Pasalao

ສຳລັບສູນກີລາບູໂດລາວ-ຍີ່ປຸ່ນ ຊຶ່ງຕັ້ງຢູ່ບ້ານອະນຸ ເມືອງຈັນທະບູລີ ໂດຍແມ່ນລັດຖະບານຍີ່ປຸ່ນ ໃຫ້ການຊ່ວຍເຫຼືອລ້າ ນັ້ນແມ່ນໄດ້ເປີດນຳໃຊ້ຢ່າງ ເປັນທາງການແລ້ວນັບແຕ່ວັນທີ 14 ພະຈິກນີ້ເປັນຕົ້ນໄປ ໂດຍມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ປະຈຳການລັດຖະບານ ປະທານຄະນະກຳມະການຈັດງານມະຫະກຳກີລາຊີເກມ ຄັ້ງທີ 25 ແລະ ທ່ານ Masaaki Miya****a ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງ ປະເທດຍີ່ປຸ່ນ ເຂົ້າຮ່ວມນຳ.

ທ່ານ ດຣ.ສຸລະສິດ ອຸປຣະວັນ ຫົວໝ້າໂຄງການກໍ່ສ້າງສູນບູໂດລາວ-ຍີ່ປຸ່ນ ໄດ້ລາຍງານໃຫ້ຮູ້ວ່າ: ສະເພາະສູນບູໂດລາວ-ຍີ່ປຸ່ນ ແຫ່ງນີ້ແມ່ນໄດ້ເລີ່ມ ໂຄງການກໍ່ສ້າງມາແຕ່ທ້າຍປີ 2008 ແລະ ສຳເລັດໃນວັນທີ 6 ພະຈິກນີ້ ໂດຍແມ່ນລັດຖະບານຍີ່ປຸ່ນ ໃຫ້ການຊ່ວຍເຫຼືອລ້າໃນມູນຄ່າ 601.600.000 ເຢັນ ແລະ ລັດຖະບານລາວ ໄດ້ປະກອບສ່ວນທຶນຮອນເຂົ້າໃນການກໍ່ສ້າງ 2 ຕື້ກ່ວາກີບ.

ສູນບູໂດແຫ່ງນີ້ ປະກອບໄປດ້ວຍອາຄານໃຫຍ່ 3 ຊັ້ນ 2 ອາຄານຊັ້ນດຽວ ສະເພາະອາຄານໃຫຍ່ປະກອບດ້ວຍສະຖານທີ່ເຝິກຊ້ອມ-ແຂ່ງຂັນ ພ້ອມ ດ້ວຍຫ້ອງການຂາເຂົ້າ-ຂາອອກ ຫ້ອງອຳນວຍການ ແລະ ຫ້ອງການຂອງສະຫະພັນກາຣາເຕໂດ ຢູໂດ ແລະ ສະຫະພັນໄອກິໂດ ມີບ່ອນນັ່ງຊົມຖາ ວອນ 436 ບ່ອນນັ່ງ ແລະ 375 ບ່ອນນັ່ງເຄື່ອນທີ່ໃນກໍລະນີຈັດກິດຈະກຳປະເພດຕ່າງໆ ນັບທັງການຈັດການສະແດງຄອນເສີດ ສ່ວນອາຄານຊັ້ນດຽວ ປະກອບດ້ວຍຫ້ອງກຳມະການຕັດສິນ ແພດ ສາງມ້ຽນອຸປະກອນ ຫ້ອງປ່ຽນເຄື່ອງຍິງ-ຊາຍ ຫ້ອງອາບນ້ຳ ຫ້ອງນ້ຳທົ່ວໄປ ແລະ ຫ້ອງນ້ຳຄົນພິການ.

ສູນກີລາບູໂດລາວ-ຍີ່ປຸ່ນ ນອກຈາກນຳໃຊ້ຫຼີ້ນກີລາໄອກິໂດ ຢູ່ໂດ ແລະ ກາຣາເຕໂດແລ້ວ ຍັງສາມາດນຳໃຊ້ຫຼີ້ນກີລາປິ່ງປ່ອງ ດອກປີກໄກ່ ກະຕໍ້ ຈັດ ກອງປະຊຸມ ແລະ ຈັດງານຄອນເສີດເພື່ອຫາລາຍໄດ້ໃຫ້ແກ່ສູນຕື່ມອີກ ໄລຍະມໍ່ໆນີ້ແມ່ນຈະນຳໃຊ້ເປັນສະຖານທີ່ແຂ່ງຂັນກິລາຢູ່ໂດ ແລະ ກາຣາເຕໂດ ໃນງານມະຫະກຳກີລາຊີເກມ ຄັ້ງທີ 25 ທີ່ກຽມຈັດຂຶ້ນຢູ່ນະຄອນຫຼວງວຽງຈັນ ລະຫວ່າງວັນທີ 9-18 ທັນວາ 2009 ນີ້.

ໃນໂອກາດດັ່ງກ່າວທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຍັງໄດ້ກ່າວສະແດງຄວາມຂອບອົກຂອບໃຈຢ່າງຈິງໃຈ ແລະ ຄວາມຮູ້ ບຸນຄຸນຢ່າງເລິກ ເຊິ່ງມາຍັງລັດຖະບານ ແລະ ປະຊາຊົນຍີ່ປຸ່ນທີ່ໄດ້ໃຫ້ການຊ່ວຍເຫຼືອໃນຄັ້ງນີ້ ເຮັດໃຫ້ ສປປ ລາວ ໄດ້ມີພື້ນຖານໂຄງລ່າງທີ່ທັນສະ ໄໝ ສາມາດຮອງຮັບການຈັດແຂ່ງຂັນກີລາໃນລະດັບພາກພື້ນ ແລະ ສາກົນໄດ້ເປັນຢ່າງດີ.