Pasalao

 ຕາດຳ

   ຫລັງຈາກທີ່ປະສົບຜົນສຳເລັດຢ່າງສວຍງາມ ສຳລັບການຈັດງານປະກວດ ນາງສາວລາວ ປີ 2009 ຜ່ານມາ, ບໍລິສັດ ເຄແອນ ຊີ ຈິ່ງຂໍສືບຕໍ່ຄວາມສຳເລັດດັ່ງກ່າວ ດ້ວຍການເຊັນສັນຍາກັບກະຊວງຖະແຫລງຂ່າວ ແລະ ວັດທະນະທຳ ເພື່ອຂໍເປັນຜູ້ຈັດງານປະ ກວດນາງສາວລາວຕໍ່ໄປອີກ 5 ປີເພື່ອສົ່ງເສີມຮີດຄອງປະເພນີ, ວິຖີຊີວິດ ແລະ ວັດທະນະທຳອັນດີງາມຂອງແມ່ຍິງລາວບັນດາເຜົ່າ.

   ອີງຕາມຂໍ້ຕົກລົງຂອງລັດຖະມົນຕີກະຊວງຖະແຫລງຂ່າວແລະວັດທະນະທຳ ວ່າດ້ວຍການອະນຸມັດດຳເນີນໂຄງການການຈັດການ ປະກວດນາງສາວລາວ ສົກປີ 20102014. ຕາມສັນຍາດັ່ງກ່າວ ບໍລິສັດເຄແອນຊີ ຈະເປັນຜູ້ຮັບຜິດຊອບຈັດງານປະກວດນາງສາວ ລາວ ເປັນປະຈຳທຸກປີໂດຍຈະເລີ່ມບັງຄັບໃຊ້ຕັ້ງແຕ່ເດືອນມັງກອນ ປີ 2010 ຫາປີ 2014 ແລະ ຈະຫມົດສັນຍາລົງໃນປີ 2015. ພິ ທີເຊັນສັນຍາແມ່ນໄດ້ຈັດຂຶ້ນວັນທີ 10 ພຶດສະພາຜ່ານມາ ທີ່ຫໍວັດທະນະທຳແຫ່ງຊາດ.

   ເຊິ່ງໂຄງການການປະກວດ ນາງສາວລາວ ແມ່ນໄດ້ສືບຕໍ່ຈາກການ ປະກວດນາງສາວອາພອນລາວ ທີ່ເລີ່ມປະກວດມາຕັ້ງແຕ່ປີ 20062008 ແລະ ໃນປີ 2009 ເປັນປີທໍາອິດໃນການປະກວດ ນາງສາວລາວ ແລະ ສາວງາມທີ່ສາມາດຍາດມຸງກຸດໄປຄອງນັ້ນ ໄດ້ແກ່ ນ. ໄພລິນດາ ພິລາວັນ ນັກສຶກສາຈາກວິທະຍາໄລລັດຕະນະບໍລິຫານທຸລະກິດ ອາຍຸ 19 ປີ, ສູງ 165 ຊມ. ເອົາຊະນະຜູ້ ເຂົ້າປະກວດອີກ 23 ຄົນໃນຮອບສຸດທ້າຍ ນ. ໄພລິນດາ ນອກຈາກຈະມີຮູບຮ່າງຫນ້າຕາທີ່ສວຍງາມແລ້ວ ຍັງສາມາດຕອບຄຳຖາມ ໄດ້ຖືກໃຈຜູ້ຊົມນັບພັນໃນຫ້ອງປະຊຸມໃຫຍ່ ທີ່ໂຮງແຮມດອນຈັນພາເລດ ແລະ ຄົນທີ່ຊົມຢູ່ທາງບ້ານອີກຫລາຍລ້ານຄົນ ເມື່ອຄ່ຳຄືນວັນ ທີ 21 ພະຈິກ ປີ 2009.

   ນອກຈາກ ນ. ໄພລິນດາ ຈະໄດ້ຕຳແຫນ່ງນາງສາວລາວຄົນທຳອິດແລ້ວ ຍັງສາມາດຍາດມາໄດ້ອີກ 2 ລາງວັນຄື: ລາງວັນຂວັນ ໃຈຊ່າງພາບ ແລະ ລາງວັນ ນາງສາວສຸຂະພາບດີ ນຳອີກ ເຊິ່ງຂອງລາງວັນທີ່ໄດ້ຮັບ ມີ ມຸງກຸດມູນຄ່າ 20 ລ້ານກີບ, ເງິນສົດ 50 ລ້ານກີບ, ສາຍສະພາຍມູນຄ່າ 1,5 ລ້ານກີບ, ລົດບີວາຍດີ ມູນຄ່າ 85 ລ້ານກີບ ແລະ ຂອງລາງວັນອື່ນໆລວມທັງຫມົດ 100 ກວ່າ ລ້ານກີບ.

   ແຕ່ສຳລັບຂອງລາງວັນປີນີ້ ຍັງບໍ່ມີລາຍງານວ່າ ຈະມີມູນຄ່າເທົ່່າໃດ ແຕ່ຄາດວ່າຕ້ອງສູງກວ່າປີຜ່ານມາແນ່ນອນ ສຳລັບສາວງາມ ຄົນໃດທີ່ມີຄຸນສົມບັດດີ ຫລືຢາກຫາປະສົບການທີ່ຍິ່ງໃຫຍ່ ກຽມຕົວລົງສະຫມັກນາງສາວງລາວ ທີ່ຈະເປີດໃຫ້ສະຫມັກໃນໄວໆນີ້ ທ່ານ ອາດຈະເປັນນາງສາວລາວ ປີ 2010 ນີ້ກໍ່ເປັນໄດ້.