ໃນວັນທີ 14-15 ກໍລະກົດນີ້, ທ່ານ ພົນໂທ ດວງໃຈ ພິຈິດ ຮອງນາຍົກລັດຖະ ມົນຕີ, ລັດຖະມົນຕີ ວ່າ ການກະຊວງປ້ອງປະເທດ ໄດ້ ເດີນທາງຢ້ຽມຢາມ ແລະ ເຮັດ ວຽກຢູ່ແຂວງອັດຕະປື ແລະ ໃນ ໂອກາດດັ່ງກ່າວ, ທ່ານໄດ້ເດີນ ທາງໄປເບິ່ງ ຄວາມຄືບໜ້າໂຄງ ການກໍ່ສ້າງສະໜາມບິນອັດຕະປື ເຊິ່ງຕັ້ງຢູ່ເຂດບ້ານຫາດຊັນ ເມືອງໄຊເສດຖາຫ່າງຈາກເທສະບານແຂວງໄປຕາມເສັ້ນທາງ 18B 26 ກິໂລແມັດ ໂດຍໄດ້ຮັບການຕ້ອນຮັບຢ່າງອົບ ອຸ່ນ ຈາກ ທ່ານ ຟາມແທັງຖຸ ຜູ້ອຳນວຍການບໍລິສັດ ຮວ່າງແອັງ ປະຈຳແຂວງອັດຕະປືພ້ອມຄະນະ.
ຈາກນັ້ນ, ຜູ້ອຳນວຍການກໍ ໄດ້ລາຍງານຄວາມຄືບໜ້າການກໍ່ສ້າງສະໜາມ ບິນດັ່ງກ່າວ ພາຍຫລັງເລີ່ມລົງມືມາ ແຕ່ຕົ້ນປີ 2012 ແລະ ມາຮອດປັດຈຸບັນສຳເລັດ ແລ້ວປະມານ 20% ຕາມແຜນການ ແລ້ວຈະໃຫ້ສຳເລັດ ແລະ ເປີດນຳໃຊ້ໃນທ້າຍປີ 2013 ໂດຍ ແມ່ນການລົງທຶນກ່ອນຂອງບໍລິ ສັດ ຮວ່າງແອັງຢາລາຍ ໂດຍບໍ່ມີ ດອກເບ້ຍ ໃນ ມູນຄ່າການກໍ່ສ້າງ 40 ລ້ານໂດລາສະຫາລັດ ຫລື ປະ ມານ 32 ຕື້ກີບ. ສະໜາມບິນດັ່ງກ່າວມີເນື້ອທີ່ປະມານ235 ເຮັກຕາ, ຍາວເກືອບ 2 ກິໂລແມັດ, ກວ້າງ 30 ແມັດ ສາມາດຮອງຮັບ ເຮືອບິນຂະໜາດ 70-100 ບ່ອນນັ່ງ ເຊິ່ງ ໄລຍະ ກໍ່ສ້າງຈະແບ່ງອອກເປັນສອງໄລຍະ ຄືໄລຍະທຳ ອິດແຕ່ປີ 2012-2020, ຈາກນັ້ນກໍຈະໄດ້ຍົກລະດັບຂະ ຫຍາຍຄວາມຍາວ ຂອງລານບິນຂຶ້ນເປັນ 3 ກິໂລແມັດ ແລະ ກວ້າງ 45 ແມັດ ເພື່ອຮອງຮັບເຮືອບິນຂະໜາດ 150-250 ບ່ອນນັ່ງສາມາດລົງ ຈອດໄດ້.
ໃນໂອກາດດັ່ງກ່າວ, ຮອງນາຍົກລັດຖະມົນຕີ ກໍໄດ້ສະແດງ ຄວາມຊົມເຊີຍຕໍ່ຜົນສຳເລັດຂອງບໍລິສັດ ແລະ ອຳນາດການ ປົກຄອງທ້ອງຖິ່ນທີ່ໄດ້ຕັດສິນໃຈສູງໃນການລົງທຶນສ້າງສະໜາມບິນສຳຄັນແຫ່ງນີ້ ເຊິ່ງເປັນການປະກອບສ່ວນອັນໃຫຍ່ຫລວງ ຕໍ່ການພັດທະນາເສດຖະກິດ-ສັງຄົມ ຂອງຊາດ ທັງຊ່ວຍສ້າງວຽກເຮັດງານທຳ ແລະ ສ້າງລາຍຮັບໂດຍທາງກົງ ແລະ ທາງ ອ້ອມໃຫ້ແກ່ຄົນທ້ອງຖິ່ນນຳອີກ ເພື່ອເລັ່ງໃສ່ຫລຸດຜ່ອນຄວາມທຸກຍາກຂອງ ປະຊາຊົນ.
