ເພື່ອເປັນການຂ່ຳນັບຮັບຕ້ອນວັນຊາດທີ 2 ທັນວາ ຄົບຮອບ 36 ປີ ທີ່ຈະມາເຖິງນີ້ ທະນາຄານ ແຫ່ງ ສປປ ລາວ ໄດ້ຜະລິດທະນາບັດ 2.000 ກີບໃໝ່ຂຶ້ນ ເຊິ່ງທະນາບັດດັັ່ງກ່າວຈະໄດ້ເລີ່ມນຳໃຊ້ ແຕ່ວັນທີ 1 ທັນວາ 2011 ເປັນຕົ້ນໄປ.
ພິທີຖະແຫຼງຂ່າວກ່ຽວກັບການນຳໃຊ້ທະນາບັດ 2.000 ກີບໃໝ່ ໄດ້ຈັດຂຶ້ນຕອນບ່າຍວັນທີ 28 ພະຈິກ 2011 ທີ່ທະນາຄານ ແຫ່ງ ສປປ ລາວ ໂດຍທ່ານ ສຸພັດ ໂຄດໂຍທາ ຫົວໜ້າກົມເງິນຕາທະນາຄານ ແຫ່ງ ສປປ ລາວ ໄດ້ກ່າວວ່າ: ການນຳເອົາທະນາບັດ 2.000 ກີບໃໝ່ ອອກຈໍລະຈອນ ແມ່ນເພື່ອປັບປຸງຄຸນນະພາບຂອງໃບເງິນ ໃນຂອດຈໍລະຈອນໃຫ້ດີຂຶ້ນ ສົ່ງເສີມການນຳໃຊ້ເງິນກີບໃຫ້ກ້ວາງຂວາງ ແລະ ຕອບສະໜອງໄດ້ຄວາມຮຽກຮ້ອງຕ້ອງການຂອງສັງຄົມ ທີ່ມີການຂະຫຍາຍຕົວຢ່າງເຂັ້ມແຂງ ແລະ ຕໍ່ເນື່ອງ ໃນປັດຈຸບັນ.
ທະນາບັດ 2.000 ກີບໃໝ່ ແມ່ນສາມາດໃຊ້ຄຽງຄູ່ກັບທະນາບັດ 2.000 ເກົ່າເປັນປົກກະຕິ ມີຄຸນຄ່າເທົ່າກັນ ທະນາບັດ 2.000 ກີບໃໝ່ ມີຄວາມກ້ວາງ 66 ມມ ແລະ ຍາວ 142 ມມ ໄດ້ຖືກຜະລິດດ້ວຍເຈ້ຍທີ່ມີຄຸນນະພາບສູງ ປັບປຸງເສັ້ນລວດລາຍ ແລະ ສີສັນ ລວມເຖິງຍົກລະດັບເຕັກນິກດ້ານການພິມ ປ້ອງກັນການປອມແປງໄດ້ດີຍິ່ງຂຶ້ນ.
