Pasalao

 ຂ່າວ: ພະນອມໄພ

   ສປປ ລາວ ມີພົນລະເມືອງພຽງ 0,1 % ຂອງພົນລະເມືອງໂລກ ແຕ່ຜູ້ເຄາະຮ້າຍຈາກບົ່ມບີທີ່ບໍ່ທັນແຕກກວມເອົາເຄິ່ງຫນຶ່ງຂອງ ຜູ້ເຄາະຮ້າຍທົ່ວໂລກ ໂດຍແຕ່ລະປີມີຜູ້ບາດເຈັບ ແລະເສຍຊີວິດ 300 ກວ່າຄົນ ຂະນະທີ່ສົນທິສັນຍາໂອດສະໂລມີຜົນບັງຄັບໃຊ້ອາດ ເປັນຄວາມຫວັງທີ່ຈະເຮັດໃຫ້ລາວຫລຸດຜ່ອນຕົວເລກດັ່ງກ່າວລົງໄດ້.

   ເຊົ້າວານນີ້ ທີ່ສູນຮ່ວມມືສາກົນ ແລະ ຝຶກອົບຮົມ ນະຄອນຫລວງວຽງຈັນ ໄດ້ຈັດພິທີສະເຫລີມສະຫລອງວັນມີຜົນບັງຄັບໃຊ້ຂອງ ສົນທິສັນຍາ ວ່າດ້ວຍການເກືອດຫ້າມລະເບີດບົ່ມບີ ຫລື ສົນທິສັນຍາໂອດສະໂລ ວັນທີ 1 ສິງຫາ 2010 ເຊິ່ງໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ຮອງນາຍົກລັດຖະມົນຕີລັດຖະມົນຕີວ່າການກະຊວງການຕ່າງປະເທດ, ມີທ່ານນາງ ໂຊນຳ ຢັງເຈນຮານາ ຜູ້ ປະສານງານອົງການສະຫະປະຊາຊາດປະຈຳສປປ ລາວ ແລະມີລັດຖະມົນຕີວ່າການ, ຊ່ວຍວ່າການຈາກບັນດາກະຊວງ, ຜູ້ຕາງຫນ້າ ອົງການສາກົນປະຈຳລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານຮອງນາຍົກລັດຖະມົນຕີກ່າວໃນພິທີເປີດງານວ່າ: ສປປ ລາວ ເປັນຫນຶ່ງໃນປະເທດທີ່ໄດ້ຮັບເຄາະຮ້າຍ ແລະ ເປັນຫນ້າໂສກ ເສົ້າທີ່ສຸດທີ່ມີພົນລະເມືອງພຽງ 0,1 % ຂອງພົນລະເມືອງໂລກແຕ່ມີຜູ້ໄດ້ຮັບເຄາະຮ້າຍຈາກລະເບີດບົ່ມບີ ເຖິງ 50 % ຂອງຜູ້ເຄາະ ຮ້າຍໃນທົ່ວໂລກ.

   ດັ່ງນັ້ນ ການເຮັດໃຫ້ເປົ້າຫມາຍ ແລະ ການຈັດຕັ້ງປະຕິບັດຂອງສົນທິສັນຍາໂອດສະໂລຢ່າງເຂັ້ມງວດ ຈິ່ງກາຍເປັນຄວາມຫວັງອັນ ສູງສົ່ງຂອງປະຊາຊົນລາວ, ຄວາມຫວັງທີ່ຢາກເຫັນ ສປປ ລາວ ຫລຸດພົ້ນຈາກການນາບຂູ່ຂອງລະເບີດບົ່ມບີ ແລະ ຄວາມຫວັງທີ່ຢາກ ເຫັນປະຊາຊົນຂອງປະເທດອື່ນທີ່ປະສົບກັບຊາຕາກຳອັນດຽວດັ່ງທີ່ປະຊາຊົນລາວໄດ້ຮັບມາຈະໄດ້ຮັບນະໂຍບາຍເຊັ່ນດຽວກັນທ່ານຮອງ ນາຍົກລັດຖະມົນຕີ ກ່າວ.

   ນັບແຕ່ວັນທີ 1 ສິງຫາ 2010 ເປັນຕົ້ນໄປສົນທິສັນຍາດັ່ງກ່າວ ໄດ້ກາຍເປັນກົດຫມາຍສາກົນອີກສະບັັບຫນຶ່ງທີ່ມີເປົ້າຫມາຍດ້ານ ມະນຸດສະທຳ ແນໃສ່ປົກປ້ອງປະຊາຊົນພົນລະເມືອງ, ແນໃສ່ການເກືອດຫ້າມການຜະລິດ, ນຳໃຊ້, ຄ້າຂາຍລະເບີດບົ່ມບີໃນທົ່ວໂລກ, ພ້ອມດຽວກັນນີ້ ກໍ່ແນໃສ່ທຳລາຍລະເບີດບົ່ມບີທີ່ຖືກສະສົມໄວ້, ເກັບກູ້ ແລະ ຊ່ວຍເຫລືອຜູ້ທີ່ໄດ້ຮັບເຄາະຮ້າຍຈາກລະເບີດບົ່ມບີ. ສົນ ທິສັນຍາສະບັບນີ້ ຍັງຮຽກຮ້ອງໃຫ້ວົງຄະນາຍາດສາກົນຊ່ວຍເຫລືອປະເທດທີ່ໄດ້ຮັບເຄາະຮ້າຍໃນການແກ້ໄຂບັນຫາລະເບີດບົ່ມບີ.

   ໃນພິທີທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຂອບໃຈຕໍ່ບັນດາປະເທດທີ່ໃຫ້ທຶນ ແລະອົງການຈັດຕັ້ງສາກົນຕ່າງໆທີ່ໄດ້ ໃຫ້ການຊ່ວຍເຫລືອເຂົ້າໃນວຽກງານເກັບກູ້ລະເບີດທີ່ບໍ່ທັນແຕກໃນຜ່ານມາ ແລະ ຮຽກຮ້ອງໃຫ້ສືບຕໍ່ ແລະ ເພີ່ມການຊ່ວຍເຫລືອຂຶ້ນຕື່ມ ເພື່ອໃຫ້ ສປປ ລາວ ສາມາດບັນລຸພັນທະຂອງຕົນທີ່ໄດ້ກຳນົດໄວ້ໃນສົນທິສັນຍາ.

   ຂະນະທີ່ ທ່ານນາງ ໂຊນຳ ຢັງເຈນຮານາ ໄດ້ກ່າວວ່າ: ລັດຖະບານລາວໄດ້ສະແດງຄວາມກ້າຫານລົງນາມ ແລະ ໃຫ້ສັດຕະຍາ ບັນຕໍ່ສົນທິສັນຍາໃນຖານະທີ່ເປັນປະເທດທີ່ໄດ້ຮັບຜົນກະທົບຈາກລະເບີດ ຫນັກທີ່ສຸດປະເທດຫນຶ່ງໃນໂລກ ແລະ ລັດຖະບານລາວຍັງ ຈະໄດ້ເປັນເຈົ້າພາບຈັດກອງປະຊຸມຄັ້ງທຳອິດຂອງລັດພາຄີ ວ່າດ້ວຍການເກືອດຫ້າມລະເບີດບົ່ມບີທີ່ນະຄອນຫລວງວຽງຈັນ ໃນເດືອນ ພະຈິກນີ້.

   ເຖິງຢ່າງໃດກໍ່ຕາມ ການຈັດຕັ້ງປະຕິບັດສົນທິສັນຍາດັ່ງກ່າວຈະບໍ່ແມ່ນວຽກງານງ່າຍດາຍແລະຫນ້າທີ່ຂອງວຽກງານເກັບກູ້ລະເບີດ ບໍ່ທັນແຕກ ຍັງຕ້ອງໄດ້ເຊື່ອມສານເຂົ້າກັບເປົ້າຫມາຍການພັດທະນາ ລວມທັງການພັດທະນາເສດຖະກິດສັງຄົມແຫ່ງຊາດ ແລະ ມາ ຮອດປະຈຸບັນນີ້ ຍັງມີຜູ້ທີ່ໄດ້ຮັບບາດເຈັບ ຫລື ເສຍຊີວິດຈາກລະເບີດທີ່ບໍ່ທັນແຕກໃນແຕ່ລະປີມີເຖິງ 300 ຄົນ.