Pasalao

ພິ­ທີ​ລົງ​ນາມ​ໂຄງ­ການ​ກໍ່­ສ້າງ​ຫໍ­ສະ­ໝຸດ​ແຫ່ງ​ຊາດ​ຫຼັງ​ໃໝ່ ດ້ວຍ​ການ​ແລກ­ປ່ຽນ​ກັບ​ການ​ມອບ​ຫໍ­ສະ­ໝຸດ​ແຫ່ງ​ຊາດ​ຫຼັງ​ເກົ່າ ພ້ອມ​ດ້ວຍ​ດິນ ທີ່​ຕັ້ງ​ຢູ່​ບ້ານ​ຊຽງ​ຍືນ ເມືອງ​ຈັນ­ທະ​ບູ​ລີ ລະ­ຫວ່າງ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ) ແລະ ບໍ­ລິ­ສັດ ຈິດ​ຈະ­ເລີນ ກໍ່­ສ້າງ​ຈຳ­ກັດ​ຜູ້​ດຽວ ໄດ້​ມີ​ຂຶ້ນ​ວັນ​ທີ 16 ກັນ­ຍາ 2012 ຜ່ານ​ມາ ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ນະ­ຄອນ­ຫຼວງ​ວຽງ​ຈັນ ຮ່ວມ​ລົງ​ນາມ​ຕາງ­ໜ້າ​ໃຫ້​ກະ­ຊວງ ຖວ​ທ ໂດຍ​ແມ່ນ​ທ່ານ ບົວ​ເງິນ ຊາ​ພູ​ວົງ ລັດ­ຖະ­ມົນ­ຕີ​ຊ່ວຍ​ວ່າ­ການ​ກະ­ຊວງ ຖວ​ທ ແລະ ຕາງ­ໜ້າ​ໃຫ້​ບໍ­ລິ­ສັດ​ແມ່ນ​ທ່ານ ສົມ​ຫວັງ ວົງ​ວິ­ໄລ ຜູ້­ອຳ­ນວຍ­ການ​ບໍ­ລິ­ສັດ​ຈິດ​ຈະ­ເລີນ​ກໍ່­ສ້າງ ຈຳ­ກັດ ໂດຍ​ການ​ເຂົ້າ​ຮ່ວມ​ເປັນ​ສັກ­ຂີ​ພິ­ຍານ​ຂອງ​ທ່ານ ສຈດຣ.ບໍ່​ແສງ​ຄຳ ວົງ​ດາ­ລາ ລັດ­ຖະ­ມົນ­ຕີ​ວ່າ­ການ​ກະ­ຊວງ ຖວ​ທ ມີ​ບັນ­ດາ​ຫົວ­ໜ້າ​ກົມ ແລະ ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ.

ໃນ​ການ​ລົງ​ນາມ​ຄັ້ງ​ນີ້ ແມ່ນ​ໄດ້​ແນ­ໃສ່​ໃນ​ການ​ສ້າງ​ຫໍ­ສະ­ໝຸດ​ແຫ່ງ​ຊາດ ທີ່​ໄດ້​ມາດ­ຕະ­ຖານ ແລະ ຮັບ­ປະ­ກັນ​ຄວາມ​ປອດ​ໄພ​ທາງ​ດ້ານ​ການ​ປົກ​ປັກ​ຮັກ­ສາ​ເອ­ກະ­ສານ​ຂອງ​ຊາດ ແລະ ການ​ບໍ­ລິ­ການ​ທີ່​ກວ້າງ­ຂວາງ​ໃຫ້​ແກ່​ປະ­ຊາ­ຊົນ​ໄດ້​ເຂົ້າ​ເຖິງ ໂດຍ​ກະ­ຊວງ ຖວ​ທ ໄດ້​ເຫັນ​ດີ​ໃຫ້​ບໍ­ລິ­ສັດ​ຈິດ​ຈະ­ເລີນ​ກໍ່­ສ້າງ ເປັນ​ຜູ້​ຮັບ​ເໝົາ​ກໍ່­ສ້າງ​ຫໍ­ສະ­ໝຸດ​ແຫ່ງ​ຊາດ​ຫຼັງ​ໃໝ່ ຕາມ​ການ​ອອກ​ແບບ​ທີ່​ທັງ​ສອງ​ຝ່າຍ​ເຫັນ​ດີ​ນຳ​ກັນ ຊຶ່ງ​ຫໍ­ສະ­ໝຸດ​ແຫ່ງ​ຊາດ​ຫຼັງ​ໃໝ່ ແມ່ນ​ມີ​ເນື້ອ­ທີ່​ດິນ​ທັງ​ໝົດ 11.786 ຕາ​ແມັດ ຕັ້ງ​ຢູ່​ບ້ານ​ສີ­ວິ­ໄລ ເມືອງ​ໄຊ​ເຊດ​ຖາ ມູນ​ຄ່າ​ການ​ກໍ່­ສ້າງ 5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 40 ຕື້​ກີບ ໂຄງ­ການ​ດັ່ງ­ກ່າວ​ເປັນ​ຮູບ​ແບບ​ແລກ­ປ່ຽນ​ກັບ​ຫໍ­ສະ­ໝຸດ​ແຫ່ງ​ຊາດ​ຫຼັງ​ເກົ່າ ທີ່​ມີ​ເນື້ອ­ທີ່​ດິນ​ທັງ​ໝົດ 3.362 ຕາ​ແມັດ ແລະ ການ​ດຳ­ເນີນ​ໂຄງ­ການ​ຈະ​ໃຊ້​ເວ­ລາ 24 ເດືອນ​ໃຫ້​ສຳ­ເລັດ ນັບ​ແຕ່​ມື້​ເຊັນ​ສັນ​ເປັນ­ຕົ້ນ​ໄປ.

http://www.vientianemai.net/teen/khao/1/7509