Pasalao

ຂ່າວ: ສະໝານ

    ເວລາປະມານ 8:00 ໂມງ ຂອງວັນທີ 21 ມິຖຸນາຜ່ານມາທາງ 13 ໃຕ້ ເຂດບ້ານດອນໜູນ ເມືອງໄຊທານີ ນະຄອນຫຼວງວຽງຈັນ ໄດ້ມີອຸບັດເຫດລົດເມສາຍຕະຫຼາດເຊົ້າຕຳກັບລົດຈັກແຕ່ໂຊກດີລອດຊີວິດຢ່າງບໍ່ໜ້າເຊື່ອ.

 ຕາມຜູ້ເຫັນເຫດການເລົ່າຕໍ່ນັກຂ່າວວ່າ:ກ່ອນເກີດອຸບັດເຫດຄັ້ງນີ້ແມ່ນມີລົດຈັກຈະແອບຊ້າຍເພື່ອຂ້າມທາງ,ແຕ່ມີລົດຕູ້ຮຸ່ນໄດແຊງຂຶ້ນໜ້າເບື້ອງຊ້າຍບໍ່ຫວິດດາດກັນເຮັດໃຫ້ລົດເສຍຫຼັກລົ້ມລົງໃນຂະນະນັ້ນພໍດີກໍ່ມີລົດເມແລ່ນມາຕາມຫຼັງຈິ່ງຢຽບເອົາລົດຈັກຄັນດັ່ງກ່າວ ລາກໄປໜ້າປະມານ50ແມັດຈິ່ງສາມາດຢຸດລົດໄດ້ຈິ່ງເຮັດໃຫ້ລົດຈັກແປຄາທີ່,ສ່ວນຜູ້ຂັບຂີ່ລົດຈັກແມ່ນອອກຈາກລົດທັນຈິ່ງບໍ່ຖືກລົດເມຢຽບ,ພຽງແຕ່ໄດ້ຮັບບາດເຈັບເວລາລົ້ມເທົ່ານັ້ນ(ຫົວເຂົ່າແລະໄລ່ບາດເຈັບເລັກໜ້ອຍ).ຈາກການສອບຖາມຜູ້ຂີ່ລົດຈັກຄັນທີ່ເກີດເຫດເວົ້າໃນລວງດຽວກັບຜູ້ເຫັນເຫດການວ່າ:ຕົນເອງກຳລັງຈະແອບຊ້າຍເພື່ອຂ້າມທາງແຕ່ມີລົດຕູ້ຮຸ່ນໄດແຊງແຕ່ບໍ່ຫວິດລົດດາດກັນເສຍຫຼັກລົ້ມລົງພໍດີລົດເມມາຢຽບເອົາ.ແນວໃດກໍ່ຕາມທາງເຈົ້າໜ້າທີ່ຈະລາຈອນຍັງພິສູດຫາມູນຄວາມຈິງຢູ່ເພື່ອຫາທາງອອກຊ່ວຍຜູ້ຂັບຂີ່ແຕ່ຈະອອກມາຮູບການໃດເຈົ້າໜ້າທີ່ຍັງຢູ່ໃນຂັ້ນສືບສວນ-ສອບສວນເຊິ່ງຕ້ອງໃຊ້ເວລາເພື່ອໄກ່ເກ່ຍກໍລະນີອຸບັດເຫດດັ່ງກ່າວໃຫ້ສຳເລັດ.

ເຫດການດັ່ງກ່າວໄດ້ສ້າງຄວາມຕົກໃຈໃຫ້ແກ່ຝູງຊົນລວມທັງຜູ້ສັນຈອນໄປ-ມາໃນເຂດນັ້ນເປັນຢ່າງຍິ່ງໃນຂະນະດຽວກັນກໍ່ເຮັດໃຫ້ການສັນຈອນຂອງລົດໃນເສັ້ນທາງດັ່ງກ່າວຕິດຂັດຍາວຢຽດຢ່າງສັບສົນ, ສະນັ້ນກໍລະນີນີ້ກໍ່ເປັນສິ່ງໜຶ່ງຈະເຕືອນໃຫ້ແກ່ຜູ້ໃຊ້ລົດໃຊ້ຖະໜົນມີຄວາມລະມັດລະວັງໃນການຂັບຂີ່,ທັງມີສະຕິຕໍ່ລະບຽບຈະລາຈອນຈິ່ງຈະບໍ່ພາໃຫ້ເກີດອຸບັດເຫດ,ທີ່ຈະນຳໄປສູ່ຄວາມເສຍຫາຍທາງດ້ານຊັບສິນແລະຊີວິດ.