ມາເບິ່ງຮູບຂົວມິດຕະພາບ ລາວ-ພະມ້າ

Anonymous

Date: Aug 1, 2013

ມາເບິ່ງຮູບຂົວມິດຕະພາບ ລາວ-ພະມ້າ	Permalink

ໄດ້ເກືອບ 13% ແລ້ວ ໂຄງການສ້າງຂົວລາວ-ມຽນມາ ໂຄງການກໍ່ສ້າງຂົວມິດຕະພາບ ລາວ-ມຽນມາ ມູນຄ່າ 6 ລ້ານໂດລາ ໂດຍການລົງທຶນເບື້ອງລະເຄິ່ງຂອງລັດຖະບານສອງປະເທດ ຫລັງໄດ້ເລີ່ມລົງມືກໍ່ສ້າງຢ່າງເປັນທາງການມາແຕ່ກາງເດືອນກຸມພາ 2013 ຮອດປະຈຸບັນມີ ຄວາມຄືບຫນ້າແລ້ວເກືອບ 13% ໂດຍຫົວຫນ້າໂຄງການເປີດເຜີຍຫນ້າວຽກທີ່ໄດ້ຈັດຕັ້ງປະຕິບັດປະກອບມີວຽກຕັດດິນ ແລະ ກໍ່ສ້າງເຂັມເຈາະ. ທ້າຍອາທິດຜ່ານມາ ທີມຂ່າວເສດຖະກິດໄດ້ຮັບການລາຍງານຄວາມຄືບຫນ້າຂອງໂຄງການກໍ່ສ້າງຂົວມິດຕະພາບລາວ-ມຽນມາ ຈາກທ່ານ ໄຊສົງຄາມ ມະໂນທັມ ເຊິ່ງເປັນເຈົ້າຂອງໂຄງການດັ່ງກ່າວລະບຸວ່າ: ໂຄງການຫລັງ ໄດ້ລົງມືຈັດຕັ້ງປະຕິບັດຢ່າງເປັນທາງການນັບແຕ່ວັນທີ 16 ກຸມພາ 2013 ເປັນຕົ້ນມາ ບັນດາຫນ້າວຽກຕ່າງໆຂອງ ທັງສອງຝ່າຍຂອງລາວ ແລະ ມຽນມາ ກໍ່ໄດ້ຮັບຄວາມເອົາໃຈໃສ່ໃນການດຳເນີນງານໄດ້ເປັນຢ່າງດີ ສະເພາະເບື້ອງ ລາວແມ່ນໄດ້ປະຕິບັດວຽກຢ່າງຂຸ້ນຂ້ຽວເປັນຕົ້ນແມ່ນດຽວນີ້ໄດ້ສຸມໃສ່ຫນ້າວຽກຕັດດິນ ແລະ ກໍ່ສ້າງເຂັມເຈາະເຮັດໃຫ້ອັດຕາການສະເລ່ຍລວມຄວາມຄືບຫນ້າໄດ້ແລ້ວປະມານ 12,68% ຂອງຫນ້າວຽກທັງຫມົດ. ຂະນະທີ່ເມື່ອຕົ້ນເດືອນກໍລະກົດນີ້ ໂຄງການດັ່ງກ່າວກໍ່ໄດ້ມີການເຊັນຮັບເຫມົາຜະລິດ ແລະ ສະຫນອງຂາງເຫລັກ ພ້ອມອຸປະກອນຕິດຕັ້ງລະຫວ່າງກົມຂົວທາງກະຊວງໂຍທາທິການ ແລະ ຂົນສົ່ງຂອງລາວຮັບກັບກົມໂຍທາທິການກະຊວງກໍ່ສ້າງຂອງ ສສ ມຽນມາ ໃນນາມເຈົ້າຂອງໂຄງການຮ່ວມກັບບໍລິສັດອຸດສາຫະກຳຮາຊອນແຫ່ງ ສປ ຈີນໃນນາມຜູ້ຮັບເຫມົາ ເຊິ່ງການເຊັນສັນຍາຊື້ເຫລັກໃນເທື່ອນີ້ແມ່ນຈັດຂຶ້ນທີ່ແຂວງຫລວງພະບາງ ສປປ ລາວ. ຫນ້າວຽກໃນສັນຍານີ້ ປະກອບມີວຽກຜະລິດ ແລະ ສະຫນອງຂາງຂົວເຫລັກປະເພດວໍເລັນ (warrant) ທີ່ມີທາງລົດແລ່ນດ້ານໃນ 2 ເລນ, ກວ້າງ 8,5 ແມັດ, ທາງຄົນຍ່າງດ້ານນອກເບື້ອງລະ 1,2 ແມັດ, ສູງ 12 ແມັດ, ຍາວ 3 ຊ່ວງໆລະ 120 ແມັດ ໄປຄຽງຄູ່ກັນນັ້ນ ຜູ້ຮັບເຫມົາຍັງຈະຕ້ອງໄດ້ສະຫນອງເຄື່ອງໄຟຟ້າເຍືອງຂົວ, ເຄື່ອງມື ແລະ ອຸປະກອນສຳລັບປະກອບຂາງຂົວ ທັງສະຫນອງວິຊາການມານຳພາປະກອບຂາງຂົວນຳອີກ ໂດຍສັນຍາຈະເລີ່ມຈັດຕັ້ງປະຕິບັດນັບແຕ່ຕົ້ນເດືອນສິງຫາ 2013 ແລະ ໃຫ້ສຳເລັດພາຍໃນ 6 ເດືອນໃນມູນຄ່າທັງຫມົດ 3,96 ລ້ານໂດລາສະຫະລັດ. ໂດຍທັງຫມົດໂຄງການກໍ່ສ້າງຂົວ ລວມມີມູນຄ່າ 26 ລ້ານໂດລາສະຫະລັດ ທີ່ຈະນຳໃຊ້ງົບປະມານພາຍໃນຂອງລັດຖະບານລາວ ແລະ ມຽນມາ ເຊິ່ງ ທ່ານ ໄຊສົງຄາມ ມະໂນທັມ ກ່າວວ່າ: ຂົວມີທີ່ຕັ້ງຢູ່ບ້ານຫ້ວຍກຸ່ມ ຫ່າງຈາກບ້ານຊຽງກົກ ເມືອງລອງ ແຂວງຫລວງນ້ຳທາປະມານ 15 ກີໂລແມັດ ແລະ ປະມານ 500 ແມັດ ທາງໃຕ້ຂອງບ້ານຊຽງລຽບເມືອງທ່າຂີ້ເຫລັກແຂວງລັດສານຂອງມຽນມາ. ໂຕຂົວມີຄວາມຍາວທັງຫມົດ 691,6 ແມັດ ກວ້າງ 10,9 ແມັດ, ມີທາງລົດແລ່ນ 2 ຄອງ, ກວ້າງ 8,5 ແມັດ, ທາງຍ່າງ 2 ເບື້ອງໆລະ 1,2 ແມັດ ແຕ່ ເປັນຂົວທີ່ມີຂາງປະສົມມີຂາງເຫລັກຍາວ 360 ແມັດ ອອກແບບໃຫ້ຮັບນ້ຳຫນັກລົດບັນທຸກ 10 ລໍ້ໄດ້ປະມານ 75 ໂຕນ, ຮັບແຮງສັ່ນຂອງແຜ່ນດິນໄຫວ ໄດ້ໃນລະດັບ 7 ເຣັກເຕີລົງມາ ແລະ ກຳປັ່ນ 500 ໂຕນສາມາດລອດຜ່ານໄດ້ ໂດຍໂຄງການນີ້ທ່ານຫົວຫນ້າໂຄງການ ກ່າວວ່າ: ຈະໃຫ້ສຳເລັດພາຍໃນກາງເດືອນສິງຫາ 2015 ຫລື ໃຊ້ເວລາໃນການກໍ່ສ້າງປະມານ 30 ເດືອນ. ຂະນະທີ່ທ່ານ ໄຊສົງຄາມ ມະໂນທັມ ຢ້ຳວ່າ: ຫາກໂຄງການສ້າງຂົວນີ້ ສຳເລັດຈະກາຍເປັນສັນຍະລັກແຫ່ງສາຍພົວພັນການຮ່ວມມື ແລະ ຄວາມສາມັກຄີລະຫວ່າງປະຊາຊົນຂອງສອງປະເທດລາວ ແລະ ມຽນມາ ໂດຍຈະເຊື່ອມຕໍ່ທາງຫລວງເລກທີ 17 ຂອງລາວເຂົ້າກັບທາງຫລວງເລກທີ 4 ຂອງມຽນມາ ເພື່ອແນໃສ່ສ້າງເງື່ອນໄຂອຳນວຍຄວາມສະດວກໃນການໄປ-ມາຫາສູ່ ແລະ ຄ້າຂາຍນຳກັນຂອງປະຊາຊົນທັງສອງຊາດ ລວມທັງບັນດາປະເທດໃນອະນຸພາກພື້ນໂດຍສະເພາະລະຫວ່າງລາວ, ມຽນມາ, ຫວຽດນາມ ແລະ ສປ ຈີນ ຫລື ອາດຂະຫຍາຍໄປສູ່ອິນເດຍ, ບັງກລາເທດ ໂດຍຜ່ານທາງຫລວງເລກທີ 17,13 ແລະ 2E ຂອງລາວ ແລະ ທາງຫລວງເລກ 4 ຂອງມຽນມາ. __________________