ປັດຈຸບັນຫລາຍເສັ້ນທາງເກີດມີສະພາບເປ່ເພເປັນຂຸມເປັນບວກອັນໄດ້ເຮັດໃຫ້ການສັນຈອນມີຄວາມຫຍຸ້ງຍາກ. ຕໍ່ບັນ ຫາດັ່ງກ່າວ, ພາກສ່ວນກ່ຽວຂ້ອງອ້າງວ່າສາເຫດຕົ້ນຕໍແມ່ນເກີດຈາກເສັ້ນທາງບໍ່ມີຮ່ອງລະບາຍນ້ຳ ແລະ ບາງເສັ້ນທາງທີ່ເຄີຍມີຮ່ອງລະບາຍນ້ຳກໍຖືກດິນຖົມຍ້ອນການປຸກສ້າງເຮືອນຂອງປະຊາຊົນ.
ເມື່ອບໍ່ດົນມານີ້, ກອງຄຸ້ມຄອງທາງບົກ ພະແນກໂຍທາທິ ການ ແລະ ຂົນສົ່ງນະຄອນຫລວງ ວຽງຈັນ ໄດ້ພານັກຂ່າວໜັງສືພິມລາວພັດທະນາລົງກວດກາບັນດາເສັ້ນທາງທີ່ເປ່ເພໃນຕົວເມືອງຫລາຍຈຸດເຊັ່ນ: ເສັ້ນທາງຫລວງພະບາງ, ສີໄຄ (13 ເໜືອ), ໜອງບຶກ, ດົງໂດກ ແລະ ເສັ້ນທາງ 13 ໃຕ້ ເຫັນວ່າຈຸດທີ່ມີການເປ່ເພແມ່ນບໍ່ມີຮ່ອງລະບາຍນ້ຳ ເມື່ອມີຝົນຕົກຈຶ່ງເຮັດໃຫ້ນ້ຳຂັງ ແລະ ເກີດການກັດເຊາະເທື່ອລະໜ້ອຍຂອງລົດຜ່ານໄປມາຈາກເປັນຂຸມນ້ອຍແລ້ວກາຍເປັນບວກໃນເວ ລາຕໍ່ມາ.
ວິຊາການກອງຄຸ້ມຄອງທາງບົກ ກ່າວວ່າ: ໃນໄລຍະຜ່ານມາມັກເກີດມີຫາງສຽງຈາກສັງ ຄົມວ່າ: ເສັ້ນທາງທີ່ເປ່ເພໄວແມ່ນເກີດຈາກການກໍ່ສ້າງບໍ່ໄດ້ມາດ ຕະຖານເຕັກນິກ, ແຕ່ຄວາມຈິງແລ້ວ ເສັ້ນທາງທີ່ກໍ່ສ້າງທຸກເສັ້ນແມ່ນເປັນໄປຕາມມາດ
ຕະຖານ ເພື່ອຮັບປະກັນໃຫ້ການໃຊ້ງານມີປະສິດທິພາບ ແລະ ກຸ້ມຄ່າ, ແຕ່ກໍຍອມຮັບວ່າ: ຂອດການຄຸ້ມຄອງຂອງພວກເຮົາຍັງບໍ່ທັນເຮັດໄດ້ດີເທົ່າທີ່ຄວນ. ນອກຈາກນີ້ ການຂະຫຍາຍຕົວຂອງປະຊາກອນ, ການຂະຫຍາຍຂອງຕົວເມືອງກໍມີລັກສະນະໄວວາ ອັນໄດ້ເຮັດໃຫ້ເກີດມີໂຄງການກໍ່ສ້າງສຳນັກ ງານ, ອາຄານ ແລະ ສູນບໍລິການຕ່າງໆ ເຊິ່ງກໍແນ່ນອນວ່າການຂະຫຍາຍ ຕົວຄືດັ່ງກ່າວມັນກໍກະທົບເຖິງການນຳໃຊ້ເສັ້ນທາງບໍ່ໜ້ອຍ, ບ່ອນທີ່ມີການຖົມດິນກໍສົ່ງຜົນກະທົບເຖິງຮ່ອງລະບາຍນ້ຳຈຶ່ງເຮັດໃຫ້ມີການເປ່ເພຄືດັ່ງເຫັນໃນປັດຈຸບັນ.