ເປັນເລື່ອງທີ່ໜ້າພາກພູມໃຈ ທີ່ການສຶກສາບ້ານເຮົາໄດ້ຮັບການເອົາໃຈໃສ່ຈາກພັກ-ລັດຖະບານ ກໍຄືກະຊວງສຶກສາທິການ-ກີລາ ເຮັດໃຫ້ຂົງເຂດວຽກງານພັດທະນາຊັບພະຍາກອນມະນຸດ ໄດ້ຮັບການຂະຫຍາຍຕົວຂຶ້ນເປັນກ້າວໆ ຈາກມີພຽງເທົ່າໃດວິຊາ ມາເປັນຫຼາຍຂະແໜງການ ຫຼາຍໆວິຊາ ຈາກມີພຽງເທົ່າໃດສະຖາບັນ ກໍມີສະຖາບັນການສຶກສາຫຼາຍໆແຫ່ງຖືກສ້າງຕັ້ງຂຶ້ນມາ ບໍ່ວ່າຈະເປັນພາກລັດ ຫຼື ພາກເອກະຊົນ ຊຶ່ງຖືໄດ້ວ່າແມ່ນຖືກຕ້ອງ ສອດຄ່ອງກັບແນວທາງຂອງພັກ ໃນການພັດທະນາຊັບພະຍາກອນມະນຸດຢູ່ປະເທດເຮົາ ເນື່ອງຈາກວ່າການພັດທະນາຊັບພະຍາກອນມະນຸດ ແມ່ນເປັນປັດໄຈພື້ນຖານໃນການພັດທະນາຂະແໜງການຕ່າງໆ ຊຶ່ງໃນສົກຮຽນ 2010-2011 ມີສະຖາບັນການສຶກສາຊັ້ນສູງທັງພາກລັດ- ເອກະຊົນ ລວມທັງມະຫາວິທະຍາໄລ ມີທັງໝົດ 153 ແຫ່ງ ມະຫາວິທະຍາໄລ 4 ແຫ່ງ.
ຄຽງຄູ່ກັນກັບການຂະຫຍາຍຕົວດັ່ງກ່າວນັ້ນ ກໍເປັນໜ້າເສຍດາຍ ທີ່ການເຂົ້າຮຽນຂອງບັນດານັກສຶກສາ ແມ່ນຍັງບໍ່ຖືກເປົ້າ ກໍຄືຄວາມຕ້ອງການຂອງຕະຫຼາດແຮງງານ ເພາະສ່ວນຫຼາຍແມ່ນພາກັນເຮີ່ໄປຮຽນຢູ່ສະຖາບັນນັ້ນ ສະຖາບັນນີ້ ຫຼື ພາກັນເຮີ່ເຂົ້າໃນສາຂາວິຊາທີ່ບໍ່ສອດຄ່ອງ ເຮັດໃຫ້ເກີດມີບັນຫາ ບໍ່ມີບ່ອນຮອງຮັບ ເພື່ອເຂົ້າເຮັດວຽກ ເກີດໄພວ່າງງານທີ່ອາດກ່ຽວພັນໄປເຖິງການເກີດມີປະກົດການຫຍໍ້ທໍ້ໃນສັງຄົມ ເນື່ອງຈາກວ່ານັກສຶກສາຮຽນຈົບໃນແຕ່ລະປີ ແມ່ນມີຈຳນວນເພີ່ມຂຶ້ນ ຊຶ່ງໃນສົກຮຽນ 2010-2011 ມີນັກສຶກສາຈົບຈາກມະຫາວິທະຍາໄລ ວິທະຍາໄລ ທັງພາກລັດ ແລະ ເອກະຊົນ ແລະ ລະດັບອື່ນໆເປັນຈຳນວນຫຼວງຫຼາຍ ຫຼາຍຄົນໃນສັງຄົມໄດ້ຕັ້ງຄຳຖາມວ່າ: ເປັນຫຍັງນັກສຶກສາຈົບຈາກມະຫາວິທະຍາໄລ ບໍ່ສາມາດຊອກວຽກເຮັດໄດ້ ? ຊຶ່ງຄຳຖາມດັ່ງກ່າວນັ້ນ ເປັນເລື່ອງທີ່ໜ້າໜັກໃຈຕໍ່ກັບບັນດາຜູ້ປົກຄອງ ລວມໄປເຖິງ ນັກສຶກສາທີ່ກຳລັງຕ້ອງການທົດສອບຄວາມສາມາດ ເຂົ້າໃນຂະແໜງການຕ່າງໆ ເພາະໄດ້ສົ່ງເສີມໃຫ້ລູກໄດ້ຮ່ຳຮຽນຄືບ້ານຄືເມືອງເພິ່ນ ແລ້ວກໍຍັງບໍ່ມີວຽກເຮັດງານທຳ ແລະ ນັກສຶກສາເອງກໍເສຍເວລາຮ່ຳຮຽນມາຫຼາຍປີ ແຕ່ຜົນໄດ້ມາຄືວ່າງງານ ແລ້ວຈະໂທດໃຜ ຕໍ່ກັບບັນຫາດັ່ງກ່າວ ທ່ານ ດຣ. ພັນຄຳ ວິພາວັນ ລັດຖະມົນຕີວ່າການ ກະຊວງສຶກສາທິການ-ກີລາ ໄດ້ໃຫ້ສຳພາດຕໍ່ສະຖານີໂທລະພາບລາວ ຊ່ອງ 3 ໃນວັນທີ 13 ກັນຍາຜ່ານມາ ທີ່ມີບາງຕອນທ່ານໄດ້ກ່າວວ່າ: ກະຊວງສຶກສາທິການ-ກີລາ ບໍ່ມີສິດກຳນົດໃຫ້ນັກສຶກສາໄດ້ເຮັດວຽກຢູ່ແຫ່ງນັ້ນ ແຫ່ງນີ້ ເພາະກະຊວງສຶກສາທິການ-ກີລາ ມີພຽງສ້າງໃຫ້ມີສະຖາບັນໃນການສຶກສາ ເພື່ອພັດທະນາຊັບພະຍາກອນມະນຸດເທົ່ານັ້ນ ສຳລັບຄຳຖາມທີ່ກ່າວມານັ້ນ ແມ່ນຕ້ອງໄດ້ເບິ່ງຄືນໃໝ່ວ່າ ສາຂາວິຊາທີ່ນັກສຶກສາຫຼາຍຄົນຮຽນມານັ້ນ ແມ່ນສອດຄ່ອງແລ້ວບໍ ກັບຄວາມຮຽກຮ້ອງຕ້ອງການຂອງຕະຫຼາດແຮງງານ.
ທັງໝົດທີ່ກ່າວມານັ້ນ ຫຼາຍໆຄົນຕ້ອງໄດ້ເອົາໃຈໃສ່ຕື່ມ ໃນການທີ່ຈະສົ່ງລູກຫຼານຂອງຕົນເຂົ້າຮຽນ ຕ້ອງມີການສຶກສາເບິ່ງວ່າ ເໝາະສົມແລ້ວບໍ ກັບການພັດທະນາໃນປັດຈຸບັນ ບໍ່ແມ່ນວ່າຈະເຮີ່ໄປຮຽນຕາມກະແສສັງຄົມ ຈົບມາແລ້ວພັດບໍ່ມີວຽກເຮັດງານທຳ.
