ລັດຖະບານກຽມຫາວິທີເພີ່ມມາດຕະການໃນການຄຸ້ມຄອງກວດກາການນຳໃຊ້ເຄືອຂ່າຍສື່ສານເອເລັກໂຕຣນິກ (ສື່ສັງຄົມອອນລາຍ), ຫລັງຈາກເຫັນວ່າການຄຸ້ມຄອງບັນຫາດັ່ງ ກ່າວຍັງເຮັດໄດ້ເບົາບາງ ແລະ ເຮັດໃຫ້ກຸ່ມຄົນບໍ່ຫວັງດີຕໍ່ປະເທດຊາດນຳໃຊ້ເປັນເຄື່ອງມືໂຈມຕີແນວທາງຂອງພັກ ແລະ ລັດ ແລະ ມ້າງເພຄວາມສາມັກຄີຂອງປະຊາຊົນບັນດາເຜົ່າ.
ບັນຫາດັ່ງກ່າວໄດ້ມີການຫາລືໃນກອງປະຊຸມຄະນະລັດ ຖະບານໃນລະຫວ່າງວັນທີ 13- 14 ມັງກອນນີ້ ໂດຍການເປັນປະທານຂອງທ່ານນາຍົກລັດ ຖະມົນຕີ ທອງສິງ ທຳມະວົງ ແລະ ທ່ານນາງ ບຸນເພັງ ມູນໂພໄຊ ລັດຖະມົນຕີປະຈຳຫ້ອງວ່າ
ການລັດຖະບານ ທັງເປັນໂຄສົກລັດຖະບານ ໄດ້ອອກມາເປີດເຜີຍໃຫ້ຮູ້ຕໍ່ບັນຫາດັ່ງກ່າວວ່າ: ໃນກອງປະຊຸມຄັ້ງນີ້ ນອກຈາກໄດ້ມີການຮັບຟັງບົດລາຍງານວຽກງານສຳຄັນອື່ນໆຂອງຊາດແລ້ວ, ກອງປະຊຸມຍັງໄດ້ມີການລາຍງານກ່ຽວກັບການຄຸ້ມຄອງນຳໃຊ້ລະບົບເຄືອຂ່າຍສື່ສານເອເລັກໂຕຣນິກ (ສື່ສັງຄົມອອນລາຍ) ເຊິ່ງໝາຍເຖິງການນຳໃຊ້ເຕັກໂນໂລຊີຂອງເວບໄຊ ແລະ ເຕັກໂນໂລຊີມືຖືໃນການສ້າງ, ເຜີຍແຜ່, ແລກປ່ຽນ ແລະ ເຂົ້າເຖິງຂໍ້ມູນຂ່າວສານຕ່າງໆໄດ້ຢ່າງວ່ອງໄວ ດ້ວຍຄຸນລັກສະນະ ແລະ ຄວາມສາມາດຂອງລະບົບດັ່ງກ່າວ ຈຶ່ງເຮັດໃຫ້ມີການນຳໃຊ້ຫລາຍ ແລະ ຈຳນວນກໍເພີ່ມຂຶ້ນຢ່າງໄວ ວາ ເຊິ່ງຈຳນວນຜູ້ໃຊ້ນັ້ນ
ມີທັງຜູ້ເຈດຕະນາດີ ແລະ ເຈດຕະນາບໍ່ດີ ຈຶ່ງເກີດມີດ້ານດີ ແລະ ດ້ານຫຍໍ້ທໍ້ໃນສັງຄົມລາວປັດຈຸບັນ. ສະນັ້ນ, ໃນຕໍ່ໜ້ານີ້ ກອງປະຊຸມໄດ້ມອບໃຫ້ກະຊວງກ່ຽວຂ້ອງກວດກາຄືນບັນດານິຕິກຳຕ່າງໆທີ່ພົວພັນກັບບັນຫາດັ່ງກ່າວ ແລະ ໃຫ້ເຂັ້ມງວດໃນການກວດກາ ແລະ ຕອບຕ້ານດ້ວຍວິທີການຕ່າງໆໃຫ້ທັນການ. ພ້ອມດຽວກັນນັ້ນກໍໃຫ້ເອົາໃຈໃສ່ໂຄສະນາເຜີຍແຜ່, ສ້າງຈິດສຳນຶກ ແລະ ໃຫ້ການສຶກສາແກ່ສັງຄົມໂດຍສະເພາະນັກຮຽນ ແລະ ຊາວໜຸ່ມກ່ຽວກັບຜົນດີ ແລະ ຜົນກະທົບດ້ານລົບຂອງການນຳໃຊ້ສື່ດັ່ງກ່າວໂດຍເລີ່ມຈາກຄອບຄົວ, ໂຮງຮຽນ ແລະ ອື່ນໆ.
