Pasalao

*(ຂປລ) ລະເບີດເວລາຫລືລູກບົ່ມທີ່ມີນ້ຳຫນັກ 250 ກິໂລກຼາມທີ່ພົບເຫັນຢູ່ບ້ານອຸດົມ ເມືອງຄຳເກີດ ແຂວງບໍລິຄຳໄຊ ໄດ້ສ້າງບັນຫາຫລາຍຢ່າງ ໃຫ້ແກ່ຊາວ ເມືອງຄຳເກີດ ໂດຍສະເພາະແມ່ນປະຊາຊົນເຂດບ້ານອຸດົມໃນລັດສະຫມີ 2 ກິໂລແມັດ. ເພາະວ່າລະເບີດດັ່ງ ກ່າວຖືກກະທົບ ແລະ ພົບເຫັນໃນວັນທີ 3 ມັງກອນ 2012 ອາດລະເບີດຂຶ້ນພາຍໃນວັນທີ 16 ມັງກອນລົງມາຖ້າບໍ່ໄດ້ຮັບການແກ້ໄຂ ຫລື ເຄື່ອນຍ້າຍ.

ຕາມບົດລາຍງານຂອງອົງການຮ່ວມໃຈບໍລິການສາກົນໂຊດີປະຈຳ ສປປ ລາວ ລະບຸວ່າໃນວັນທີ 3 ມັງກອນຜ່ານມານີ້ ພະນັກງານຂັບລົດຈົກດິນຂອງ ບໍລິສັດ ເພັດສະຫມອນກໍ່ສ້າງຂົວ-ທາງຈຳກັດ ໄດ້ຂຸດພົບເຫັນ ລູກລະເບີດ UXO (Bomb GP 500 Lbs USA made) ນ້ຳຫນັກລວມ 250 ກິໂລກຼາມ, ລັດສະຫນີ ການທຳລາຍ 2 ກິໂລແມັດ, ລະເບີດດັ່ງກ່າວແມ່ນພົບຢູ່ຕໍ່ຫນ້າວັດບ້ານອຸດົມ ເມືອງຄຳເກີດ ແຂວງບໍລິຄຳໄຊ. ພາຍຫລັງຊ່ຽວຊານ ດ້ານລະເບີດປະຈຳ ໂຄງການໂຊດີ 2 ທ່ານຄື: ທ່ານ ຣອບບີ ດີຮົນ ແລະທ່ານ ຢອກ ອີມບຣາຮຳ ໄດ້ກວດສອບແລ້ວພົບວ່າເປັນລະເບີດເວລາຟິວ (ແກັບຫົວ) M103 ແລະ ຟິວ (ແກັບຫົວ) M123, ລະບົບທຳງານກົນ ໄກເວລາໂດຍໃຊ້ສານເຄມີເປັນຕົວເຊື່ອມໃນການເຜົາໄຫມ້ພາຍຫລັງທີ່ຖືກກະທົບ. ລະເບີດດັ່ງ ກ່າວຫາກມີການລົບກວນໂດຍການ ເຄື່ອນຍ້າຍທີ່ມີການກະທົບຈະເກີດການຫ້າງໂດຍທັນທີ. ສະນັ້ນປັດຈຸບັນນີ້ທາງໂຄງການ ພວກເຮົາໄດ້ສ້າງກຳແພງກັ້ນ ດ້ວຍເປົາດິນຊາຍປະມານ 4.000 ເປົາ ແລະ ປະສານງານກັບຄະນະຊີ້ນຳຂັ້ນເມືອງເພື່ອຮັບຮູ້ ເຖິງໄພອັນຕະລາຍ ແລະ ກະກຽມເຄື່ອນຍ້າຍປະຊາຊົນ ໄປບ່ອນທີ່ປອດໄພ. ຖ້າລະເບີດດັ່ງກ່າວທຳງານ ແມ່ນມີ ຄວາມແຮງລ້າງຜານໄປເຖິງ 2 ກິໂລແມັດ ບໍ່ວ່າຄົນ, ອາຄານ ແລະ ຊັບສິນ ສິ່ງຂອງອື່ນໆ ປະຈຸບັນນີ້ທາງໂຄງການ ໄດ້ປະສານງານຂໍຄວາມຊ່ວຍເຫລືອ ຈາກໂຄງການເຈມັດສ ໂດຍຜ່ານທາງຄຄຊເພື່ອນຳເຄື່ອງ ມືທີ່ທັນສະໄຫມ ມາຊ່ວຍເຫລືອ ໃນການກຳຈັດລະເບີດລູກນີ້ໂດຍບໍ່ໃຫ້ມີການລະເບີດແຮງສູງ ແລະ ປ້ອງກັນຄວາມເສຍຫາຍໃຫ້ໄດ້ ສູງສຸດເທົ່າທີຄວນ.

ໃນວັນທີ 5 ມັງກອນ 2012 ໄດ້ປະຊຸມສຸກເສີນທີ່ຫ້ອງວ່າການປົກຄອງເມືອງເພື່ອລາຍງານການພົບເຫັນລູກ ລະເບີດ ແລະ ລະບົບກົນໄກການທຳງານ ຂອງລູກບົມ ເຊິ່ງພາຍຫລັງການວິເຄາະໄດ້ຮູ້ວ່າບົມຫນ່ວຍດັ່ງກ່າວ ແມ່ນໄດ້ຜະລິດຂຶ້ນໃນໄລຍະສົງຄາມໂລກຄັ້ງທ່ີສອງ ເປັນບົມເວລາທີ່ມີກົນໄກການທຳ ງານດ້ວຍສານເຄມີເປັນຕົວເຊື່ອມໃນການເຜົາໄຫມ້ເມື່ອມີການກະທົບ. ໂດຍອີງໃສ່ມາດຕາຖານດ້ານເຕັກນິກລູກບົມອາດສາມາດແຕກຂຶ້ນໄດ້ພາຍໃນ 144 ຊົ່ວໂມງ ເລີ່ມຈາກມີການກະທົບ. ສະນັ້ນທາງຫົວຫນ້າໂຄງການໂຊດີຈຶ່ງໄດ້ອອກຄຳສັ່ງໃຫ້ມີການລໍຖ້າໂດຍບໍ່ອະນຸຍາດໃຫ້ບຸກຄົນໃດເຂົ້າໄປໃນບໍລິ ເວນນັ້ນ ຈົນເຖິງວັນທີ 16 ມັງກອນ 2012 ເພື່ອໃຫ້ຫມັ້ນໃຈວ່າລູກບົມ ດັ່ງກ່າວ ແມ່ນຍັງບໍ່ມີການທຳງານ. ນອກຈາກນີ້ຍັງໄດ້ແນະນຳຂັ້ນຕອນຂອງການປ້ອງ ກັນຄວາມປອດໄພພ້ອມ ທັງໄດ້ແນະນຳກ່ຽວກັບຜົນກະທົບທີ່ອາດຈະເກີດຂຶ້ນຕໍ່ຊີວິດ ແລະ ຊັບສິນຂອງປະຊາຊົນ ແລະ ໄດ້ສັ່ງປິດໂຮງຮຽນຈຳນວນ 3 ຫລັງ ທີ່ຢູ່ໃກ້ຄຽງບໍລິເວນນັ້ນ. ປະຈຸບັນນີ້ທາງພາກສ່ວນເມືອງແມ່ນໄດ້ເອົາໃຈໃສສົ່ງກຳລັງຮັກສາ ຄວາມປອດໄພຈາກພາກສ່ວນ ປກສ ແລະ ກອງທັບ ລົງເວນຍາມເພື່ອບໍ່ໃຫ້ປະຊາຊົນ ຜ່ານເຂົ້າໃກ້ບໍລິເວນທີ່ລະເບີດຢູ່ 24 ຊົ່ວໂມງ ນອກຈາກນັ້ນຫນ່ວຍງານໂຄສະນາສຶກສາຂອງໂຄງການໂຊດີກໍໄດ້ລົງເຄື່ອນ ໄຫວແນະນຳຫ້ອງການ ປກສ, ທະຫານເມືອງ ແລະ ປະຊາຊົນບ້ານອຸດົມ ເພື່ອແຈ້ງການເລື່ອງເຄ່ືອນຍ້າຍປະຊາຊົນອອກຈາກ ພື້ນທີ່ ທີ່ຢູ່ໃກ້ຄຽງ ຈົນກ່ວາມີຄວາມປອດໄພແລ້ວຈຶ່ງອະນຸຍາດໃຫ້ປະຊາຊົນເຂົ້າມາພື້ນທີ່ເດີມ ຕາມກຳນົດທາງວິຊາການ ແມ່ນເລີ່ມແຕ່ມີການກະທົບຄືວັນທີ 3/1/2012-16/1/2012 ປັດຈຸບັນນີ້ໄດ້ເຄື່ອນຍ້າຍປະຊາຊົນ ແລະ ພະສົງ ສຳມະເນນ ອອກຈາກຂອບເຂດດັ່ງກ່າວໄດ້ຫລາຍຄອບຄົວແລ້ວ./.