ປ່າສະຫງວນແຫ່ງຊາດນ້ຳກ່ານ ເປັນປ່າສະຫງວນແຫ່ງຊາດອັນດັບທີ 21 ຂອງປະເທດ ມີເນື້ອທີ່ຄວາມໃຫຍ່ເປັນອັນດັບທີ 5 ຂອງປະເທດ ມີ 136.000 ເຮັກຕາ ກວມເອົາພື້ນທີ່ປ່າໄມ້ຂອງ 3 ເມືອງຄື: ເມືອງຫ້ວຍຊາຍ ເມືອງເມິງ ແຂວງບໍ່ແກ້ວ ແລະ ເມືອງພູວຽງຄາ ແຂວງຫຼວງນ້ຳທາ ແຕ່ພື້ນທີ່ສ່ວນໃຫຍ່ແມ່ນນອນຢູ່ເມືອງຫ້ວຍຊາຍເປັນປ່າສະຫງວນແຫ່ງຊາດ ທີ່ມີຄວາມອຸດົມສົມບູນໄປດ້ວຍປ່າໄມ້ ແລະ ສັດປ່ານາໆຊະນິດ ເໝາະແກ່ການທ່ອງທ່ຽວທາງທຳມະຊາດ ແລະ ເປັນແຫຼ່ງສຶກສາລະບົບນິເວດວິທະຍາ.
ທ່ານ ຝຣັງຊົວ ປະທານບໍລິສັດອະນຸຮັກຊີວະນາໆພັນ ທັງເປັນເຈົ້າຂອງສະຖານທີ່ແຫຼ່ງທ່ອງທ່ຽວອະນຸຮັກທຳມະຊາດ ຢູ່ເຂດປ່າສະຫງວນແຫ່ງຊາດນ້ຳກ່ານ ແຂວງບໍ່ແກ້ວ ໄດ້ແຈ້ງໃຫ້ນັກຂ່າວພວກເຮົາຊາບເມື່ອບໍ່ດົນຜ່ານມານີ້ວ່າ: ການຖາງປ່າເຮັດໄຮ່ແບບເລື່ອນລອຍ ການລັກລອບຕັດໄມ້ ແລະ ການລ່າສັດແບບຜິດກົດໝາຍຂອງກຸ່ມຄົນບໍ່ຫວັງດີຢູ່ເຂດປ່າສະຫງວນແຫ່ງຊາດນ້ຳກ່ານ ຍັງບໍ່ທັນໄດ້ຮັບການແກ້ໄຂຈາກພາກສ່ວນທີ່ຮັບຜິດຊອບເທົ່າທີ່ຄວນ ເຖິງແມ່ນວ່າໄດ້ນຳສະເໜີໃຫ້ພາກສ່ວນທີ່ກ່ຽວຂ້ອງໃຫ້ຮັບຮູ້ຊ້ຳແລ້ວຊ້ຳອີກກໍຕາມ ກ່ຽວກັບບັນຫາ ແລະ ຄວາມສູນເສຍທີ່ເກີດຂຶ້ນ.
