ຂ່າວ: ພະນອມໄພ
ໃນຊຸມປີຜ່ານມາ ຕາຫນ່າງດ້ານສາທາລະນະສຸກໄດ້ຮັບການພັດທະນາ ແລະ ຂະຫຍາຍສູ່ວົງກວ້າງເຮັດໃຫ້ຕົວເລກບຸກຄົນທີ່ມີຄວາມສ່ຽງຕໍ່ການເຈັບເປັນ ແລະ ເສຍຊີວິດຈາກພະຍາດຫລຸດລົງ, ອາຍຸຍືນສະເລ່ຍຂອງຄົນລາວລື່ນເປົ້າ 2 ປີ ຂະນະທີ່ເຂດຕົວເມືອງໃຫຍ່ຍິ່ງຫລາຍກວ່ານັ້ນ.
ອີງຕາມຂໍ້ມູນຈາກກະຊວງສາທາລະນະສຸກໃຫ້ຮູ້ວ່າ: ອາຍຸຍືນຂອງປະຊາຊົນໃນປີ 2010 ໄດ້ເພີ່ມຂຶ້ນເປັນ 65 ປີ (ເປົ້າຫມາຍທີ່ຕັ້ງໄວ້ແມ່ນ 63 ປີ), ດ້ານຕົວເມືອງໃຫຍ່ເປັນຕົ້ນແມ່ນນະຄອນຫລວງວຽງຈັນ, ຫລວງພະບາງ, ສະຫວັນນະເຂດ, ຈຳປາສັກ ແລະ ທ່າແຂກຍິ່ງມີຕົວເລກດີກວ່ານັ້ນ. ໂດຍອັດຕາການຕາຍຂອງແມ່ຍັງແຕ່ 339 ຕໍ່ 100.000 ຄົນ ຕາມ (IHME 2008), ການຕາຍຂອງເດັກຕ່ຳກວ່າ 1 ປີ ຍັງແຕ່ 49 ຕໍ່ 1.000 ຄົນ.
ປະຊາຊົນທີ່ມີຄວາມສ່ຽງກວ່າ 3 ລ້ານຄົນຕໍ່ການເປັນພະຍາດໄຂ້ຍູງໄດ້ຫລຸດລົງຈະແຈ້ງຍ້ອນມີການແຈກຢາຍມຸ້ງຍ້ອມຢາ 1 ລ້ານກວ່າດາງ; ນ້ຳສະອາດໄດ້ສະຫນອງກວມ 79,5%; ວິດຖ່າຍກວ່າ 55% ຂອງຄອບຄົວ, ໂລກເອດຍັງຢູ່ໃນລະດັບຕ່ຳ. ທຸກຄອບຄົວໄດ້ເອົາລູກ ແລະ ແມ່ມານ, ແມ່ຍິງໄວຈະເລີນພັນ ມາສັກຢາລ້ວນແຕ່ໄດ້ຮັບການສຸຂະສຶກສາຢ່າງທົ່ວເຖິງແຕ່ 73-95%.
ທ່ານ ດຣ. ປອນເມກ ດາລາລອຍ ລັດຖະມົນຕີວ່າການກະຊວງສາທາລະນະສຸກໃຫ້ຮູ້ວ່າຕົກເລກດັ່ງກ່າວແມ່ນຍ້ອນວ່າ ໃນໄລຍະຜ່ານມາ ວຽກງານສາທາລະນະສຸກໄດ້ຮັບການພັດທະນາເປັນດີຂຶ້ນ. ຄຸນນະພາບ ແລະຄວາມທັນສະໄຫມຂອງການບໍລິການຢູ່ໂຮງຫມໍໃຫຍ່ໄດ້ຂະຫຍາຍໄປຄຽງຄູ່ກັບຕາຫນ່າງບໍລິການຂັ້ນພື້ນຖານ, ລະບົບເຝົ້າລະວັງຄວບຄຸມພະຍາດເຮັດ ໃຫ້ພະຍາດຕິດຕໍ່ຮ້າຍແຮງຈຳນວນຫນຶ່ງຖືກສະກັດກັ້ນ ແລະ ບໍ່ແພ່ຂະຫຍາຍ.
ໂດຍຜ່ານມາ ໄດ້ປັບປຸງ ແລະ ພັດທະນາລະບົບສາທາລະນະສຸກໄດ້ຢ່າງທົ່ວເຖິງ ແລະ ມີຄຸນນະພາບ ເບື້ອງຕົ້ນສຸມໃສ່ສ້າງບ້ານ ແລະ ກຸ່ມບ້ານພັດທະນາ. ຮອດປີ 2010 ການສ້າງບ້ານສາທາລະນະສຸກໄດ້ລື່ນຄາດຫມາຍ 1-2 ບ້ານຕໍ່ເມືອງ; ໃນ ນັ້ນ ບ້ານ 3 ສະອາດ ຫລື ສຸຂະອະນາໄມມີຫນຶ່ງພັນກວ່າບ້ານ, ບ້ານສາທາລະນະສຸກຕາມ 8 ເນື້ອໃນ ຮສຂ 798 ບ້ານ ແລະ ບ້ານສາທາລະນະສຸກແບບຢ່າງ 497 ບ້ານ ລວມທັງ 3 ປະເພດມີ 2 ພັນກວ່າບ້ານ.
ນອກຈາກນີ້ ທ່ານລັດຖະມົນຕີ ວ່າການກະຊວງສາທາລະນະສຸກໃຫ້ຮູ້ອີກວ່າ: ຍັງໄດ້ມີການເອົາລູກຫລານຂອງປະຊາຊົນບັນດາເຜົ່າຈາກເຂດຫ່າງໄກສອກຫລີກຂຶ້ນມາສ້າງເປັນອາ ສາສະຫມັກບ້ານ (ອສບ) ເປັນ ພະນັກງານຮັກສາສຸຂະພາບຂັ້ນ ຕົ້ນ (ຮສຂ) ແລະ ເປັນແພດຊ່ວຍ ສະເພາະເປັນຜູ້ຊຳນານງານເອົາ ລູກອອກໄດ້ 620 ຄົນ ແລະ ຜະ ດຸງຄັນຊຸມຊົນໄດ້ 140 ຄົນ ໂດຍທີ່ຮຽນຈົບແລ້ວໄດ້ສົ່ງກັບຄືນເມືອປະຕິບັດຢູ່ບ້ານຂອງເຂົາເຈົ້າ.
ຂອບໃຈທີ່ນໍາຂ່າວດີນີ້ມາໃຫ້ອ່ານແລະດີໃຈທີ່ຮູ້ວ່າຄົນລາວເຮົາມີອາຍຸຍືນຂຶ້ນຕື່ມ.
ຖ້າທ່ານ ດຣ. ປອນ ເພິ່ນຄິດໄລ່ຖືກຕ້ອງກໍ່ສະແດງວ່າລາວເຮົາມີການພັດທະນາ
ກະໂດດຂັ້ນຖ້າທຽບໃສ່ປະເທດທີ່ດ້ອຍພັດທະນາດ້ວຍກັນ.
http://www.worldlifeexpectancy.com/world-rankings-total-deaths
ຕົວເລກທີ່ສາກົນເກັບກໍາໄດ້ກັບຕົວເລກທີ່ເພິ່ນລາຍງາຍໃນໃບລາຍການດອກໄມ້ບໍ່ຄືກັນດອກຍາ !
