ແຫຼ່ງຂ່າວຈາກໜັງສືພິມຄວາມສະຫງົບໃຫ້ຮູ້ວ່າ: ໃນວັນທີ 20 ພຶດສະພາ 2014 ເວລາ 5:00 ໂມງ ໄດ້ເກີດເຫດລູກຊາຍໃຊ້ມີດແທງພໍ່ຈົນເສຍຊີວິດຄາທີ່ ຍ້ອນຂໍເງິນໄປຊື້ຢາບ້າບໍ່ໄດ້.
ເຈົ້າໜ້າທີ່ ປກສ ເມືອງໄກສອນ ພົມວິຫານ ແຂວງສະຫວັນນະເຂດ ໃຫ້ຮູ້ວ່າ: ຜູ້ເສຍຊີວິດຊື່ທ້າວ ບຸນທັນ ອາຍຸ 70 ປີ ປະຊາຊົນຢູ່ບ້ານສອນໄຊ ເມືອງໄກສອນ ພົມວິຫານ ຖືກທ້າວ ເພັດສະໝອນ ຫຼື ແຫຼ້ ອາຍຸ 31 ປີ ຜູ້ເປັນລູກຊາຍ ໃຊ້ມີດແທງເຂົ້າຊ່ວງທ້ອງຈົນໄສ້ໂປດອອກ ເຮັດໃຫ້ເສຍຊີວິດຄາທີ່ ຫຼັງຈາກກໍ່ເຫດ ລູກຊາຍໄດ້ເອົາຕົວຫຼົບໜີ ຈາກນັ້ນຜູ້ກ່ຽວກໍ່ກັບມາເຮືອນ ເພື່ອຈະຂໍໂທດພໍ່ ແຕ່ບໍ່ທັນ ຍ້ອນພໍ່ເສຍຊີວິດໄປແລ້ວ ແລະ ຕໍ່ມາຜູ້ກ່ຽວກໍ່ຖືກເຈົ້າໜ້າທີ່ກັກຕົວ.
ຜູ້ຖືກຫາສາລະພາບພ້ອມທັງນ້ຳຕາ ຕໍ່ພະນັກງານສືບສວນ-ສອບສວນວ່າ: ເວລາປະມານ 2:00 ໂມງ ຂ້ອນແຈ້ງຂອງມື້ເກີດເຫດ ຜູ້ກ່ຽວຫິວຢາບ້າ ຈຶ່ງຕ້ອງການເງິນເພື່ອໄປຊື້ຢາບ້າມາເສບ ກໍ່ເລີຍໄປຂໍເງິນນຳພໍ່ ແຕ່ພໍ່ບໍ່ໃຫ້ ດ້ວຍຄວາມຫິວຢາບ້າຢ່າງແຮງ ບວກກັບຄວາມໂມໂຫໂທໂສ ຈົນຄວບຄຸມສະຕິບໍ່ໄດ້ ຈຶ່ງຈັບເອົາມີດເຂົ້າໄປແທງພໍ່ ເພື່ອເອົາແຫວນຄຳ ໜັກ 2 ສະຫຼຶງທີ່ໃສ່ຢູ່ນີ້ວມືຂອງພໍ່ ໄປຂາຍເອົາເງິນໄປຊື້ຢາບ້າມາເສບ.
