ເມື່ອວັນທີ 5 ພະຈິກຜ່ານມາທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ເນື່ອງໃນໂອກາດພິທີລົງນາມລະຫວ່າງລັດຖະບານແຫ່ງ ສປປ ລາວ ແລະ ສປ ຈີນ ໂດຍໃຫ້ກຽດເຂົ້າຮ່ວມເປັນສັກຂີພະຍານຂອງ ພະນະທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ແລະ ພະນະທ່ານ ເວິນເຈຍປາວ ນາຍົກລັດຖະມົນຕີແຫ່ງ ສປ ຈີນ ກ່ຽວກັບເອກກະສານການຮ່ວມ ມື 10 ກວ່າສະບັບ ແລະ ຫນຶ່ງ ໃນນັ້ນ 1 ສະບັບແມ່ນການເຊັນສັນຍາເຊົ່າເຮືອບິນຊະນິດ A 320 ລະຫວ່າງລັດວິສະຫະກິດການບິນລາວກັບບໍລິສັດໃຫ້ເຊົ່າເຮືອບິນໃນກຸ່ມເຄືອຂ່າຍຂອງທະນາຄານອຸດສະຫະກຳ ແລະ ການຄ້າຂອງຈີນ (ICBC) ເຊິ່ງລົງນາມໂດຍ ທ່ານ ດຣ. ສົມພອນ ດວງດາລາ ຜູ້ອຳນວຍການໃຫຍ່ ລັດວິສະຫະກິດການບິນລາວ ແລະ ທ່ານ ກົງລິນ ປະທານບໍລິສັດ ICBC.
ຫລັງສຳເລັດພິທີພະນັກງານຂອງລັດວິຫະກິດການບິນລາວເປີດເຜີຍຕໍ່ທີມຂ່າວເສດຖະກິດວ່າ: ເມື່ອທ້າຍປີ 2011 ລັດວິສະຫະກິດການບິນລາວໄດ້ນຳເຂົ້າເຮືອບິນໃຫມ່ຊະນິດ ອາຍພົ່ນ A320 ຈຳນວນ 2 ລຳ ອັນໄດ້ສ້າງຄວາມພາກພູມໃຈ ແລະ ປຶ້ມປິຕິຊົມຊື່ນໃຫ້ແກ່ຄົນລາວ ພ້ອມສ້າງພາບພົດທີ່ດີ ແລະ ຄວາມເຊື່ອຫມັ້ນໃຫ້ແກ່ບັນດາລູກຄ້າຂອງສາຍການບິນແຫ່ງຊາດ ເຊິ່ງໄດ້ຮັບກຽດປະຕິບັດຖ້ຽວບິນພິເສດນຳສົ່ງການນຳຂັ້ນສູງຂອງ ສປປ ລາວ ໄປຢ້ຽມຢາມ ແລະ ເຂົ້າຮ່ວມກອງປະຊຸມຕ່າງໆໃນປະເທດຂົງເຂດພາກພື້ນອາຊີ ແລະ ປະເທດອ້ອມຂ້າງ ໂດຍສະເພາະແມ່ນໄດ້ຮັບກຽດຮັບໃຊ້ບັນດາປະມຸກລັດ ແລະ ຜູ້ແທນຂັ້ນສູງຂອງບັນດາປະເທດອາຊີ ແລະ ເອີຣົບຈຳນວນຫລາຍກວ່າ 12 ປະເທດທີ່ເດີນທາງມາຮ່ວມກອງປະຊຸມສຸດຍອດອາເຊັມຄັ້ງທີ 9 ດ້ວຍຜົນສຳເລັດອັນຈົບງາມ.
ຢ່າງໃດກໍ່ຕາມ ພະນັກງານການບິນລາວກ່າວຕື່ມວ່າ: ພາຍໃຕ້ການຊີ້ນຳ-ນຳພາຂອງພັກ ແລະ ສະຫນັບສະຫນູນຈາກລັດຖະບານແຫ່ງ ສປປ ລາວ ເຫັນວ່າຈຳນວນເຄື່ອງບິນຍັງບໍ່ທັນຕອບສະຫນອງໄດ້ກັບຄວາມຕ້ອງການຂອງຕະຫລາດ ສະນັ້ນ ເພື່ອປະຕິບັດຕາມແນວທາງນະໂຍບາຍການຫັນເປັນທັນສະໄຫມກ້າວສູ່ມາດຖານສາກົນ ແລະ ແຜນພັດທະນາຂອງລັດວິສະຫະກິດການບິນລວມເຖິງຕອບສະຫນອງຄວາມຮຽກຮ້ອງຕ້ອງການຂະຫຍາຍຕົວຂອງຂະແຫນງຄົມມະນາຄົມທາງອາກາດ, ອຸດສາຫະການກຳການທ່ຽວ ໂດຍສະເພະແມ່ນການຕອບສະຫນອງເຮືອບິນໃຫ້ພຽງພໍສຳລັບການເປີດຖ້ຽວບິນໄປຍັງກວາງໂຈ (ສປ ຈີນ), ປູຊານ (ສ.ເກົາຫລີ) ແລະ ປະເທດມຽນມາ ພ້ອມທັງກະກຽມໃສ່ ການເປີດນ່ານຟ້າເສລີໃນປີ 2015.
ລັດວິສະຫະກິດການບິນລາວຈິ່ງໄດ້ພິຈາລະນາຄົ້ນຄວ້າການເຊົ່າ-ຊື້ເຮືອບິນ A320 ເພີ່ມຂຶ້ນອີກ 2 ລຳ ເຊິ່ງເປັນເຮືອບິນໃຫມ່ອອກຈາກໂຮງງານຜະລິດຂອງແອບັສ໌ ໂດຍຄາດວ່າຈະນຳເຂົ້າລຳທີ 3 ໃນທ້າຍປີ 2012 ແລະ ຕົ້ນປີ 2013 ຈະນຳເຂົ້າລຳທີ 4 ໃນລາຄາທັງຫມົດປະມານ 40 ລ້ານໂດລາສະຫະລັດ ເຊິ່ງຫລັງຈາກສຳເລັດການນຳ ເຂົ້າເຮືອບິນທັງສອງລຳຈະເຮັດໃຫ້ການບິນລາວມີເຮືອບິນປະຈຳການທັງຫມົດ 13 ລຳ ຂະນະທີ່ປະຈຸບັນມີແລ້ວ 11 ລຳ ໃນນີ້ A 320 ມີ 2 ລຳ, ATR 5 ລຳ ແລະ MA 4 ລຳ.
ເຮັດຫຍັງໃດໝົດ ເພາະບໍແມ່ນເງີນຂອງປະເທດ ຊີຊື້ແອບັດຂະໜາດໃຫ່ຍສຸດກໍໃດ້ໃປຢືມເງີນຕ່າງປະເທດ
ຄົນທີ່ຮູ້ຈັກປະເທດຊາດມີແຕ່ເປັນໜີ້ ບໍມີຄວາມພາກພູມໃຈເຄີຍ
