(ຂປລ) ເກີດເຫດໄຟໄໝ້ໂຮງງານຜະລິດ ແລະ ປະກອບລົດຈັກຢິນຊີງໃນເຂດບ້ານດົງຈອງ ເມືອງໄຊເສດຖາ ນະຄອນຫລວງໃນຕອນເຊົ້າຂອງວັນທີ 12 ມິຖຸນາ 2012 ໄດ້ສ້າງຕົກໃຈ ແລະ ແຕກຕື່ນໃຫ້ປະຊາຊົນ ແລະ ຜູ້ປະກອບການທີ່ອາໃສຢູ່ເຂດດັ່ງກ່າວບໍ່ໜ້ອຍ ອັນເນື່ອງຈາກວ່າເຂດທີ່ເກີດໄຟໄໝ້ນັ້ນ ຢູ່ໃກ້ ກັບສາງເກັບນ້ຳມັນຂອງບໍລິສັດລັດວິສາຫະກິດນ້ຳມັນເຊື້ອໄຟລາວພຽງ 300 ແມັດເທົ່ານັ້ນ.
ກົມຕຳຫລວດສະກັດກັ້ນ ແລະ ຕ້ານອັກຄີໄພ ກະຊວງປອ້ງກັນຄວາມສະຫງົບໄດ້ເປີດເຜີຍຕໍ່ນັກຂ່າວສຳນັກຂ່າວສານປະເທດລາວ ໃນວັນທີ 12 ມິຖຸນາ 2012 ນີ້ວ່າ: ໃນຕອນເຊົ້າປະມານ 7 ໂມງ 40 ນາທີ ຂອງວັນທີ 12 ມິຖຸນາ 2012 ທາງໂຮງງານຜະລິດ ແລະ ປະກອບລົດຈັກຢິນຊີດົງຈອງ ໄດ້ແຈ້ງໃຫ້ທາງເຈົ້າໜ້າ ທີ່ສະເພາະກິດຊາບວ່າ ໄດ້ເກີດໄຟໃໝ້ຢູ່ໃນໂຮງງານດັ່ງກ່າວ ທີ່ເປັນບ່ອນເກັບມ້ຽນອາໄຫລ່ລົດຈັກປະເພດເສື້ອລົດຈັກ, ຕາສັນຍານ ແລະ ອຸປະກອນ ຕ່າງໆທີ່ເປັນຢາງ ເຊິ່ງກໍ່ໃຫ້ເກີດເປັນເຊື້ອໄຟລຸກລາມຢ່າງກະທັນ ແຕ່ໂຊກດີບໍ່ມີຜູ້ໃດເສຍຊີວິດ ແລະ ໄດ້ຮັບບາດເຈັບ ຍ້ອນວ່າເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານອັກຄີໄພໄດ້ລະດົມກຳລັງພ້ອມອຸປະກອນລົດດັບໄຟເຂົ້າມາເຖິງພື້ນທີ່ເກີດເຫດທັນເຫດການ ຊຶ່ງສາມາດດັບໄຟໄດ້ສຳເລັດ.
ທ້າວ ອ້າຍ ຜູ້ທີ່ເປັນພະນັກງານທີ່ເຮັດວຽກໃນໂຮງງານຜະລິດ ແລະ ປະກອບລົດຈັກຢິນຊີງດົງຈອງ ໄດ້ໃຫ້ປາກຄຳຕໍ່ເຈົ້າໜ້າທີ່ສະເພາະກິດ ຈາກກົມຕຳຫລວດ ສືບສວນ-ສອບສວນ ໃຫ້ຊາບວ່າ: ໄຟໄດ້ເກີດຂຶ້ນພາຍໃນສ້າງເກັບມ້ຽນອາໄຫລ່ລົດຈັກຢິນຊີງ ຈາກເຫດທີ່ມີພະນັກງານຄົນໜຶ່ງໄດ້ໃຊ້ທູບຈູດເຫລັກ ທີ່ໃຊ້ເປັນ ຢ່ວງຫລືຂໍເກາະພັດລົມໃສ່ຝາສາງ ແຕ່ສິ່ງບໍ່ຄາດຄິດໄດ້ເກີດຂຶ້ນຍ້ອນປະກາຍໄຟນັ້ນໄດ້ເຕັ້ນໃສ່ວັດຖຸ ຫລື ອາໄຫລ່ທີ່ເປັນຢ່າງ ເຊິ່ງໄດ້ກໍ່ໃຫ້ເກີດແປວໄຟລຸກ ລາມຢ່າງກະທັນຫັນ ພ້ອມດຽວກັນນັ້ນ ໃນໂຮງງານຜະລິດ ແລະ ປະກອບລົດຈັກຢິນຊີງດົງຈອງດັ່ງກ່າວ ຍັງມີຖັງບັນຈຸທິນເນີຈຳນວນຫລາຍທີ່ເກັບໄວ້ໃກ້ກັບ ບ່ອນເກີດເຫດປະມານ 10 ແມັດເທົ່ານັ້ນ ບັນຫາດັ່ງກ່າວນີ້ ເຮັດໃຫ້ເຈົ້າໜ້າທີ່ຕອ້ງໄດ້ລະດົມກຳລັງຂົນ ແລະ ລຳລຽງວັດຖຸໄວໄຟອອກຈາກສະຖານທີ່ເກີດເຫດ ຢ່າງວ່ອງໄວ.
ເຈົ້າໜ້າທີ່ຕຳຫລວດຈາກ ກົມຕຳຫລວດສະກັດກັ້ນ ແລະ ຕ້ານອັກຄີໄພ ກະຊວງປອ້ງກັນຄວາມສະຫງົບຍັງໄດ້ເປີດເຜີຍຕື່ມອີກວ່າ: ບ່ອນທີ່ເກີດໄຟໃໝ້ນັ້ນແມ່ນ ຢູ່ໃກ້ກັບສາງເກັບນ້ຳມັນເຊື້ອໄຟ ຂອງລັດວິສາຫະກິດນ້ຳມັນເຊື້ອໄຟລາວປະມານ 300 ແມັດ ອັນໄດ້ສ້າງຄວາມວິຕົກກັງວົນໃຈໃຫ້ເຈົ້າໜ້າທີ່ ແລະ ປະຊາຊົນ ທີ່ອາໃສຢູ່ເຂດນັ້ນບໍ່ໜ້ອຍ ເພາະຢ້ານແປວໄຟລຸກລາມໄປເຖິງເຂດດັ່ງກ່າວ ສະນັ້ນ ຈິ່ງໄດ້ລະດົມກຳລັງທະຫານ, ຕຳຫລວດ ແລະ ຊາວບ້ານເຂົ້າມາມີ ສ່ວນຮ່ວມສະກັດກັ້ນໄດ້ທັນເຫດການ.
ສ່ວນຄວາມເສຍຫາຍຄັ້ງນີ້ເຈົ້າໜ້າທີ່ບໍ່ສາມາດປະເມີນໄດ້ລະອຽດ ແລະ ກຳລັງສືບສວນສາຍເຫດຈາກໄຟໄໝ້ຄັ້ງນີ້ເພາະຄວາມເສຍຫາຍເປັນວົງກວ້າງ.
