Pasalao

ໃນວັນທີ 30 ທັນວາ 2009 ຜ່ານມານີ້ ຢູ່ທີ່ສວນປະຕູໄຊ ໄດ້ມີພິທີມອບ-ຮັບເຄື່ອງຊ່ວຍເຫຼືອຈາກລັດວິສາຫະກິດປະສົມລາວ ໂທລະຄົມໃຫ້ແກ່ສວນປະ ຕູໄຊ ເປັນຖັງໃສ່ຂີ້ເຫຍື້ອຈຳນວນ 50 ໜ່ວຍ ແລະ ປ້າຍບໍລິການ 20 ອັນ ລວມມູນຄ່າ 33 ລ້ານກີບ ໂດຍແມ່ນທ່ານ ສຸພົນ ຈັນທະວີໄຊ ຫົວໜ້າ ພະແນກການຕະຫຼາດລັດວິສາຫະກິດລາວໂທລະຄົມ ເປັນຜູ້ກ່າວມອບ ແລະ ທ່ານນາງ ລັດດາພອນ ຂຸນພິທັກ ອຳນວຍການສວນປະຕູໄຊ ເປັນຜູ້ກ່າວ ຮັບ ໂດຍມີພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ຈຸດປະສົງຂອງການມອບເຄື່ອງຊ່ວຍເຫຼືອຄັ້ງນີ້ ແມ່ນເພື່ອເປັນການປະກອບສ່ວນໃນການຮັກສາຄວາມເປັນລະບຽບຮຽບຮ້ອຍ ແລະ ສະອາດງາມຕາຢູ່ ສວນປະຕູໄຊ ເພື່ອໃຫ້ບັນດາແຂກທີ່ມາທ່ຽວຊົມໄດ້ມີຄວາມສະດວກມີຖັງໃສ່ຂີ້ເຫຍື້ອເປັນຈຸດ ເພື່ອຮັກສາສິ່ງແວດລ້ອມ ພ້ອມທັງປ້າຍບອກຈຸດ ແລະ ປ້າຍຫ້າມຢຽບຫຍ້າ ບອກເຕືອນຜູ້ມາທ່ຽວໃຫ້ຮູ້ ແລະ ປະຕິບັດ.

ທ່ານນາງ ລັດດາພອນ ອຳນວຍການສວນປະຕູໄຊ ຍັງໃຫ້ຮູ້ຕື່ມອີກວ່າ: ທີ່ຜ່ານມາລາວໂທລະຄົມ ກໍໄດ້ມອບເຄື່ອງຊ່ວຍເຫຼືອໃຫ້ສວນປະຕູໄຊ 2 ຄັ້ງ ແລ້ວ ໂດຍໄດ້ມອບຕັ່ງປ້າຍບອກຈຸດ ແລະ ຄັນຮົ່ມມູນຄ່າຫຼາຍສິບລ້ານກີບ ນອກຈາກນີ້ກໍຍັງໄດ້ມີຫຼາຍພາກສ່ວນປະກອບສ່ວນຊ່ວຍເຫຼືອແກ່ສວນປະຕູ ໄຊ ແຕ່ກໍຍັງມີບາງດ້ານທີ່ທາງສວນຍັງຕ້ອງການ ເປັນຕົ້ນແມ່ນໂທລະໂຄ່ງເພື່ອໂຄສະນາປະຊາສຳພັນໃຫ້ບັນດາແຂກທີ່ມາທ່ຽວຢູ່ສວນ ໄດ້ຮູ້ກົດລະບຽບ ແລະ ວັດທະນະທຳຮີດຄອງປະເພນີຂອງລາວ ແລະ ເພື່ອບໍ່ໃຫ້ຜູ້ທີ່ມາທ່ອງທ່ຽວກະທຳສິ່ງບໍ່ດີບໍ່ງາມຢູ່ສວນປະຕູໄຊແຫ່ງນີ້.