Pasalao

 ອີກ 120 ກ່ວາວັນ ຫຼື ປະມານ 4 ເດືອນ ງານມະຫະກຳກີລາຊີເກມ ຄັ້ງທີ 25 ທີ່ລາວເປັນເຈົ້າພາບ ກໍຈະໄຂ
ຂຶ້ນຢ່າງເປັນທາງການ ໃນລະຫວ່າງວັນທີ 9-18 ທັນວາ 2009 ທີ່ນະຄອນຫຼວງວຽງຈັນ ເປັນຄັ້ງປະຫວັດສາດ.
               ເປັນທີ່ແນ່ນອນ ບໍ່ວ່າຈະເປັນຊາດໃດ-ປະເທດໃດກໍຕາມ ເມື່ອໄດ້ເປັນເຈົ້າພາບຈັດງານດັ່ງກ່າວ ກໍຍ່ອມຊອກຫາ
ວິທີເພື່ອຫາລາຍໄດ້ເຂົ້າມາສະໜັບສະໜູນງານ ຫຼື ຊອກຫາທຶນຮອນມາໃຊ້ຈ່າຍບໍລິການຕ່າງໆ ເພື່ອເຮັດໃຫ້ງານສຳເລັດໄປ
ດ້ວຍຄຸນນະພາບອັນຈົບງາມ ແລະ ເປັນທີ່ປະທັບໃຈທັງເຈົ້າພາບ ແລະ ແຂກ.
               ກຳມະການການຕະຫຼາດ ແລະ ສິດທິປະໂຫຍດ ແມ່ນການຈັດຕັ້ງຂະແໜງໜຶ່ງທີ່ລັດຖະບານລາວ ໄດ້ແຕ່ງຕັ້ງ
ແລະ ມອບໝາຍໜ້າທີ່ສຳຄັນນີ້ ໃຫ້ໃນການຊອກຫາແຫຼ່ງທຶນມາສະໜັບສະໜູນຈາກພາຍໃນ ແລະ ຕ່າງປະເທດ ເພື່ອປະ
ກອບສ່ວນໃຫ້ງານກີລາເທື່ອນີ້ມີສີສັນ ແລະ ໃຫ້ຜູ້ເຂົ້າຮ່ວມມີຄວາມຊົງຈຳຕະຫຼອດກາລະນານ ແລະ ໜຶ່ງໃນນັ້ນກໍແມ່ນການ
ຜະລິດ ແລະ ຂາຍສິນຄ້າທີ່ລະນຶກ ດ້ວຍການເອົາລິຂະສິດຊີເກມຕິດແປະກັບສິນຄ້າ ຫຼື ຜະລິດຕະພັນຕ່າງໆ ເຊັ່ນ ເຄື່ອງນຸ່ງ
ໝວກ ຖ້ວຍ ຈານ ຈອກ... ບັນດາສິນຄ້າເຫຼົ່ານັ້ນ ຍ່ອມມີມູນຄ່າເພີ່ມຖ້າທຽບໃສ່ລາຄາສິນຄ້າປົກກະຕິ ທີ່ບໍ່ມີລິຂະສິດຊີເກມ
ແຕ່ຖ້າຫາກຜູ້ບໍລິໂພກຄິດເຖິງແຕ່ດ້ານລາຄາ ກໍຍ່ອມບອກວ່າແມ່ນລາຄາແພງ ແຕ່ຖ້າຫາກຄິດເຖິງຄຸນຄ່າ ຫຼື ໂອກາດພັນປີມີ
ເທື່ອໜຶ່ງແລ້ວກໍເຫັນວ່າເປັນທຳມະດາ.
               ງານວາງສະແດງ ແລະ ຂາຍສິນຄ້າທີ່ລະນຶກຊີເກມຄັ້ງທີ 25 ໄດ້ມີຂຶ້ນໃນລະຫວ່າງວັນທີ 25-29 ສິງຫາ 2009
ທີ່ຫໍວັດທະນະທຳແຫ່ງຊາດ ເຊິ່ງຖືວ່າແມ່ນເປີດງານວາງສະແດງຂາຍສິນຄ້າ ກໍເວົ້າໄດ້ໂດຍສິນຄ້າເກືອບທັງໝົດແມ່ນມາ
ຈາກປະເທດໄທ ເຊິ່ງແມ່ນໄດ້ຮັບລິຂະສິດຊີເກມຈາກບໍລິສັດເພັດຈຳປາ.
               ດັ່ງໄດ້ກ່າວມາຂ້າງເທິງ ການຊອກຫາແຫຼ່ງລາຍຮັບມາສະໜັບສະໜູນງານມະຫະກຳກີລາຊີເກມ ຄັ້ງທີ 25 ສາ
ມາດລະດົມໄດ້ທັງພາຍໃນ ແລະ ຕ່າງປະເທດ ເຊິ່ງບໍ່ວ່າກັນໃນຈຸດນີ້... ແຕ່ອັນທີ່ເຫັນວ່າໃນງານວາງສະແດງ-ຂາຍສິນຄ້າບໍ່
ທັນແທດເໝາະກັບນະໂຍບາຍຂອງລັດຖະບານ ຫຼື ສວນກະແສກັບທະນາຄານ ແຫ່ງ ສປປ ລາວ ທີ່ພວມປຸກລະດົມພໍ່-ແມ່
ປະຊາຊົນ ແລະ ຊາວຄ້າ-ຂາຍໃນທົ່ວປະເທດ ໃຫ້ນຳໃຊ້ເງິນກີບ ຕິດລາຄາຂາຍສິນຄ້າເປັນເງິນກີບ ການຊຳລະສະສາງສິນ
ຄ້າໃຫ້ເປັນເງິນກີບ ແຕ່ງານວາງສະແດງ-ຂາຍສິນຄ້າເທື່ອນີ້ຜູ້ຂາຍ (ຄົນໄທ) ພັດຮ້ອງຂາຍເປັນລາຄາເງິນບາດ (ສະກຸນເງິນ
ໄທ) ເຊິ່ງລູກຄ້າບາງລາຍກໍຈ່າຍເປັນເງິນບາດ ບາງລາຍກໍບອກວ່າຖືກລາຄາເງິນກີບເທົ່າໃດ ກໍເລີຍຈ່າຍເປັນເງິນກີບກໍມີ....
ໂອ! ຊ່າງເປັນນໍ! ການຄຸ້ມຄອງກະແຈກກະຈາຍ ແລະ ການຄຸ້ມຄອງທີ່ເປັນເອກະພາບ ສອງທິດສະດີນີ້ອັນໃດຖືກຕ້ອງແທ້

ວຽງຈັນໃຫມ່