ໂດຍ : ນັກຂ່າວອາສາ
ຟັງແລ້ວກໍໜ້າແປກ, ແຕ່ຕົວຈິງແລ້ວມັນບໍ່ແມ່ນແນວນັ້ນມັນແມ່ນຫໍພິພິທະພັນແຂວງຊຽງຂວາງຕັ້ງຢູ່ເທສະບານແຂວງດັ່ງ ກ່າວເປັນຫໍໃຫຍ່ສູງ 3 ຊັ້ນ ພ້ອມມີຫ້ອງໃຕ້ດິນທີ່ຫາກໍສຳເລັດການກໍ່ສ້າງໃນມູນຄ່າຫລາຍກວ່າ 4 ຕື້ ກີບ, ທາງໃນມີຫລາຍ ຫ້ອງສຳລັບໄວ້ເປັນຫ້ອງວາງສະແດງ ແລະ ຫ້ອງການຂອງຂະແໜງການກ່ຽວຂ້ອງ, ແຕ່ການກໍ່ສ້າງບໍ່ໄດ້ມາດຕະຖານເຮັດໃຫ້ ຫລັງຄາຮົ່ວລົງ ມາເປັນຈຳນວນຫລາຍມື້ໃດຝົນຕົກໜັກຊັ້ນໃຕ້ດິນກໍກາຍເປັນໜອງລ້ຽງປາ ແລະ ຫ້ອງການຕ່າງໆແຕ່ຊັ້ນ 3 ລົງມາກໍ ຕ້ອງໄດ້ອົບ ພະຍົບໄປຫລົບຢູ່ບ່ອນອື່ນ, ສ່ວນເຄື່ອງວາງສະແດງເຊັ່ນ: ເຄື່ອງວັດຖຸບູຮານ, ອາວຸດຍຸດໂທປະກອນ ແລະ ຮູບພາບກໍແມ່ນປະໄວ້ ຕາມເປັນຕາມເກີດ.
ນັກຂ່າວທ້ອງຖິ່ນລາຍງານ ວ່າ: ຫໍພິພິທະພັນແຫ່ງນີ້ ພາຍຫລັງກໍ່ສ້າງສຳເລັດ ແລະ ມອບ- ຮັບຢ່າງເປັນທາງການແລ້ວ, ແຂວງ ໄດ້ມອບໃຫ້ຂະແໜງວັດທະນະທຳເປັນຜູ້ນຳໃຊ້ເຮັດເປັນບ່ອນວາງສະແດງຮູບພາບ ແລະ ເຄື່ອງວັດຖຸພັນຕ່າງໆ. ພ້ອມນຳໃຊ້ເປັນ ບ່ອນຈັດກິດຈະກຳຂອງສູນວັດທະນະທຳເດັກ ແລະ ເຮັດ ເປັນຫ້ອງການຂອງຂະແໜງການດັ່ງກ່າວ, ສ່ວນດ້ານນອກກໍໄດ້ປັບປຸງ ເປັນສວນສາທາລະນະໂດຍມີການຕົກແຕ່ງ ແລະ ເປັນບ່ອນອອກກຳລັງກາຍຂອງທົ່ວສັງຄົມ. ແຕ່ໃນສະພາບດັ່ງກ່າວກໍຍັງບໍ່ທັນ ເຫັນມີພາກສ່ວນໃດຍື່ນມືເຂົ້າມາປົວແປງ, ຖ້າປະປ່ອຍໄວ້ດົນກໍອາດຈະສົ່ງຜົນໃຫ້ມີການ ສູນເສຍເພາະປັດຈຸບັນກໍມີສະພາບນ້ຳອັ່ງ ແລະ ມີກິ່ນເໝັນເກີດຂຶ້ນແລ້ວຖືວ່າຊັ້ນໃຕ້ດິນອາດຕົກຢູ່ໃນສະພາບເສື່ອມເສຍ ຫລາຍແລ້ວ.
ດັ່ງນັ້ນ, ຈຶ່ງຮຽກຮ້ອງພະແນກກ່ຽວຂ້ອງຕ້ອງຮີບຮ້ອນກວດກາຕີລາຄາເພື່ອຂຶ້ນແຜນຂໍງົບປະມານຈາກແຂວງມາປົວແປງໃຫ້ ສຳເລັດໂດຍໄວ ເພາະນີ້ເປັນໂຄງການກໍ່ສ້າງສຳຄັນ ແລະ ເປັນໃບໜ້າຂອງທ້ອງຖິ່ນ ແລະ ກໍເປັນໂຄງການໜຶ່ງໄດ້ຮັບທຶນຊ່ວຍ ເຫລືອຈາກຕ່າງປະເທດນຳອີກ.
