ເມື່ອມໍ່ໆມານີ້ ມີຂ່າວວ່າ ບໍຣິສັດ Hado Group ຂອງວຽດນາມ ຈະເຂົ້າມາ ລົງທຶນສ້າງ ບ້ານຈັດສັນ ທີ່ຫລູຫລາ ຢູ່ເຂດບຶງ ໜອງທາ ເມືອງຈັນທະບູລີ ນະຄອນຫລວງ ວຽງຈັນ ທີ່ໄດ້ມີ ການຖົມດິນໄວ້ ລໍຖ້າ ຮຽບຮ້ອຍແລ້ວ ແລະ ຄາດວ່າຈະ ເລີ່ມກໍ່ສ້າງ ເປັນທາງການ ໃນປີ 2013. ຕາມ ຄໍາເວົ້າ ຂອງຊາວ ນະຄອນຫລວງ ວຽງຈັນ ຜູ້ນຶ່ງ ຕໍ່ເອເຊັຍເສຣີ. ເລົາວ່າ:

"ເຂົາຊີ່ເຮັດ ເປັນບ້ານຈັດສັນ Hado Group ເປັນບໍຣິສັດ ທີ່ຮັບ ສໍາປະທານ ທີ່ຂ້ອຍເບິ່ງໃນຜັງ ທີ່ມັນຕິດໄວ້ນະ ຂະເຈົ້າ ບໍ່ທັນໄດ້ສ້າງ ກໍາລັງ ຖົມຊາຍຢູ່ ຢູ່ໃນໜອງທາ".

ເລົາເວົ້າ ຕໍ່ໄປວ່າ ຕາມຄວາມຄິດ ສ່ວນຕົວ ຂອງລາວແລ້ວ ແມ່ນບໍ່ເຫັນພ້ອມ ໃນເຣື່ອງນີ້ ຫລືຈະກໍ່ສ້າງ ສິ່ງອື່ນໆ ໃນເຂດໜອງທາ ຍ້ອນຢ້ານ ຈະເກີດ ບັນຫາອັນ ບໍ່ດີຕ່າງໆ ຕາມມາ ພາຍຫລັງ ເພາະໜອງທາ ເຄີຍເປັນແຫລ່ງ ຮອງຮັບ ນໍ້າເສັຍ ແລະ ນໍ້າຝົນຂນາດໃຫຍ່ ໃນນະຄອນຫລວງ ວຽງຈັນ ຊຶ່ງສາມາດ ຣະບາຍ ນໍ້າອັ່ງໄດ້ດີ.

ກ່ອນໜ້ານີ້ ທາງກະຊວງ ແຜນການ ແລະ ການລົງທຶນ ຂອງລາວ ກໍເຄີຍ ໃຫ້ຂໍ້ມູນວ່າ ການຖົມດິນ ໃສ່ບຶງໜອງທາ ນັ້ນແມ່ນມີ ເປົ້າໝາຍ ສ້າງເປັນສວນ ສາທາຣະນະ ແຫລ່ງທ່ອງທ່ຽວ ຫ້າງສັພສິນຄ້າ ໂຮງແຮມ ຊຶ່ງມີຫລາຍ ບໍຣິສັດ ຂອງລາວ ແລະ ຕ່າງປະເທດ ໄດ້ເຂົ້າມາ ຈັບຈອງພື້ນທີ່ ເປັນທີ່ ຮຽບຮ້ອຍ ແລ້ວ.

ກ່ຽວກັບເຣື່ອງນີ້ ນັກຂ່າວ ເອເຊັຍເສຣີ ໄດ້ຖາມໄປຍັງ ພາກສ່ວນ ກ່ຽວຂ້ອງ ແຕ່ບໍ່ມີ ເຈົ້າໜ້າທີ່ ທ່ານໃດ ສາມາດ ໃຫ້ຂໍ້ມູນ ແລະ ລາຍລະອຽດໄດ້.