັນການສະແດງພະລັງມວນຊົນ ໃນການສະໜັບສະໜູນວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ໃຫ້ເປັນຂະບວນຟົດຟື້ນໃນທົ່ວປະເທດ ພາຍໃຕ້ຄຳຂວັນທີ່ວ່າ “ພາລະກິດລຶບລ້າຄວາມທຸກຍາກ ແມ່ນໜ້າທີ່ ແລະ ຄວາມຮັບຜິດຊອບຂອງທົ່ວພັກ ທົ່ວລັດ ແລະ ທົ່ວສັງຄົມ” ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ໄດ້ຈັດໃຫ້ມີກິດຈະກຳຍ່າງເພື່ອສຸຂະພາບ ການໂຮມຊຸມນຸມ ແລະ ວາງສະແດງຮູບພາບ ການຈັດປາຖະກະຖາໃຫ້ພະນັກງານຫຼັກແຫຼ່ງອອ້ມຂ້າງສູນກາງ ແລະ ການແຂ່ງຂັນກ໋ອຟເພື່ອການກຸສົນ ຊີງຂັນຂອງທ່ານນາຍົກລັດຖະມົນຕີ ເປັນການລະດົມທຶນປະກອບສ່ວນເຂົ້າໃນການວຽກງານດັ່ງກ່າວ.
http://www.vientianemai.net/teen/khao/1/10373
ຂໍສະແດງຄວາມຍິນດີນໍາພັກລັດແລະປະຊາຊົນລາວທີ່ສາມາບັນລຸເປົ້າໝາຍໄດ້ຕາມຄໍາສັນຍາ
ທີ່ໄດ້ໃຫ້ແກ່ອົງການສະຫະປະຊາຊາດໃນປີ 2009.
ຖືກຕ້ອງທີ່ສຸດ, ແລ້ວຍັງອີກ 89.43 % ເປັນຄອບຄົວທຸກງ່າຍ ໝາຍຄວາມວ່າຍັງຢູ່ໃນຄວາມທຸກຍາກນັ້ນເອງ !!!
ຍູ່ໃນໂລກ ມີຄົນທຸກກວ່າ 23% ແຕ່ລາວເຮົາລື່ນຄາດຫມາຍ 10.5%
ອີກ ປີ 2020 ຄົງບໍ່ມີຄົນທຸກແລວ້
ດີໃຈ
