Pasalao

ຝາກເຖິງກະ­ຊວງພາຍໃນ

ກອງ ບ.ກ ໄດ້ຮັບ ຈ.ມ ລົງວັນທີ 8/7/2013 ຈາກເພື່ອນຜູ້ອ່ານນາມວ່າ: ທ.ບຸນໂຮມ ປະ­ຕິ­ວັດ ທີ່ສ່ອງແສງເລື່ອງຂໍ້ມູນໃນປຶ້ມຄຳຖາມ-ຄຳຕອບສອບ­ເສັງເຂົ້າເປັນລັດ­ຖະ­ກອນ ແຫ່ງ ສປປ ລາວ ພາກຄວາມຮູ້ທົ່ວໄປ (ລະ­ດັບຊັ້ນສູງຂຶ້ນໄປ) ທີ່ພິມໂດຍກະ­ຊວງພາຍໃນ (2013).

ບ.ກ ຕົກ­ໃຈເມື່ອອ່ານຄຳສ່ອງແສງ ແຕ່ເວ­ລາໄປກວດເບິ່ງຕົວຈິງ ກໍເຫັນວ່າຖືກຕາມເພື່ອນສ່ອງແສງແທ້ ?.

ທາງອອກນັ້ນ ກະ­ຊວງພາຍໃນ ຄວນອອກມາຊີ້ແຈງ ແລະ ແກ້ການພິມຄຳຕອບ ເຊິ່ງຄິດວ່າອາດຜິດ­ພາດດ້ານເຕັກ­ນິກ ເພາະໃນຄຳຖາມໜຶ່ງມີສີ່ຄຳຕອບ ໃນນັ້ນ ມີຄຳຕອບຖືກ ! ພຽງແຕ່ວ່າ ເວ­ລາພິມນັ້ນອາດຜິດ­ພາດໃນການໝາຍຂໍ້ ຖືກ ບໍ່ກົງກັບຕົວອັກ­ສອນທໍ່ນັ້ນ !.

ບ.ກ ກໍເປັນຫ່ວງຫຼາຍຫາກວ່າຈະມີການສອບ­ເສັງໃນເດືອນກັນ­ຍາ (9) ນີ້.

ເນື້ອໃນ ຈ.ມ ສ່ອງແສງມີດັ່ງ­ນີ້: ສະ­ບາຍ­ດີ ທ່ານ ບ.ກ ວຽງຈັນໃໝ່.

ຂ້າ­ພະ­ເຈົ້າ ທ.ບຸນໂຮມ ປະ­ຕິ­ວັດ ຢູ່ບ້ານໂພນສະ­ຫວ່າງ ເມືອງຈັນ­ທະບູລີ ມີຂໍ້ຂ້ອງໃຈກ່ຽວກັບຄຳຖາມສອບ­ເສັງເຂົ້າເປັນລັດ­ຖະ­ກອນທີ່ກະ­ຊວງພາຍໃນ ໄດ້ພິມອອກ ແລະ ຈຳ­ໜ່າຍໃຫ້ນັກສຶກສາທີ່ສະ­ໝັກເສັງເຂົ້າເປັນລັດ­ຖະ­ກອນນັ້ນ ຜ່ານການອ່ານເບິ່ງຄຳຖາມ ແລະ ຄຳຕອບທີ່ກະ­ຊວງພາຍໃນ ຕອບໃນປຶ້ມພິມນັ້ນ ເຫັນວ່າມີຄວາມຜິດຫຼາຍ ຂໍຍົກຕົວ­ຢ່າງບາງຕົວ­ຢ່າງທີ່ກະ­ຊວງພາຍໃນຕອບຜິດໃນປຶ້ມ:

- ຄຳຖາມ 378ຂະ­ແໜງອຸດ­ສາ­ຫະ­ກຳ ແລະ ການຄ້າ ໃຫ້ບໍ­ລິ­ການຂຶ້ນທະ­ບຽນວິສາຫະກິດກ່ຽວກັບກິດ­ຈະ­ການອັນໃດແດ່ ? ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ: ຂໍ້ ງ: ຕອບວ່າ: ກ່ຽວກັບກິດ­ຈະ­ການ ການລົງ­ທຶນຂອງຄົນລາວຢູ່ຕ່າງ­ປະ­ເທດ.

- ຄຳຖາມ 394ພະ­ລັງ­ງານໄຟ­ຟ້າສ່ວນໃຫຍ່ຢູ່ ສປປ ລາວ ແມ່ນໄດ້ມາຈາກແຫຼ່ງໃດ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ ຂໍ້ ກ: ນິວເຄຼຍ.

- ຄຳຖາມ 407ໝວດແຮ່ທາດອະໂລ­ຫະ ປະ­ກອບມີຫຍັງແດ່ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ: ຂໍ້ ກ. ຕອບວ່າ: ຄຳ ເງິນ ທອງ ຊືນ ສັງ­ກະ­ສີ ເຫຼັກ ກົ່ວ ແລະ ອື່ນໆ.

- ຄຳຖາມ 408ໝວດແຮ່ທາດແຫຼວປະ­ກອບມີຫຍັງແດ່ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ ຂໍ້ ກ. ຕອບວ່າ: ຄຳ ເງິນ ທອງ ຊືນ ສັງ­ກະ­ສີ ເຫຼັກ ກົ່ວ ແລະ ອື່ນໆ.

- ຄຳຖາມ 410ວິສາຫະກິດໄຟ­ຟ້າລາວ ຂຶ້ນກັບກະ­ຊວງໃດຄຸ້ມຄອງ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມຂໍ້ ຂ. ກະ­ຊວງວິ­ທະ­ຍາ­ສາດ ແລະ ເຕັກໂນໂລຊີ.

- ຄຳຖາມ 411ສາມ­ຫຼ່ຽມຄຳ ມີປະ­ເທດໃດແດ່ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ ຂໍ້ ຄ. ກຳ­ປູ­ເຈຍ ຫວຽດ­ນາມ ໄທ.

- ຄຳຖາມ 436ອີງຕາມແຜນພັດ­ທະ­ນາເສດ­ຖະ­ກິດ-ສັງ­ຄົມຂອງລັດ­ຖະ­ບານ ສປປ ລາວ ຈະຫຼຸດພົ້ນຈາກຄວາມດ້ອຍພັດທະນານໃນປີໃດ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ ຂໍ້ ງ. ປີ 2030.

- ຄຳຖາມ 471ບໍ­ລິ­ສັດໄປ­ສະ­ນີລາວ ແມ່ນຂຶ້ນກັບກະຊວງໃດ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ ຂໍ້ ງ. ກະ­ຊວງອຸດ­ສາ­ຫະ­ກຳ ແລະ ການຄ້າ.

- ຄຳຖາມ 473ສະ­ຖາ­ນີລົດ­ໄຟແຫ່ງທຳອິດຢູ່ ສປປ ລາວ ເອີ້ນຊື່­ວ່າແນວ­ໃດ ?

ຄຳຕອບທີ່ກະ­ຊວງພາຍໃນ ຕອບໃນປຶ້ມພິມ ຂໍ້ ກ. ສະ­ຖາ­ນີວຽງຈັນ.

ຄຳຖາມ ແລະ ຄຳຕອບທີ່ຍົກຂຶ້ນນີ້ ພຽງເປັນຕົວ­ຢ່າງເທົ່ານັ້ນ ແຕ່ຍັງເຫັນຫຼາຍໆສິບຄຳຖາມທີ່ຕອບຜິດ ສ່ວນຕົວມີຄວາມເປັນຫ່ວງນຳລູກຫຼານ ໃນເມື່ອເຂົາຕອບຖືກ ເພິ່ນຜູ້ກວດພັດຊິໄປເວົ້າວ່າ ຜູ້້ເຂົ້າເສັງຕອບຜິດ ຍ້ອນຜູ້ກວດຈະກວດດ້ວຍລະ­ບົບຄອມພີວເຕີ ສະ­ນັ້ນ ເປັນຫ່ວງຫຼາຍ ຈະເປັນຊ່ອງຫວ່າງເຮັດໃຫ້ເດັກ­ນ້ອຍພາດໂອ­ກາດໃນການຈະໄດ້ຄະ­ແນນ.

ສະ­ນັ້ນ ຈຶ່ງຂໍຄວາມຮ່ວມມືນຳທ່ານຊ່ວຍລົງໜັງ­ສື­ພິມໃຫ້ດ່ວນດ້ວຍ ເພື່ອໃຫ້ກະ­ຊວງພາຍໃນພິ­ຈາ­ລະ­ນາຄືນ­ໃໝ່ ວິ­ທີການສອບ­ເສັງແບບນີ້ ເພາະລູກຫຼານຈະເສັງໃນເດືອນກັນຍາ (9) ນີ້.

ດ້ວຍຄວາມນັບ­ຖື ແລະ ຮັກ­ແພງ

ນະ­ຄອນ­ຫຼວງວຽງຈັນ ວັນທີ 8/7/2013

ຈາກ: ບຸນໂຮມ

ກ່າຍມາຈາກຄໍລ່ຳ ນານາສາລະ ໜັງສືພິມວຽງຈັນໃໝ່ ສະບັບວັນທີ 10 ກໍລະກົດ 2013 ເນີ່ !!