ຕະຫລາດຫລັກຊັບລາວ ເປີດເຜີຍວ່າ ບໍລິສັດ ໂທລະຄົມລາວ ຫລື ETL ແລະ ທະນາຄານພັດທະນາລາວ ໄດ້ສະເຫນີຈົດທະບຽນເຂົ້າຊື້-ຮຸ້ນໃນຕະຫລາດຫລັກຊັບ ເຊິ່ງປະຈຸບັນກຳ ລັງຢູ່ໃນຂັ້ນຕອນຫາລື, ຄາດທ້າຍປີນີ້ ອາດໄດ້ເຂົ້າຕົວຈິງ.
ທ່ານ ວຽງຄຳ ວັນສີລາລົມ ອຳນວຍການພະແນກບໍລິຫານ ແລະ ບໍລິການຕະຫລາດຫລັກຊັບລາວເປີດເຜີຍໃຫ້ຮູ້ໃນທ້າຍອາທິດ ຜ່ານມານີ້ວ່າ: ບໍລິສັດ ETL ແລະ ທະນາຄານພັດ ທະນາລາວໄດ້ສະເຫນີເຂົ້າຈົດທະບຽນທຳການຊື້-ຂາຍຮຸ້ນໃນຕະຫລາດຫລັກຊັບລາວ ເຊິ່ງປະຈຸບັນ ກຳລັງຢູ່ໃນຂັ້ນຕອນປຶກສາຫາລືກັນ ໂດຍຄາດວ່າໃນທ້າຍປີນີ້ 2 ບໍລິສັດດັ່ງກ່າວຈະໄດ້ເຂົ້າຊື້-ຂາຍຕົວຈິງ.
ທ່ານ ວຽງຄຳ ເຊື່ອວ່າ: ການຈົດທະບຽນເຂົ້າຕະຫລາດຫລັກຊັບຂອງ 2 ບໍລິສັດນີ້ຈະເປັນການປະກອບ ສ່ວນອັນສຳຄັນທີ່ຈະຍູ້ໃຫ້ຕະຫລາດຫລັກຊັບ ມີບໍລິສັດຈົດທະບຽນເພີ່ມຂຶ້ນ ພ້ອມເປັນທາງເລືອກໃຫມ່ທີ່ຈະສ້າງຄວາມສົນໃຈໃຫ້ແກ່ບັນດານັກລົງທຶນທັງໃນ ແລະ ຕ່າງປະເທດໃນການເຂົ້າມາລົງທຶນຢູ່ຕະຫລາດຫລັກຊັບລາວເພີ່ມຂຶ້ນເຊັ່ນກັນ.
ທ່ານ ວຽງຄຳ ວັນສີລາລົມ ໃຫ້ຮູ້ອີກວ່າ: ພາຍຫລັງຕະຫລາດຫລັກຊັບລາວເປີດການຊື້-ຂາຍຮຸ້ນຕົວຈິງມາແຕ່ວັນທີ 11 ມັງກອນເປັນຕົ້ນມາ ໂດຍມີ 2 ບໍລິສັດເຂົ້າຈົດທະບຽນແລ້ວຄື: ທະນາຄານການຄ້າຕ່າງປະເທດລາວ ມະຫາຊົນ ແລະ ບໍລິສັດຜະລິດ-ໄຟຟ້າລາວມະຫາຊົນໄດ້ມີການເຄື່ອນໄຫວແລກປ່ຽນຊື້-ຂາຍຮຸ້ນຢ່າງເປັນປົກກະຕິບໍ່ມີເຫດການໃດໆ ກະທົບຮ້າຍແຮງຈົນກາຍເປັນທີ່ຍອມຮັບຂອງບັນດານັກລົງທຶນຈຳນວນຫລວງຫລາຍ.
ປະຈຸບັນ ມີຮຸ້ນຈົດທະບຽນ 900 ລ້ານກວ່າຮຸ້ນ ແລະ ມີປະລິມານການຊື້-ຂາຍຮຸ້ນສະເລ່ຍປະຈຳວັນ 2,4 ລ້ານຮຸ້ນ ລວມມູນຄ່າປະມານ 1,7 ຕື້ກວ່າກີບ.
ສ່ວນນັກລົງທຶນທີ່ມາລົງທຶນໃນຕະຫລາດຫລັກຊັບແມ່ນຈາກພາຍໃນ ແລະ ຕ່າງປະເທດມີອັດຕາສ່ວນທີ່ເທົ່າທຽມກັນ ເມື່ອທຽບກັບປະລິມານການຊື້-ຂາຍໃນແຕ່ລະວັນໂດຍນັກລົງທຶນ ຕ່າງປະເທດມີປະມານ 1.000 ກວ່າຄົນ ທີ່ເປັນບຸກຄົນ ແລະ ນິຕິບຸກຄົນ ໃນນັ້ນ ນັກລົງທຶນຄອງອັນດັບຫນຶ່ງແມ່ນຈາກ ສປ ຈີນຮອງລົງມາແມ່ນຈາກລາຊະອານາຈັກໄທ ແລະ ຍີ່ປຸ່ນ, ທ່ານ ວຽງຄຳ ວັນສີລາລົມ ກ່າວ.
