Pasalao

 ຮຽບຮຽງໂດຍ: ຕາດຳ

   ເມື່ອອາທິດທີ່ຜ່ານມາ ສື່ບັນເທີງທົ່ວໂລກໄດ້ຕິດຕາມແລະເຜີຍແຜ່ຂ່າວພະເອກຫນຸ່ມ "ຈູດລໍ" ທີ່ໄດ້ພາຍິງສາວທີ່ເປັນຄົນຮັກ "ຊຽນ ນາ ມີເລີ" ເຂົ້າພິທີແຕ່ງດອງແບບວັດທະນະທຳລາວ ເຊິ່ງພິທີດັ່ງກ່າວໄດ້ຈັດຂຶ້ນແບບສະບາຍລຽບງ່າຍທີ່ຫລວງພະບາງ.

   ຫລັງຈາກມີຂ່າວອອກມາຄັ້ງ ທຳອິດໃນຈາກຫນັງສືພິມເດລີເມວໃນນະຄອນຫລວງລອນດອນ ກໍ່ໄດ້ມີການເລົ່າຂານຈາກພະຍານ ແວດ ລ້ອມອ້ອມຂ້າງຕິດຕາມອີກຈຳນວນຫລາຍ ພິທີແຕ່ງດອງຂອງທັງສອງຄົນເກີດຂຶ້ນຕັ້ງແຕ່ເດືອນເມສາຜ່ານມາ ຈັດແບບຕາມຮີດ ຄອງປະເພນີວັດທະນະທຳຂອງລາວທຸກຂັ້ນຕອນ ດາລາຮໍລີວູດທັງສອງຄົນໄດ້ເປັນສາມີພັນລະຍາກັນຢ່າງຖືກຕ້ອງແລ້ວ.

   ແຕ່ຂ່າວການແຕ່ງດອງບໍ່ມີໃຜຮູ້  ແລະ  ສົງໄສເລີຍ ຖ້າຫາກບໍ່ເຫັນຝ້າຍສີຂາວສີແດງມັດຢູ່ແຂນຂອງ ຈູດລໍ ໃນງານ ໂທນີ ອາ ວອດ (Tony Award) ໃນນິວຢອກ ແລະ ການປາກົດຕົວອີກເທື່ອຫນຶ່ງໃນລອສແອງເຈລີສ ຈູດລໍ ໄດ້ໃສ່ເສື້ອຍືດທີ່ຊື້ຈາກ ສປປ ລາວ ອີກນຳ.

   ຕາມລາຍງານຂ່າວກ່າວວ່າ: ທັງສອງຄົນໄດ້ກັບມາຄືນດີກັນອີກຄັ້ງເມື່ອທ້າຍປີຜ່ານມາກ່ອນທີ່ຈະເດີນທາງມາທີ່ປະເທດລາວ ເຊິ່ງ ເປັນການເດີນທາງທີ່ບໍ່ມີໃຜສົງໄສແລະຮູ້ວ່າທັງສອງຄົນເປັນດາລາດັງຂອງຮໍລີວູດ ຈາກນັ້ນທັງສອງຄົນກໍ່ເຂົ້າພັກທີ່ໂຮງແຮມ "Ama- ntaka " ທັງສອງໄດ້ພົບກັບ "ນິດ ສົມສະຫນິດ" ທີ່ປຶກສາຂອງອົງການຢູເນສໂກເປັນຜູ້ແນະນຳໃຫ້ສອງດາລາເຂົ້າພິທີແຕ່ງດອງ ແບບລາວ.

   ຈູດຊຽນນາ ເດີນທາງເຂົ້າມາດ້ວຍຖ້ຽວບິນເອທີອາຣ໌-72 ຂອງສາຍການບິນລາວ ຈາກນັ້ນ ທັງສອງກໍ່ເຂົ້າພັກໃນໂຮງແຮມຄືນລະ 1.200 ໂດລາສະຫະລັດເປັນເວລາສອງວັນ ຈາກນັ້ນ ກໍ່ພາກັນໄປຖີບລົດຫລິ້ນຕາມຖະຫນົນໃນເມືອງມໍລະດົກໂລກ. ທັງສອງຄົນໃນ ສາຍຕາຄົນລາວກໍ່ເບິ່ງພວກເຂົາເປັນນັກທ່ອງທ່ຽວທີ່ບໍ່ມີໃຜຮູ້ວ່າເປັນດາລາ ແຕ່ສຳລັບຊາວອັງກິດແລ້ວ ບໍ່ມີໃຜທີ່ຈະບໍ່ຮູ້ຈັກທັງສອງຄົນ ນີ້.

   ຄູ່ຮັກດັ່ງກ່າວ ໄດ້ໄປນັ່ງຮັບປະທານອາຫານຮ້ານຂ້າງທາງພ້ອມກັບຮັບປະທານທີ່ເປັນອາຫານເອກະລັກຂອງເມືອງຫລວງພະບາງ ເຊັ່ນ ໄຄຫີນ ແລ້ວພາກັນໄປນັ່ງຊົມພາບຕາເວັນຕົກທີ່ແຄມແມ່ນ້ຳຂອງ ນອກຈາກນີ້ ພວກເຂົາຍັງໄດ້ຂີ່ຊ້າງຊົມທິວທັດທຳມະຊາດທີ່ ນ້ຳຕົກຕາດແຊ້ກ່ອນທີ່ຈະເດີນທາງໄປເຂົ້າພິທີບາສີສູ່ຂວັນກັນ.