Pasalao

 ຂ່າວ: ຄອນສະຫວັນ

   ສປປ ລາວ ກັບ ສປ ຈີນ ໄດ້ລົງນາມຮ່ວມກັນໃນໂຄງການກໍ່ສ້າງດາວທຽມລະບົບວິທະຍຸ, ໂທລະພາບ ແລະ ໂທລະຄົມລາວ ເຊິ່ງ ຄາດວ່າອີກປະມານ 40 ເດືອນ ໂຄງການດັ່ງກ່າວຈະສ້າງສຳເລັດ ແລະ ລາວຈະມີດາວທຽມສົ່ງຂຶ້ນວົງໂຄຈອນ ຢ່າງແນ່ນອນ ເຊິ່ງດາວ ທຽມດັ່ງ ກ່າວຈະສາມາດນຳໃຊ້ງານໄດ້ຫລາຍກວ່າ 10 ປີ.

   ອີງຕາມການລາຍງານຂອງ ທ່ານ ສຈ ດຣ. ບຸນຕຽມ ພິດ ສະໄຫມ ລັດຖະມົນຕີປະຈຳສຳນັກງານນາຍົກລັດຖະມົນຕີ ຫົວຫນ້າອົງ ການວິທະຍາສາດແລະເຕັກໂນໂລຊີແຫ່ງຊາດລາຍງານໃຫ້ຮູ້ວ່າ: ການເຊັນສັນຍາການຄ້າ, ການຮັບເຫມົາການກໍ່ສ້າງດາວທຽມ, ຈະ ຫລວດ, ການສົ່ງດາວທຽມ ແລະສະຖານີພາກພື້ນດິນໄດ້ນຳໃຊ້ເຕັກໂນໂລຊີ ແລະ ວັດຖຸອຸປະກອນທີ່ທັນສະໄຫມຂອງ ສປ ຈີນ ໃນລະ ດັບສູງ ແລະ ລະດັບທັນສະໄຫມຫລ້າສຸດ. ໄລຍະການກໍ່ສ້າງດາວທຽມນີ້ຈະໃຊ້ເວລາຫລາຍກວ່າປົກກະຕິ ເຊິ່ງຈະໃຊ້ເວລາປະມານ 40 ເດືອນ ໂດຍໃນໄລຍະຜ່ານມາ ແມ່ນໄດ້ປຶກສາກັນວ່າຈະໃຊ້ເວລາປະມານ 30 ເດືອນ ເຊິ່ງການຮ່ວມມືນີ້ແມ່ນການຮ່ວມມືຍາວນານມີທັງ ເລື່ອງບໍລິຫານລັດ ແລະເລື່ອງທຸລະກິດ. ໂດຍຈະຍິງຂຶ້ນສູ່ວົງໂຄຈອນໃນຕຳແຫນ່ງ 128,5 ອົງສາຕາເວັນອອກດາວທຽມຂອງພວກເຮົາ ສາມາດຄວບຄຸມເນື້ອທີ່ຮັບສັນຍານໃນຂອບເຂດພາກພື້ນອາຊຽນໃນບັນດາປະເທດລຸ່ມແມ່ນ້ຳຂອງ, ພວກເຮົາສາມາດນຳໃຊ້ໄດ້ທັງຄື້ນໂທ ລະພາບ ແລະ ໂທລະມະນາຄົມ ເຊິ່ງສາມາດໃຫ້ບໍລິການໄດ້ຢ່າງກວ້າງຂວາງທົ່ວເນື້ອທີ່ຂອງ ສປປ ລາວ. ພ້ອມນັ້ນພວກເຮົາຍັງຈະໄດ້ ລົງທຶນໃສ່ທາງພາກພື້ນດິນຢ່າງຫລວງຫລາຍ, ພວກເຮົາຍັງຈະມີລະບົບສ້າງສະຖານີຍ່ອຍທີ່ເອີ້ນວ່າສະຖານີຮັບ ແລະສົ່ງດາວທຽມ ເຊິ່ງ ຈະຕັ້ງຢູ່ໃນຂອບເຂດທົ່ວປະເທດ ເຊິ່ງຈະມີທັງຫມົດປະມານ 60 ສະຖານີ.

    ພາຍຫລັງທີ່ລາວ ແລະຈີນ ໄດ້ມີການລົງນາມບົດບັນທຶກຄວາມເຂົ້າໃຈກ່ຽວກັບການຮ່ວມມືພັດທະນາໂຄງການກໍ່ສ້າງ ແລະດຳເນີນ ທຸລະກິດດາວທຽມລະບົບວິທະຍຸ ໂທລະພາບ ແລະ ໂທລະຄົມມະນາຄົມລາວ ທີ່ທັງສອງຝ່າຍໄດ້ເຊັນກັນໃນວັນທີ 25 ກັນຍາ 2009 ທີ່ຜ່ານມານັ້ນ, ສອງຝ່າຍໄດ້ປຶກສາຫາລືກັນໃນສອງຫນ້າວຽກຕົ້ນຕໍຂອງໂຄງການເປັນຕົ້ນ ໄດ້ຮ່ວມກັນປັບປຸງບົດວິພາກເສດຖະກິດ-ເຕັກ ນິກຂອງໂຄງການ ເຊິ່ງມາເຖິງ ປະຈຸບັນ ກໍ່ຖືວ່າສຳເລັດຢ່າງສົມບູນ. ໄປພ້ອມໆກັນນັ້ນ, ສອງຝ່າຍກໍ່ໄດ້ສຸມໃສ່ສ້າງ ແລະ ປັບປຸງຮ່າງ ສັນຍາໂຄງການກໍ່ສ້າງດາວທຽມລະບົບວິທະຍຸ ໂທລະພາບ ແລະ ໂທລະມະນາຄົມລາວ ຜ່ານການເຈລະຈາຫາລືນຳກັນ. ມາຮອດປະຈຸ ບັນ, ທັງສອງຝ່າຍກໍ່ໄດ້ເຫັນດີເປັນເອກະພາບກັນຕໍ່ຮ່າງສັນຍາດັ່ງກ່າວນີ້ ຈິ່ງຕົກລົງຈັດໃຫ້ມີພິທີເຊັນສັນຍາຮ່ວມກັນຂຶ້ນ.

   ສັນຍາໂຄງການກໍ່ສ້າງດາວທຽມ ລະບົບວິທະຍຸໂທລະພາບ ແລະໂທລະມະນາຄົມລາວມີ 3 ພາກສ່ວນລົງນາມຮ່ວມກັນຄື: ອົງການ ວິທະຍາສາດ ແລະ ເຕັກໂນໂລຊີແຫ່ງຊາດ ໃນນາມຕາງຫນ້າໃຫ້ລັດຖະບານ ສປປ ລາວ, ບໍລິສັດດາວທຽມໂທລະມະນາຄົມອາຊີ-ປາ ຊີຟິກ ຈີນ ຈຳກັດ ແລະບໍລິສັດອຸດສາຫະກຳກຳແພງເມືອງຈີນ. ພິທີດັ່ງກ່າວໄດ້ຈັດຂຶ້ນທີ່ໂຮງແຮມດອນຈັນພາເລດ ນະຄອນຫລວງວຽງ ຈັນໃນມື້ວານນີ້ ເຊິ່ງຜູ້ລົງນາມໃນສັນຍາສະບັບນີ້ທາງຝ່າຍ ສປປ ລາວ ແມ່ນທ່ານ ສຈ ດຣ ບຸນຕຽມ ພິດສະໄຫມ ລັດຖະມົນຕີປະຈຳ ສຳນັກງານນາຍົກລັດຖະມົນຕີ, ຫົວຫນ້າອົງການວິທະຍາສາດ ແລະ ເຕັກໂນໂລຊີແຫ່ງຊາດ, ໃນນາມບໍລິສັດດາວທຽມໂທລະມະນາຄົມ ອາຊີ-ປາຊີຟິກ ຈີນ ຈຳກັດ ແມ່ນທ່ານ ຫລຽງ ສຽວຫົງ ເລຂາຄະນະພັກສະຖາບັນເຕັກໂນໂລຊີຍານສົ່ງດາວທຽມທັງເປັນປະທານສະພາ ບໍລິຫານຂອງບໍລິສັດດາວທຽມໂທລະມະນາຄົມ ອາຊີ-ປາຊີຟິກ ຈີນ ຈຳກັດ ແລະ ໃນນາມບໍລິສັດອຸດສາຫະກຳກຳແພງເມືອງຈີນ ແມ່ນ ທ່ານ ອິນ ຫລີມິງ ປະທານບໍລິສັດ ໂດຍການເຂົ້າຮ່ວມຂອງທ່ານ ພົນໂທ ດວງໃຈພິຈິດ ຮອງນາຍົກລັດຖະມົນຕີ, ລັດຖະມົນຕີວ່າການ ກະຊວງປ້ອງກັນປະເທດ, ທ່ານ ຢວນ ຈາຈຶງ ກຳມະການສຳຮອງສູນກາງພັກຄອມມຸຍນິດຈີນ ຮອງປະທານເຄືອບໍລິສັດວິທະຍາສາດ ແລະ ເຕັກໂນໂລຊີການບິນອະວະກາດຂອງ ສປ ຈີນ. ພ້ອມດ້ວຍບັນດາພະນັກງານຂັ້ນສູງຈາກຂະແຫນງການທີ່ກ່ຽວຂ້ອງເຂົ້າຮ່ວມ.