ໄວໜຸ່ມກວນເມືອງເລີ່ມກັບມາກໍ່ກວນຄວາມບໍ່ສະຫງົບໃນສັງຄົມຊຶ່ງບໍ່ພຽງ ແຕ່ຂັບຂີ່ລົດເປັນພຶງເປັນແພຕາມຖະໜົນເທົ່ານັ້ນ, ການເຄື່ອນໄຫວຂອງພວກເຂົາຍັງ ມີຄວາມອັນຕະລາຍຂຶ້ນໂດຍມີການໃຊ້ອາວຸດປືນຍິງນາບຂູ່ຜູ້ໃຊ້ຖະໜົນດັ່ງປາກົດ ການເກີດຂຶ້ນໃນຕອນເຊົ້າວັນທີ 20 ຕຸລານີ້ ຢູ່ໄຟແດງຮ່ອງແຊງບ້ານ ໂພນເຄັງ ເມືອງ ໄຊເສດຖາ ນະຄອນຫຼວງວຽງຈັນ ມີກຸ່ມ ໄວໜຸ່ມກວນເມືອງຂັບຂີ່ລົດເປັນ ສາຍຍາວ ຫຼາຍແມັດໄປຕາມຖະໜົນແລ້ວໃຊ້ອາວຸດປືນຍິງຂຶ້ນທ້ອງຟ້າ ແລະ ຍິງຂູ່ຜູ້ທີ່ພວມ ໃຊ້ຖະໜົນຢູ່ເຂດດັ່ງກ່າວເຮັດໃຫ້ສັງຄົມມີຄວາມຢ້ານກົວ ແລະ ສ້າງຄວາມບໍ່ເປັນລະ ບຽບຮຽບຮ້ອຍໃນສັງຄົມ.
ປະຊາຊົນທີ່ຢູ່ແຄມຖະໜົນຕ່າງກໍທົນບໍ່ໄຫວຕໍ່ພຶດຕິກຳຂອງກຸ່ມແກ໊ງໄວໜຸ່ມ ດັ່ງກ່າວອັນໄດ້ສ້າງຄວາມອັນຕະລາຍຮ້າຍແຮງຂຶ້ນທຸກຂະນະຊຶ່ງພວກເຂົາໄດ້ມີການລວມກັນແລ້ວຂັບຂີ່ລົດເປັນພຶງເປັນແພໄປຕາມເສັ້ນທາງ, ສົ່ງສຽງເນືອງນັນ .ພົ້ນເດັ່ນແມ່ນມີການໃຊ້ອາວຸດປືນຍິງຂຶ້ນຟ້າ ແລະ ຍິງໃສ່ຜູ້ທຽວທາງຢ່າງບໍ່ຢ້ານກົວຕໍ່ລະບຽບກົດໝາຍແຕ່ຢ່າງໃດ.
ທ່ານ ພັນຕີ ຢຸດຕະພົງ ສຸວັນນະສິງ ຮອງຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ: ບັນ ຫາຫຍໍ້ທໍ້ດັ່ງກ່າວ ເຊິ່ງສ່ວນໃຫຍ່ຈະເປັນໄວໜຸ່ມອາຍຸ 13 ຫາ 15 ປີ ທີ່ຄຶກຄະນອງມີພຶດຕິກຳຂັບຂີ່ລົດເປັນພຶງແພໄປຕາມເສັ້ນ ທາງຕ່າງໆຄືຖະໜົນໄກສອນ ໄປຫາວົງວຽນ 450 ປີ, ຖະໜົນ T4 ແລະ ອື່ນໆພາຍຫຼັງການກັບຈາກການມົ້ວສຸມຢູ່ສະຖານບັນເທີງ, ຮ້ານກິນດື່ມໂດຍສະເພາະໃນເວລາ 12 ໂມງ ຫາ 4 ໂມງເຊົ້າ ແລະ ມັກມີການຈັດຕັ້ງເປັນກຸ່ມກັນໃນທຸກແລງວັນສຸກ ແລະ ວັນເສົາ ໂດຍຈະມີເພດຍິງເຂົ້າຮ່ວມນຳດ້ວຍ. ຜ່ານມາ, ເຈົ້າໜ້າທີ່ກໍໄດ້ມີການສະກັດກັ້ນ ແລະ ແກ້ໄຂກຸ່ມແກ໊ງກວນເມືອງດັ່ງກ່າວມາເປັນປະຈຳ, ແຕ່ກໍເຫັນວ່າຍັງພົບຂໍ້ຫຍຸ້ງຍາກເນື່ອງຈາກວ່າແກ໊ງກວນເມືອງຈະເຮັດແບບມີການຈັດຕັ້ງ, ມີຫົວໂປ່ໂຕການ ແລະ ມີການນຳພາຈາກບຸກຄົນທີ່ມີອິດທິພົນຊຶ່ງນອກຈາກຈະເປັນຂະບວນລົດຈັກແລ້ວຍັງໃຊ້ລົດໃຫຍ່ຂັບຂີ່ເພື່ອເປີດທາງເພື່ອຫຼີກເວັ້ນ ໃນເວລາເຈົ້າໜ້າທີ່ອອກສະກັດກັ້ນ ແລະ ກໍໄດ້ປະສານສົມທົບໄປຫາເຈົ້າໜ້າທີ່ກອງພັນເຄື່ອນທີ່, ເຈົ້າໜ້າທີ່ຈະລາຈອນ ເມືອງ ເພື່ອເພີ່ມທະວີການກວດກາຕາມເສັ້ນທາງແນໃສ່ສະກັດກັ້ນປາກົດການຫຍໍ້ທໍ້ດັ່ງກ່າວໃຫ້ຫຼຸດຜ່ອນລົງ.
