Pasalao

ທ້າຍ​ເດືອນ​ພຶດສະພາ​ນີ້ ອຳນາດ​ການ​ປົກຄອງ​ສາລະ​ວັນ ໄດ້​ອອກ​ແຈ້ງ​ການ​ເຕືອນ​ປະຊາຊົນ​ຂອງ​ຕົນ ໃຫ້​ເພີ່ມ​ທະ​ວີສະຕິ​ລະວັງ​ຕົວ ຕໍ່​ການເຄື່ອນໄຫວ​ຂອງ​ກຸ່ມ​ຄົນ​ບໍ່​ດີ ລັກ​ເອົາ​ເດັກນ້ອຍ ເຊິ່ງ​ເປົ້າ​ໝາຍ​ຂອງ​ກຸ່ມ​ຄົນ​ບໍ່​ດີ​ດັ່ງກ່າວ ແມ່ນ​ເລັ່ງ​ໃສ່​ຂີ້ລັກ​ເອົາ​ເດັກນ້ອຍ​ຕ່ຳ​ກວ່າ 15 ປີ​ລົງ​ມາ ໂດຍ​ສະເພາະ​ແມ່ນ​ເຂດ​ຊານເມືອງ ເປັນ​ບ່ອນ​ທີ່​ມີ​ເດັກ​ຫຼາຍ ດ້ວຍ​ເຫດ​ດັ່ງກ່າວ ຈິ່ງ​ຂໍ​ໃຫ້​ຜູ້​ປົກຄອງ​ຄວນ​ມີ​ສະຕິ​ລະວັງ​ຕົວ​ໃຫ້​ຫຼາຍ​ຂຶ້ນ.

ການ​ແຈ້ງ​ເຕືອນ​ດັ່ງກ່າວ ມີ​ຂຶ້ນ​ພາຍຫຼັງ​ໄດ້​ປາກົດ​ມີ​ເຫດການ​ເກີດ​ຂຶ້ນ​ແລ້ວ ໃນ​ຕອນ​ທ່ຽງ​ຂອງ​ວັນ​ທີ 13 ພຶດສະພາ 2014 ຢູ່​ໂຮງຮຽນ​ບ້ານ​ຄອນ​ລາດ ເມືອງ ແລະ ແຂວງ​ສາລະ​ວັນ ໄດ້​ມີ​ກຸ່ມ​ຄົນ​ບໍ່​ດີ ລັກ​ເອົາ​ເດັກ​ນັກຮຽນ​ຊື່​ທ້າວ ໂຫຼ້ນ ອາຍຸ 13 ປີ ນັກຮຽນ ປ.3 ເຊິ່ງ​ໃນ​ເຫດການ​ນີ້ ໄດ້​ມີ​ຄົນ​ບໍ່​ຫວັງ​ດີ 2 ຄົນ ລົງມື​ລັກ​ເອົາ​ເດັກນ້ອຍ ແລ່ນ​ໜີ​ຫ່າງ​ຈາກ​ໂຮງຮຽນ​ໄກ​ສົມຄວນ ແລ້ວ​ກໍ່​ປ່ອຍ ສ່ວນ​ເດັກ​ລາຍ​ນີ້​ຍັງ​ມີ​ສະຕິ ແຕ່​ເດັກ​ບໍ່​ສາມາດ​ຮ້ອງ​ຂໍ​ຄວາມ​ຊ່ວຍເຫຼືອ​ໄດ້ ຍ້ອນ​ຖືກ​ວາງຢາ​ຊະນິດ​ພິເສດ ປັດຈຸບັນ​ນີ້ ເດັກ​ປອດ​ໄພ​ແລ້ວ ຢູ່​ໃນ​ການ​ດູ​ແລ​ຂອງ​ພໍ່​ແມ່ ແລະ ຄູ-ອາຈານ ສ່ວນ​ກຸ່ມ​ຄົນ​ບໍ່​ດີ​ນັ້ນ ເຈົ້າ​ໜ້າທີ່​ພວມ​ເລັ່ງ​ຕິດຕາມ​ມາ​ດຳເນີນ​ຄະດີ.

ສະນັ້ນ ອຳນາດ​ການ​ປົກຄອງ​ເມືອງ​ສາລະ​ວັນ ຈຶ່ງ​ແຈ້ງ​ໃຫ້​ແຕ່​ລະ​ກຸ່ມ​ບ້ານ​ທົ່ວ​ເມືອງ ເພີ່ມ​ທະວີ​ຄວາມ​ລະວັງ​ຕົວ​ຕໍ່​ກຸ່ມ​ຄົນ​ບໍ່​ດີ ທີ່​ເຄື່ອນ​ໄຫວ​ຕາມ​ຈຸດ​ຕ່າງໆ ທັງ​ໃນ​ເມືອງ ແລະ ຊົນນະບົດ ເປັນຕົ້ນ​ແມ່ນ​ການ​ຕົວະ​ຍົວະ​ຫຼອກ​ລວງ ລັກ​ເອົາ​ເດັກນ້ອຍ ແລະ ລັກ​ຊັບ​ສິນ​ອື່ນໆ ຂໍ​ໃຫ້​ຄອບຄົວ​ພໍ່​ແມ່​ປະຊາຊົນ ຫຼື ຜູ້​ປົກຄອງ ເບິ່ງແຍງ​ເອົາໃຈໃສ່​ຕໍ່​ລູກ​ຫຼານ​ຂອງ​ຕົນ.

ແນວໃດ​ກໍ່​ດີ ທ່ານ ຄຳ​ເຫຼັກ ອິນ​ດາ​ວົງ ເຈົ້າເມືອງ​ສາລະ​ວັນ ຊີ້​ແຈງ​ຕື່ມ​ອີ​ກວ່າ: ຍັງ​ມີ​ກຸ່ມ​ຄົນ​ບໍ່​ຫວັງ​ດີ ໄດ້​ສ້າງ​ຄວາມ​ແຕກ​ຕື່ນ​ໃຫ້​ພໍ່​ແມ່​ປະຊາຊົນ ໂດຍ​ອ້າງ​ຂໍ້​ມູນ​ບິດ​ເບືອນ​ລົງ​ໃນ​ສື່​ສັງຄົມ​ອອນ​ລາຍ ຫຼື ອື່ນໆ​ນັ້ນ ລ້ວນ​ແຕ່​ບໍ່​ແມ່ນ​ຄວາມ​ຈິງ ໂດຍ​ລວມ​ແລ້ວ ເຈົ້າ​ໜ້າທີ່​ແຂວງ​ສາລະ​ວັນ ຍັງ​ສາມາດ​ຮັກສາ​ຄວາມ​ສະຫງົບ​ສຸກ​ໂດຍ​ພື້ນຖານ ແລະ ເປັນ​ລະບຽບ​ຮຽບ​ຮ້ອຍ​ດີ ປະຊາຊົນ​ຍັງ​ດຳລົງ​ຊີວິດ​ຕາມ​ປົກກະຕິ ສະນັ້ນ ຈຶ່ງ​ຮຽກຮ້ອງ​ມາ​ຍັງ​ປະຊາຊົນ​ທຸກ​ທົ່ວ​ໜ້າ ຢ່າ​ຫຼົງ​ເຊື່ອ​ຂ່າວ​ລື​ຕ່າງໆ​ທີ່​ບໍ່​ມີ​ມູນ​ຄວາມ​ຈິງ ແລະ ຈົ່ງ​ພ້ອມ​ກັນ​ສະກັດ​ກັ້ນ ກຸ່ມ​ຄົນ​ບໍ່​ດີ​ທີ່​ສ້າງ​ຄວາມ​ບໍ່​ສະຫງົບ​ໃນ​ສັງຄົມ​ນີ້ ເວົ້າ​ລວມ ເວົ້າ​ສະເພາະ ກໍ່​ຄື​ທົ່ວ​ແຂວງ​ສາລະ​ວັນ.