ບໍ່ເຕັນແດນຄໍາ ຕ້ອງການນັກລົງທຶນ

ເມືອງ ບໍ່ເຕັນ ແດນຄໍາ ຈ້າງ ບໍຣິສັດ ສິງກະໂປ ເພື່ອຊ່ວຍ ຊອກຫາ ນັກລົງທຶນ ຣາຍໃໝ່ ເຂົ້າໄປ ພັທນາ ປັບປຸງ ໃຫ້ ດີຂຶ້ນ.

ບໍ່ເຕັນ ແດນຄໍາ ແຂວງ ຫລວງນໍ້າທາ ຕິດກັບ ຊາຍແດນ ຈີນ ໄດ້ຈ້າງ ບໍຣິສັດ ສິງກະໂປ ໃຫ້ຊ່ວຍ ພັທນາ ແລະ ນໍາເອົາ ນັກລົງທຶນ ຣາຍໃໝ່ ເຂົ້າມາ ປັບປຸງ ປ່ຽນໂສມໜ້າ ໃໝ່ ໃຫ້ດີຂຶ້ນ. ຕາມຄໍາເວົ້າ ຂອງ ທ່ານ Kan Goh ຫົວໜ້າ ຝ່າຍ ປະຕິບັດ ງານ ຂອງ ບໍຣິສັດ ສິງກະໂປ ນັ້ນມີ ເປົ້າໝາຍ ທີ່ຈະດັດແປງ ບໍ່ເຕັນ ແດນຄໍາ ໃຫ້ ທັນສມັຍ ໃຫ້ເປັນສູນ ການຄ້າ ຫລາຍຂຶ້ນ. 

ທ່ານວ່າ ການພັທນາ ໃນເວລານີ້ ຢູ່ໃນ ຊ່ວງຢຸດ ຊົ່ວຄາວ, ກໍາລັງ ພຍາຍາມ ເຮັດໃຫ້ ສະອາດ ແລະ ງາມຕາ, ເພາະຕ້ອງການ ນັກລົງທຶນ ມາຕັ້ງ ຮ້ານຄ້າ ປອດພາສີ ແລະ ໂຮງແຮມ ໃຫ້ ຫລາຍຂຶ້ນ. ນັ້ນຄື ແຜນການ ເບື້ອງຕົ້ນ. 

ເຈົ້າໜ້າທີ່ ທ່ານນຶ່ງ ທີ່ບໍ່ເຕັນ ກ່າວວ່າ ໂຮງກາຊີໂນ ຕາມແຜນການ ເບື້ອງຕົ້ນ ເປັນພຽງ ພາກສ່ວນນ້ອຍໆ ໃນເປົ້າໝາຍ ຂອງ ພວກທ່ານ, ເສັ້ນທາງ ຣົດໄຟ ຜ່ານໃກ້ເຂດ ບໍ່ເຕັນ ມູລຄ່າ 7 ພັນລ້ານ ໂດລາ ສະຫະຣັດ ຈາກ ຂຸນມິງ ເຖິງ ບາງກອກ ຊຶ່ງຈີນ ຈະເປັນຜູ້ ລົງທຶນ ນັ້ນ ຈະເປັນທາງ ເຂົ້າສູ່ ອາຊຽນ.

ໂຮງກາຊີໂນ ເວລານີ້ ຢູ່ໃນສະພາບ ເກືອບປິດລົງ ຊົ່ວຄາວ ເພື່ອປັບປຸງ ແລະ ວາງແຜນໃໝ່ ນັ້ນ ກໍສາມາດ ກັບມາມີ ຕື່ມອີກ ຢ່າງແນ່ນອນ. ຫລາຍຄົນ ຄິດວ່າ ບໍ່ເຕັນ ທັງ ຕຶກ ອາຄານ ແລະ ທີ່ດິນ ຊຶ່ງ ຣັຖບານ ລາວ ສັມປະທານ ໃຫ້ ນັກລົງທຶນ ຈາກຈີນ ເປັນເວລາ ເຖິງ 99 ປີ ນັ້ນ ປາກົດວ່າ ຈະຖືກ ຂາຍຕໍ່. ປັຈຈຸບັນ ກໍມີ ນັກລົງທຶນ ຈາກຈີນ ເຊັ່ນກັນ ທີ່ສົນໃຈ ຈະຊື້. ບໍ່ເຕັນ ອາຈກາຍເປັນ ປ່າດົງ ຄືນອີກ ຫາກບໍ່ ນັກ ລົງທຶນ ຣາຍໃໝ່ ເຂົ້າມາ ພັທນາ.

RFA