ໄດ້ກຳນົດສາຍແລ້ວຮູບເງົາເລື່ອງ "ສະບາຍດີງານດອງ" ຫລື Lao Wedding ເຊິ່ງຈະອອກສາຍໃນໂຮງສາຍຮູບເງົາ ໃນວັນທີ 2 ມິຖຸນາ 2011 ນີ້ ຫລັງຈາກສຳເລັດການຖ່າຍທຳ; ນຳສະແດງໂດຍນາງ ຄຳລີ່ ພິລາວົງ ແລະ ທ້າວ ບອຍ ປະກອນ ສັດບໍຣິ ຣັກ.
ຂ່າວນີ້ ຍັງບໍ່ມີສື່ໃດໄດ້ຮັບການເປີດເຜີຍເປັນທາງການເທື່ອ ເຊິ່ງທາງພະນັກງານຄົນຫນຶ່ງຂອງບໍລິສັດລາວອາທຣ໌ມີເດຍເປີດເຜີຍຂໍ້ມູນບາງສ່ວນໃຫ້ນັກຂ່າວຫນັງສືພິມເສດຖະກິດ-ສັງຄົມ ເມື່ອວັນທີ 2 ພຶດສະພາໃຫ້ຮູ້ວ່າ: ຮູບເງົາເລື່ອງ "ສະບາຍດີງານດອງ" ໄດ້ສຳເລັດການຖ່າຍທຳ ແລະ ມີກຳນົດການອອກສາຍໃນວັນທີ 2 ມິຖຸນານີ້ເຊິ່ງເປັນການສະແດງຄູ່ກັນເທື່ອທຳອິດລະຫວ່າງ ຄຳລີ່ ພິລາວົງ ນາງເອກຮູບເງົາສະບາຍດີຫລວງພະບາງ ແລະ ທ້າວ ບອຍ ປະກອນສັດບໍຣິຣັກພະເອກຊື່ດັງຈາກປະເທດໄທ.
ສະບາຍດີງານດອງ ເປັນເລື່ອງຂອງຄວາມຮັກລະຫວ່າງສາວລາວກັບຫນຸ່ມໄທທີ່ມື້ຫນຶ່ງ ຕ້ອງໄດ້ມາແຕ່ງດອງກັນ ແຕ່ການແຕ່ງດອງແມ່ນເຕັມໄປດ້ວຍເລື່ອງຫຍຸ້ງໆເພາະມີບຸກຄົນທີສາມກ້າວເຂົ້າມາໃນຊີວິດຄູ່ນັ້ນເອງ.
ຄຳລີ່ ພິລາວົງ ເຄີຍຜ່ານການສະແດງຮູບເງົາການສ້າງຂອງບໍ ລິສັດລາວອາທຣ໌ມີເດຍມາແລ້ວ 2 ເລື່ອງຄືເລື່ອງສະບາຍດີຫລວງພະບາງ ປີ 2008 ສະແດງຄູ່ກັບອະນັນດາ ເອເວຣິງແຮມ ແລະ ເລື່ອງສະບາຍດີ 2: ບໍ່ມີຄຳຕອບຈາກປາກເຊປີ 2010 ສະແດງຄູ່ ກັບເຣແມັກໂດແນລ.
ຜົນງານການສ້າງຮູບເງົາເລື່ອງນີ້ ລະຫວ່າງບໍລິສັດລາວອາທຣ໌ມີເດຍ (ລາວ) ຮ່ວມກັບບໍລິສັດສະປາຕ້າ ຟຣີມ (ໄທ) ລວມເຖິງການຂຽນບົດ ແລະ ດູແລທຸກຢ່າງຮ່ວມກັນ ເຊິ່ງກຳກັບ ໂດຍສັກດີຊາຍ ດີນານ ຜູ້ກຳກັບທີ່ເຄີຍກຳກັບທັງສອງເລື່ອງທີ່ ຄຳລີ່ ພິລາວົງ ສະແດງມາ.
ທາງດ້ານກຸ່ມນັກຮຽນກຸ່ມຫນຶ່ງຈາກ ມສ ວຽງຈັນ ທີ່ມາຊົມຮູບເງົາທີ່ສູນການຄ້າໄອເຕັກ ກໍ່ກ່າວວ່າ: ຮູ້ສຶກແປກໃຈທີ່ຈະໄດ້ຊົມຮູບເງົາເລື່ອງນີ້ເພາະຍັງບໍ່ຮູ້ຂ່າວເທື່ອດີໃຈ ແລະ ຢາກ ຊົມເລື່ອງນີ້ໄວໆເພາະວ່ານາງເອກ ແລະ ພະເອກໃນເລື່ອງກໍ່ເປັນຄົນມີຄົນຮູ້ຈັກຫລາຍ.
Source: ecom
