Pasalao

 ລັດ­ຖະ­ບານ​ວາງ​ແຜນທຸ່ມ​ເງິນ​ກວ່າ 2 ພັນ 2 ຕື້​ກີບ ຕາມ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ​ຄັ້ງ​ທີ 7 (2011-2015) ໂດຍໄດ້​ກຳ­ນົດ​ໂຄງການ​ລົງ​ທຶນ​ກ​ຫລາຍ​ໂຄງ­ການເປັນ­ຕົ້ນ ໂຄງ­ການ​ເສັ້ນ­ທາງ​ລົດໄຟ​ເຊື່ອມ​ຕໍ່ລາວ-ຈີນ ເຊິ່ງ​ເປັນ ໂຄງ­ການ​ໃຫຍ່​ລະ­ດັບ​ປະ­ຫວັດສາດ. ເປັນ​ການ​ຮ່ວມ​ມື​ກັນ​ລະຫວ່າງ ສປປ ລາວ ແລະ ສປ ຈີນ ດ້ວຍ​ມູນ​ຄ່າ​ການ​ລົງ­ທຶນ​ປະ­ມານ 7 ຕື້​ໂດ​ລາ​ສະ­ຫະ­ລັດ.

   ທ່ານ ດຣ. ສິນ​ລະ​ວົງ ຄຸດ​ໄພທູນ ລັດ­ຖະ­ມົນ­ຕີ​ວ່າ­ການ​ກະ­ຊວງແຜນ­ການ ແລະ ການ​ລົງ­ທຶນ​ໄດ້ເປີດ­ເຜີຍ​ວ່າ: ເພື່ອ​ຕອບ​ສະ­ຫນອງໂຄງ­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ​ຄັ້ງ​ທີ 7 ກໍ່​ຄື ແຕ່​ປີ​ນີ້ຮອດ​ປີ 2015 ສປປ ລາວ ໄດ້ວາງ​ເປົ້າ​ຫມາຍ​ການ​ພັດ­ທະ­ນາເສດ­ຖະ­ກິດ-ສັງ­ຄົມ ຄັ້ງ​ສຳ­ຄັນ; ໃນ​ນັ້ນ ມີ​ຫລາຍ​ໂຄງ­ການ​ໃຫຍ່ລະ­ດັບ​ຊາດ ເຊິ່ງ​ປະ­ຈຸ​ບັນ​ທາງກະ­ຊວງ​ກຳ­ລັງ​ຄົ້ນ­ຄວ້າ​ພິ​ຈາ­ລະນາ; ເປັນ­ຕົ້ນ​ແມ່ນ​ໂຄງ­ການ​ເສັ້ນທາງ​ລົດ­ໄຟ​ເຊື່ອມ​ຕໍ່​ແຕ່​ຊາຍ​ແດນຈີນ-ລາວ ເຊິ່ງ​ນີ້​ຖື​ເປັນ​ໂຄງ­ການສຳ­ຄັນ​ຄັ້ງ​ປະ­ຫວັດ­ສາດ​ຂອງການ​ຮ່ວມ​ມື​ກັນ​ລະ​ຫວ່າງ​ສປປ ລາວ ແລະ ສປ​ຈີນ​ດ້ວຍ​ຮູບ​ແບບການ​ຖື​ຮຸ້ນ 70%, 30% ລວມມູນ​ຄ່າ​ຂອງ​ໂຄງ­ການ​ທັງ​ຫມົດປະ­ມານ 7 ຕື້​ໂດ​ລາ​ສະ­ຫະ­ລັດ, ທ່ານລັດຖະ​ມົນ­ຕີ​ ກ່າວ.

   ທ່ານ​ກ່າວ​ຕື່ມ​ອີ​ກວ່າ: ໃນ​ຈຳນວນ​ຮຸ້ນ 30% ທີ່​ຝ່າຍ​ລາວ​ຖືຮຸ້ນ, ລັດ­ຖະ­ບານ​ຈຳ­ເປັນ​ຕ້ອງ​ໄດ້ທຸ່ມ​ທຶນ​ປະ­ມານ 2 ພັນ 2 ຕື້​ກວ່າກີບ ເພື່ອ​ຕອບ​ສະ­ຫນອງ​ແຜນການ​ພັດ­ທະ­ນາ​ດັ່ງ­ກ່າວ ໃນ​ນັ້ນ ຕ້ອງ​ມີ​ເມັດ​ເງິນ​ຈຳ­ນວນ 7 ຮ້ອຍລ້ານ​ໂດ​ລາ​ສະ­ຫະ­ລັດ ເພື່ອ​ໃຊ້ຈ່າຍ​ໂດຍ​ສະ­ເພາະ; ໂດຍ​ເບື້ອງຕົ້ນ​ໄດ້​ກຳ­ນົດ​ຢ່າງ​ຫນ້ອຍ​ສາມລາຍ​ຈ່າຍ​ເຊັ່ນ: ການ​ຊົດ​ເຊີຍ​ຄ່າເວນ​ຄືນ​ທີ່​ດິນ​ຈຸດ​ທີ່​ຈະ​ສ້າງ​ສະຖານ​ທີ່​ຖື​ເປັນ­ຄວາມ​ຮັບ­ຜິດ­ຊອບຂອງ​ຝ່າຍ​ລາວ, ການ​ເກັບ​ກູ້​ລະເບີດ​ເນື່ອງ​ຈາກ ເປັນ­ຄວາມ​ຮັບຜິດ​ຊອບ​ສູງ​ສຸດຂອງ​ການ​ສ້າງເສັ້ນ­ທາງ​ລົດ­ໄຟ ເພື່ອ​ຮັບ­ປະ­ກັນຄວາມ​ປອດ​ໄພ ເຊິ່ງ​ຈະ​ຕ້ອງ​ໄດ້ນຳ​ໃຊ້​ທຶນ​ເປັນ​ຈຳ­ນວນ​ບໍ່​ຫນ້ອຍ ແລະ ໃນ​ປີ 2012 ກໍ່​ຈະ​ມີ​ກອງປະ­ຊຸມ​ອາ​ເຊມ ເຊິ່ງ​ຕ້ອງ­ການທຶນ​ປະ­ມານ 300 ລ້ານ​ໂດ​ລາ ເຂົ້າ​ໃນ​ການ​ສ້າງ​ສະ­ຫນາມ​ບິນ, ຫໍ​ປະ­ຊຸມ, ພັດ­ທະ­ນາ​ເຮືອນ​ພັກຂອງ​ຜູ້­ນຳ ແລະ ຍັງ​ມີ​ກອງ​ປະຊຸມ ຊີ​ແອວ​ວີ ທີ່ ສປປ ລາວ ຈະ ເປັນ​ເຈົ້າ­ພາບ​ທີ່ແຂວງ​ອັດ​ຕະ​ປື ໂດຍ​ຕ້ອງ​ໄດ້​ນຳ​ໃຊ້​ທຶນເຂົ້າ​ໃນການ​ພັດ­ທະ­ນາ​ລະ­ບົບ​ພື້ນ­ຖານໂຄງ​ລ່າງ​ທີ່​ໄດ້​ດຳ­ເນີນ​ການ​ມາ ແລ້ວ​ປະ­ມານ 30 ຕື້​ກີບ.

   ທ່ານ​ກໍ່​ໄດ້​ເນັ້ນ​ວ່າ: ສຳ­ລັບໂຄງ­ການ​ເສັ້ນ­ທາງ​ລົດ­ໄຟ​ຄັ້ງ​ນີ້ ລັດ­ຖະ­ບານ​ຈະ​ໄດ້​ຊົດ​ເຊີຍ​ຄ່າເວນ​ຄືນ​ທີ່​ດິນ​ຂອງ​ປະ­ຊາ­ຊົນ​ໃຫ້ສຳ­ເລັດ​ກ່ອນ​ຈິ່ງ​ຈະ​ລົງ­ມື​ກໍ່­ສ້າງ.

   ຄາດ​ວ່າ ຖ້າ​ເສັ້ນ­ທາງ​ລົດ­ໄຟສຳ­ເລັດ​ສົມ­ບູນ​ຈະ​ຊ່ວຍ​ຊຸກ­ຍູ້ການ​ພັດ­ທະ­ນາ​ເສດ­ຖະ­ກິດ-ສັງຄົມຂອງ​ລາວ, ຊຸກ­ຍູ້​ການ​ຮ່ວມມື​ທາງ​ດ້ານ​ເສດ­ຖະ­ກິດ​ລາວ-ຈີນ, ປະ­ກອບ­ສ່ວນ​ເຂົ້າ​ໃນ​ການ ເພີ່ມ​ທະ­ວີ​ການ​ຮ່ວມ​ມື​ລະ­ຫວ່າງອາ​ຊຽນ​ກັບ​ຈີນ, ເຮັດ​ໃຫ້ ສປປ ລາວ ເປັນ­ໃຈ​ກາງ​ເຊື່ອມ​ຕໍ່​ກັບບັນ­ດາ​ປະ­ເທດ​ອ້ອມ​ຂ້າງ​ໄດ້​ສະດວກ​ກວ່າ​ເກົ່າ.

   ສຳ­ລັບ​ລາງ​ລົດ­ໄຟ​ແມ່ນ​ກຳ ນົດ​ຕາມ​ມາດ­ຕະ­ຖານ​ສາ­ກົນ​ທີ່​ມີລວງ​ກ້ວ​າງ 1,435 ແມັດ, ແລ່ນດ້ວຍ​ກະ­ແສ​ໄຟ­ຟ້າ, ເຊິ່ງ​ເບື້ອງຕົ້ນ​ກຳ­ນົດ​ສ້າງ​ລາງ​ດຽວ ແລະ ຈະ​ຈົ່ງ​ວ່າງ​ເພື່ອ​ສ້າງ​ລາງ​ທີ 2 ໃນ​ອະ­ນາ­ຄົດ, ສາ­ມາດ​ປ້ອງ​ກັນການ​ສັ່ງ​ສະ­ເທືອນ​ຂອງ​ແຜ່ນ­ດິນໄຫວ ໃນ​ລະ­ດັບ 7 ຣິກ​ເຕີ. ການສ້າງ​ແມ່ນ​ອີງ­ໃສ່​ມາດ­ຕະ­ຖານເຕັກ­ນິກ ແລະ ເຕັກ​ໂນ​ໂລ​ຊີຂອງ ຈີນ ເຊິ່ງ​ເປັນ​ທີ່​ຍອມ­ ຮັບ​ຂອງໂລກ. ໂດຍ​ຈະ​ມີ 5 ສະ­ຖາ­ນີ​ໃຫຍ່ ຄື: ສະ­ຖາ­ນີ​ບໍ່​ເຕ່ນ, ເມືອງ​ໄຊ, ຫລວງ​ພະ​ບາງ, ວັງ​ວຽງ ແລະ ນະ­ຄອນ­ຫລວງ​ວຽງ​ຈັນ.

   ເຊິ່ງ​ຄວາມ​ຮຽກ­ຮ້ອງ​ຕ້ອງການ​ດັ່ງ­ກ່າວ​ນີ້ ໄດ້​ເລ່ງ​ທວງ​ໃຫ້ລັດ­ຖະ­ບານ​ຕ້ອງ​ຈັດ​ຫາ​ເງິນ​ງົບປະ­ມານ​ເພື່ອ​ສະ­ຫນອງ​ໂຄງ­ການ 5 ປີ​ຄັ້ງ​ທີ 7ຫລືແຜນ​ພັດ­ທະ­ນາເສດ­ຖະ­ກິດ-ສັງ­ຄົມ​ປີ 2011-2015 ບັນ­ລຸ​ຕາມ​ຄາດ­ຫມາຍ.