ດຣ ພັນຄຳ ວິພາວັນ ອອກຄຳສັ່ງໃຫ້ສະຫຼອງວັນຄູແບບໃໝ່ (ບໍ່ໃຫ້ມອບຂອງຂວັນແກ່ຄູ-ອາຈານ)ລັດຖະມົນຕີວ່າການກະຊວງສຶກສາທິການ ແລະ ກິລາ, ດຣ. ພັນຄຳ ວິພາວັນ ໄດ້ອອກຄຳສັ່ງແນະນຳ ສະບັບເລກທີ 1382, ລົງວັນທີ 19 ກັນຍາ 2013 ກ່ຽວກັບການຈັດຕັ້ງສະເຫລີມສະ ຫລອງວັນຄູແຫ່ງຊາດ ຄົບຮອບ 19 ປີ (7 ຕຸລາ 1994 - 7 ຕຸລາ 2013) ເພື່ອສືບຕໍ່ໃຫ້ການຈັດຕັ້ງສະຫລອງວັນທີ່ມີຄວາມໝາຍດັ່ງກ່າວມີຄວາມໝາຍ, ມີເນື້ອໃນ ແລະ ສອດຄ່ອງ ແນໃສ່ເຮັດໃຫ້ເປັນຂະບວນການເຂົ້າເຖິງທຸກອົງການຈັດຕັ້ງໃນທົ່ວສັງຄົມຕະຫລອດເຖິງປະຊາຊົນລາວບັນດາເຜົ່າໄດ້ເຂົ້າຮ່ວມຢ່າງກວ້າງຂວາງ,ມີບັນຍາກາດຟົດຟື້ນມ່ວນ ຊື່ນ ແລະ ກາຍເປັນປາງບຸນໜຶ່ງຂອງສັງ ຄົມກໍຄືຂອງຄູອາຈານຮ່ວມກັບນັກຮຽນ-ນັກສຶກສາໂຮງຮຽນແຫ່ງຕ່າງໆບົນພື້ນຖານຮັບປະກັນຄວາມສາມັກຄີຄວາມເປັນປຶກແຜ່ນຂອງປວງຊົນລາວທັງຊາດ ແລະ ມີຄວາມສະຫງົບປອດໄພຊຶ່ງມີລາຍລະອຽດດັ່ງນີ້ :
1. ການຈັດຕັ້ງສະເຫລີມສະ ຫລອງວັນຄູແຫ່ງຊາດປີນີ້ໃຫ້ມີການຫັນປ່ຽນຈາກເນື້ອໃນ, ຮູບການ, ວິທີການທີ່ເຄີຍປະຕິບັດໃນໄລຍະຜ່ານມາ ຫັນໄປສູ່ເນື້ອໃນ, ຮູບການ ແລະວິທີການສອດຄ່ອງ ໂດຍໃຫ້ຖືເອົາການສະເຫລີມສະ ຫລອງດັ່ງກ່າວເປັນການທົບ ທວນຫວນຄືນເຖິງຄຸນງາມ ຄວາມດີຂອງຄູ-ອາຈານ,ຂອງອະດີດນັກຮຽນ-ນັກສຶກສາທັງເປັນການສ້າງໂອກາດໃຫ້ຄູອາ ຈານນັບທັງອະດີດຄູອາຈານ, ນັກຮຽນ-ນັກສຶກສາຂອງໂຮງ ຮຽນ, ສະຖາບັນການສຶກສາແຫ່ງນັ້ນ ໄດ້ປຶກສາຫາລືຮ່ວມກັນກ່ຽວກັບທິດທາງແຜນການ,ການບູລະ ນະສ້ອມແປງ ແລະ ພັດທະນາໂຮງຮຽນ,ສະຖາບັນການສຶກສາແຫ່ງນັ້ນໃຫ້ມີການພັດທະນາຢ່າງຈົບງາມສົມກັບເປັນແຫລ່ງ ວັດທະນະທຳອັນໜຶ່ງຂອງທ້ອງຖິ່ນ.ເນື້ອໃນຕົ້ນຕໍພິທີສະເຫລີມສະ ຫລອງວັນຄູແຫ່ງຊາດຄວນຍົກໃຫ້ເຫັນປະຫວັດຄວາມເປັນມາ, ຜົນສຳເລັດ ແລະ ມູນເຊື້ອອັນດີ ງາມຂອງໂຮງຮຽນ, ສະຖາບັນການສຶກສາແຫ່ງນັ້ນໆ. ພ້ອມນັ້ນ ຄວນຈັດຕັ້ງໃຫ້ມີການເລົ່າເລື່ອງ ແລະ ເລົ່າປະສົບການຂອງອະດີດຄູອາຈານ,ອະດີດນັກຮຽນ-ນັກສຶກສາກໍຄືຜູ້ບໍລິຫານໂຮງຮຽນ, ສະຖາບັນການສຶກສາທີ່ໄດ້ປະສົບຜົນສຳເລັດໃນການດຳລົງຊີວິດຂອງຕົນເພື່ອເປັນບົດຮຽນໃຫ້ຮຸ່ນຄົນຕໍ່ໄປ ແລະ ໃຫ້ຫລີກເວັ້ນ ລາຍການມອບຂອງຂວັນຂອງນັກຮຽນ-ນັກສຶກສາທີ່ພວມສຶກສາຮ່ຳຮຽນຢູ່ໃຫ້ຄູອາຈານ ເຊິ່ງເປັນສິ່ງທີ່ບໍ່ຈຳເປັນ. ນອກຈາກນັ້ນກໍຄວນມີການສະເໜີແຜນການປັບປຸງການພັດທະນາພື້ນຖານໂຄງລ່າງ, ການພັດທະນາການຈັດການຮຽນ-ການສອນທັງເປັນການລະດົມທຶນຮອນປກອບສ່ວນຊຸກຍູ້ການພັດທະນາໂຮງຮຽນ, ສະຖາບັນການສຶກສາແຫ່ງນັ້ນເຮັດໃຫ້ຄຸນນະພາບດີຂຶ້ນ. ສຳລັບໂຮງຮຽນມັດທະຍົມສຶກສາຕອນປາຍ,ສະຖາບນອະຊີວະສຶກສາ, ການສຶກສາຊັ້ນສູງນັບທັງມະຫາວິທະຍາໄລ ແລະ ສາຍສ້າງຄູນອກຈາກຈະດຳເນີນການສະເຫລີມສະຫລອງວັນຄູແຫ່ງຊາດຕາມເນື້ອໃນດັ່ງກ່າວມານັ້ນແລ້ວອາດຈັດໃຫ້ມີການຈັດຕັ້ງສຳມະນາວິທະຍາສາດຕາມຫົວຂໍ້ທີ່ເໝາະສົມກັບຍຸກສະໄໝທັງສອດຄ່ອງ ແລະ ຮັບໃຊ້ໃຫ້ແກ່ການພັດທະນາໂຮງຮຽນ, ສະຖາບັນຂອງຕົນ. ນອກຈາກການຈັດຕັ້ງພິທີສະເຫລີມສະຫລອງຕາມເນື້ອໃນຈິດໃຈດັ່ງກ່າວມານັ້ນແລ້ວກໍອາດຈັດກິດຈະກຳແຂ່ງຂັນສິລະປະວັນນະຄະດີ,ແຂ່ງຂັນກິລາປະເພດຕ່າງໆຕາມຄວາມເໝາະສົມ ແລະ ຄວາມສາມາດຕົວຈິງຂອງຕົນ.
2. ມອບໃຫ້ອະທິການບໍດີມະຫາວິທະຍາໄລແຫ່ງຕ່າງໆ, ຫົວໜ້າພະແນກສຶກສາທິການ ແລະກິລາແຂວງ-ນະຄອນ ຫລວງ ຫົວໜ້າຫ້ອງການສຶກສາທິການ ແລະ ກິລາເມືອງ, ຜູ້ອຳນວຍການໂຮງຮຽນ, ວິທະຍາໄລ, ສະຖາບັນການສຶກສາທັງພາກລັດ ແລະ ເອກະຊົນ ເປັນເຈົ້າການຈັດຕັ້ງປະຕິບັດຢູ່ຂັ້ນຂອງຕົນ ໂດຍປະສານສົມທົບຢ່າງສະນິດແໜ້ນ ແລະ ຂໍຄວາມຄິດຄວາມເຫັນນຳອຳນາດການປົກຄອງແຂວງ-ນະຄອນຫລວງ, ອຳນາດການປົກຄອງເມືອງ ແລະ ບ້ານທີ່ຕົນຂຶ້ນກັບເພື່ອຈັດ ຕັ້ງສະເຫລີມສະຫລອງວັນດັ່ງກ່າວໃຫ້ໄປຕາມທິດທາງການຫັນປ່ຽນໃໝ່ທີ່ກ່າວໄວ້ຂ້າງເທິງ. ພ້ອມດຽວກັນນັ້ນກໍໃຫ້ປະສານສົມທົບລະອຽດກັບຂະແໜງການທີ່ກ່ຽວຂ້ອງໂດຍສະເພາະຂະແໜງປ້ອງກັນຊາດ- ປ້ອງກັນຄວາມສະຫງົບ, ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມກັນເຮັດໜ້າທີ່ວຽກງານປ້ອງກັນຄວາມສະຫງົບໃຫ້ດີ, ໂຄສະນາປຸກລະດົມມວນຊົນໃນ ທົ່ວສັງຄົມນັບທັງຕົວແທນອະດີດຄູ-ອາຈານເກົ່າເຂົ້າ ຮັບເບ້ຍບຳນານ,ອະດີດນັກຮຽນ- ນັກສຶກສາຂອງໂຮງຮຽນຕົນເຂົ້າ ຮ່ວມຂະບວນການດັ່ງກ່າວ. ພ້ອມດຽວກັນນັ້ນ ກໍແຕ່ງຕັ້ງຄະນະຮັບຜິດຊອບຂັ້ນຂອງຕົນ, ແບ່ງໜ້າທີ່ຄວາມຮັບຜິດຊອບເຊິ່ງກັນ ແລະ ກັນໃຫ້ລະອຽດ, ກຳນົດແຜນວຽກ, ວິທີການທີ່ຈະເຮັດຕົວຈິງ ແລະອື່ນໆ.ແຕ່ລະແຂວງ- ນະຄອນຫລວງ, ແຕ່ລະເມືອງອາດຄົ້ນຄວ້າເອົາໂຮງຮຽນຫລືສະຖາບັນການສຶກສາແຫ່ງໃດໜຶ່ງຢູ່ພາຍໃນແຂວງ-ພາຍໃນເມືອງຂອງຕົນທີ່ມີມູນເຊື້ອອັນດີງາມ ແລະ ໂດດເດັ່ນເປັນບ່ອນຈັດຕັ້ງພິທີການສະເຫລີມສະຫລອງວັນຄູແຫ່ງຊາດຂັ້ນຂອງຕົນ.
3. ກ່ອນການກະກຽມສະເຫລີມສະຫລອງວັນສຳຄັນດັ່ງກ່າວໃຫ້ບັນດາໂຮງຮຽນ, ສະຖາບັນການສຶກສາທັງພາກລັດ ແລະ ເອກະຊົນໃນຂອບເຂດທົ່ວປະເທດໃຫ້ປຸກລະດົມສ້າງຂະບວນການແຂ່ງຂັນຮັກຊາດພັດທະນາ ໂດຍສະເພາະການຈັດ ຕັ້ງປະຕິບັດ 3 ຂໍ້ແຂ່ງຂັນຂອງຂະແໜງການສຶກ ສາ ແລະ ກິລາໃຫ້ເປັນຂະບວນຟົດຟື້ນ ແລະ ເກີດເປັນຮູບປະທຳຢ່າງແທ້ຈິງເທື່ອລະກ້າວ.
4. ສຳລັບງົບປະມານຮັບໃຊ້ການສະເຫລີມສະຫລອງວັນດັ່ງກ່າວມອບໃຫ້ເປັນຄວາມຮັບຜິດຊອບຂອງແຂວງ,ຂອງເມືອງ, ຂອງໂຮງຮຽນ, ສະຖາບັນການສຶກສາແຫ່ງຕ່າງໆບົນພື້ນຖານຢູ່ໃນຫລັກການປະຢັດມັດທະຍັດ ແລະ ບໍ່ໃຫ້ເປັນການໃຊ້ຈ່າຍງົບປະມານທີ່ສິ້ນເປືອງຟຸມເຟືອຍ.ຂອບໃຈເນື້ອໃນຂ່າວ ຈາກລາວພັດທະນາ
ເງີກແລ້ວຍັງອວດສະຫຼາດ ສະແດງວ່າໂງສຸດໆ
ຮູ້ບໍ່ວ່າຄູໄດ້ຂອງຂວັນຈາກນັກຮຽນເປັນພຽງລາງວັນອັນນ້ອຍນິດ ແລະມັນເປັນປະເພນີປະຕິບັດກັນມາແລະມັນບໍ່ແມ່ນການສໍ້ລາດບັງຫຼວງ ຖ້າຈະມາຫ້າມຂອງຈັ່ງຊີ້ຄືບໍ່ໄປຫ້າມຢ່າງອື່ນ ເຊັ່ນດຽວນີ້ໄດ້ຍິນວ່າມີການແບ່ງໂຄຕ້າຂອງນັກຮຽນທີ່ຈະເຂົ້າ ມຊ ບໍ່ແມ່ນຫວະໂຄຕ້າຕ່າງໆເຫຼົ່ານີ້ໂດຍກົດເກນແລ້ວແມ່ນເພື່ອແບ່ງໃຫ້ຜູ້ດ້ອຍໂອກາດຈາກຊົນນະບົດໄດ້ມີໂອກາດຮໍາຮຽນ ແຕ່ເອົາມາແບ່ງກັນຂາຍປານຂອງໃນຕະຫຼາດ ເລື່ອງແນວນີ້ມັນເປັນການຄໍລັບຊັ້ນແບບຕາເຫັນໆແລະເຮັດກັນແບບເປັນກະບວນ. ນອກຈາກນີ້ການຮັບເອົາພະນັກງານລັດກໍ່ເຊັ່ນກັນເຮັດຮູບແບບດຽວກັນ ປັນຫາເຫຼົ່ານີ້ຄືບໍ່ແກ້ ບາດສິມາແກ້ມາແກ້ເລື່ອງຂອງຂວັນນັກຮຽນມອບໃຫ້ຄູ ກູລະອີຕົນແນວຄວາມຄິດມຶງເດ່. ໄປແກ້ໄຂພວກກວດສອບໂຮງຮຽນເອກະຊັນຫັນດີກວ່າ ພວກນິເທດຮັບຊອງແບບເຂົາບໍ່ເຕັມໃຈຢາກໃຫ້ຫັນສິດີກວ່າ. ຄໍາວ່າຄູສ່ວນຫຼາຍເຂົາໝາຍເຖິງຄູຊັ້ນປະຖົມ ມັດຖະຍົມທີ່ເງິນເດືອນຕໍ່າແລະບໍ່ຄ່ອຍມີໂອກາດສໍ້ໂກງໄດ້ຄືທ່ານຜູ້ອອກປະກາດຫ້າມດອກ ຢ່າງຫຼາຍໄດ້ເງິນກະຈາກການສອນເພີ່ມ ຫຼືພໍ່ແມ່ນັກຮຽນເອົາໃຫ້ເພື່ອເປັນນໍາໃຈ. ຖ້າຈະຄິດໃຫ້ຄິດໄປໄກກວ່ານີ້ແດ່ ຢ່າກົດເຂົຫຼາຍພວກຄູຫັນ ເຊີນໄປເບິ່ງການສໍ້ລາດບັງຫຼວງອັນມັນກໍາລັງທໍາລາຍຊາດຫັນສາ ເຊັ່ນພວກເຮັດກ່ຽວກັບທີ່ດິນ, ພາສີ ອາກອນ, ກົມຈັດຕັ້ງເອົາພະນັກງານເຂົ້າຫັນສິດີກວ່າເບາະ.
ຂ້ອຍວ່າ ໝ້າຈະຫ້າມປະເພນີ ຊື້ກະຕ່າຂອງຂັວນ ອັນໃຫຍ່ໆ ມີເຫຼ້ົ້າຈອນນີ້ ແລະ ຂອງຟຸ້ມເຟືອຍຕ່າງໆ ໃຫ້ບັນດາ ຜູ້ນໍາ ຂັ້ນສູງໆ ໃນຊ່ວງ ປີໃໝ່ ສາກົນ ແລະ ປີໃໝ່ລາວ ຊິບໍ່ດີກ່ອນບໍ່
ຢ້ານວ່າ ຂອງຂວັນຈາກນັກຮຽນນັກສືກສາທີ່ບໍ່ມີລາຍຮັບມັນເປັນຂອງຂວັນອັນນ້ອຍເພີ່ນເລີຍຍາກໄດ້ຈາກ
ພໍ່ແມ່ຫລືຜູ້ປົກຄອງທີ່ບໍ່ແມ່ນນັກຮຽນສືກສາ ເຫັນໂອກາດຫລືຍັງພວກເຈົ້າ
ແນວເປັນຕາຫ້າມຄືບໍ່ຫ້າມ!!!!!!!!!!
* ຫ້າມໄປເສຍຄ່າຜ່ານກ້ອງໂຕະໃຫ້ໂຮງຮຽນ.
* ຫ້າມຊື້ຂໍ້ສອບນຳນາຍຄູແລະໂຮງຮຽນ.
* ຫ້າມຊື້ໃບປະກາດປອມຈາກທາງໂຮງຮຽນ.
ເອົາສາມຫ້າມນີ້ໄປໃຊ້ກັບນັກຮຽນນັກສຶກສາລອງເບິ່ງ ຄິດວ່າ
ປະເທດຊາດຈະໄດ້ບຸກພະລາກອນທີ່ມີການສຶກສາດີ ແລະປະ
ເທດກໍຈະເລີນໄວ.
