ສະມາຄົມການສຶກສາພາກເອກະຊົນສະເໜີໃຫ້ກະຊວງສຶກສາທິການ ແລະ ກິລາເບິ່ງຄືນບັນດານະໂຍບາຍ ແລະ ມາດຕະການທີ່ມີຕໍ່ການສຶກສາພາກເອກະຊົນ ຫລັງເຫັນວ່າມີຫລາຍຈຸດບໍ່ສອດຄ່ອງກັບເງື່ອນໄຂຕົວຈິງ ແລະ ເປັນການຈຳກັດຮັດແຄບໃນການປະກອບສ່ວນພັດທະນາຊັບພະຍາກອນມະນຸດຮັບໃຊ້ສັງຄົມ.
ທ່ານ ດຣ. ສົມເພັດ ຣັຕນະສິມ ປະທານສະມາຄົມການສຶກສາພາກເອກະຊົນ ກ່າວໃນກອງປະຊຸມໃຫຍ່ ຄັ້ງທີ IV ຂອງສະມາຄົມດັ່ງກ່າວ ຢູ່ນະຄອນຫລວງວຽງຈັນໃນວັນທີ 15 ສິງ ຫານີ້ ວ່າ: ໃນໄລຍະຜ່ານມາ, ສະມາ ຄົມການສຶກສາພາກເອກະຊົນກໍເປັນຜູ້ໜຶ່ງທີ່ມີຄວາມຫ້າວ ຫັນປະກອບສ່ວນຊ່ວຍເຫລືອສັງຄົມ ນັບທັງທຶນຮອນ ແລະສະຕິປັນຍາ ແລະ ກໍໄດ້ເອົາໃຈໃສ່ພັດທະນາຕົນເອງເພື່ອຍົກລະດັບ ຄວາມຮູ້ຄວາມສາມາດຂອງຄູອາຈານ ແລະ ປັບປຸງສະຖານທີ່ການສຶກສາເພື່ອຮັບປະກັນຄຸນນະພາບການຮຽນ-ການສອນໃຫ້ດີຂຶ້ນເທື່ອລະກ້າວ. ແຕ່ແນວໃດກໍຕາມ, ການເຄື່ອນໄຫວດຳເນີນທຸລະກິດວຽກງານສຶກສາແມ່ນຍັງມີສິ່ງທ້າ ທາຍຫລາຍ ເຊິ່ງຕ້ອງການໃຫ້ພາກລັດກໍຄືກະຊວງສຶກສາທິການ ແລະ ກິລາ ເບິ່ງຄືນບັນດານະໂຍບາຍທີ່ມີຕໍ່ການສຶກສາພາກເອກະຊົນ
ເຊັ່ນ: ໃຫ້ພາກລັດສືບຕໍ່ສົ່ງເສີມ, ຊຸກຍູ້ການສຶກສາພາກເອກະຊົນດີກວ່າເກົ່າໂດຍສະເພາະບັນດາວິທະຍາໄລທີ່ໄດ້ຮັບອະນຸຍາດເປີດສອນໃນລະດັບຕ່າງໆເຫັນວ່າມີຄຸນນະພາບ ແລະ ມີຄວາມພ້ອມປະຕິບັດໄດ້ຕາມ ມາດຕະຖານຂອງກະຊວງສຶກສາວາງອອກດັ່ງນັ້ນກໍຄວນໃຫ້ວິທະ ຍາໄລດັ່ງກ່າວສືບຕໍ່ຈັດຕັ້ງການຮຽນການສອນຕໍ່ໄປ ເພື່ອເປັນການປະກອບສ່ວນກໍ່ສ້າງຊັບພະຍາກອນຊ່ວຍພາກລັດ ກໍຄືສັງຄົມ ທັງເປັນການເປີດໂອກາດໃຫ້ນັກສຶກສາຜູ້ທີ່ຮຽນດີຮຽນເກັ່ງມີໂອ ກາດໄດ້ເຂົ້າຮຽນສູງຂຶ້ນ ເພື່ອພັດທະນາຕົນເອງໃຫ້ມີຄວາມຮູ້ຄວາມສາມາດກ້າວສູ່ມາດຕະ ຖານສາກົນ ກໍຄືອາຊຽນ, ຄວນເປີດໂອກາດ ແລະ ສ້າງເງື່ອນໄຂໃຫ້ຜູ້ປະກອບການເຫລົ່ານັ້ນເຂົ້າເຖິງກອງທຶນກູ້ຢືມໃນອັດຕາດອກເບ້ຍຕ່ຳ ເພື່ອມີໂອກາດພັດທະນາການສຶກສາພາກເອກະຊົນໃຫ້ເຕີບໃຫຍ່ເຂັ້ມແຂງນັບທັງ ປະລິ ມານແລະຄຸນນະພາບ,ການສອບເສັງບັນຈຸເອົາພະນັກງານຄູໃນແຕ່ລະສົກຮຽນຂອງພາກລັດຂໍສະເໜີໃຫ້ມີການສອບເສັງໃນລະຫວ່າງເດືອນສິງຫາ ເພື່ອຫລີກເວັ້ນການຂາດຄູຂອງໂຮງຮຽນພາກເອກະຊົນເຊິ່ງຜ່ານມາຫລາຍໂຮງຮຽນແມ່ນປະສົບກັບບັນຫາດັ່ງກ່າວຍ້ອນຄູເອກະຊົນຈຳນວນ ໜຶ່ງຕ້ອງປະ ລະການ ສອນໄປ ເສັງເຂົ້າລັດ. ນອກຈາກນີ້ ການເກັບຄ່າຮຽນ ແລະ ຄ່າບໍລິການຕ່າງໆ ກໍຂໍໃຫ້ເປັນໄປຕາມກົນໄກຕະຫລາດລວມເຖິງໃຫ້ພາກ ສ່ວນກ່ຽວຂ້ອງຕ່າງໆ ພິຈາລະ ນາອອກກົດລະບຽບການຄຸ້ມຄອງບັນດາກິດຈະການ, ຫ້າງຮ້ານທີ່ມີຜົນກະທົບຕໍ່ສະຖາບັນການສຶກສາທັງພາກລັດ ແລະ ເອກະຊົນເປັນຕົ້ນຮ້ານກິນດື່ມ, ຮ້ານເກມ, ສະນຸກເກີ, ສະຖານບັນເທີງຕ່າງໆ ບໍ່ຄວນໃຫ້ຢູ່ໃກ້ບໍລິເວນສະຖາບັນການສຶກສາ ເນື່ອງ ຈາກວ່າໃນໄລຍະຜ່ານມາ,ບັນດາ ກິດຈະການເຫລົ່ານັ້ນແມ່ນແຮງດຶງດູດໃຫ້ນັກຮຽນ-ນັກສຶກສາໂຕນຫ້ອງຮຽນເພື່ອໄປມົ້ວສຸມຫລີ້ນກິນຟຸມເຟືອຍ ແລະ ເກີດມີປາກົດການຫຍໍ້ທໍ້ຕ່າງໆຕາມມາ.