ບໍລິສັດ ທ່ອງທ່ຽວ ວິສິດ ເອເຊຍ (Visit Asia Travel) ທຸ່ມເງິນຈໍານວນມະຫາສານສ້າງຣີສອດ ຢູ່ບ້ານດອນຄໍາ ເມືອງປາກ ແບ່ງ ແຂວງອຸດົມໄຊ ໃນມູນຄ່າທັງຫມົດຫລາຍກວ່າ 3,5 ລ້ານໂດລາສະຫະລັດ ຫລັງຈາກທີ່ດໍາເນີນການກໍ່ສ້າງມາແຕ່ຕົ້ນປີ 2011 ໃນເນື້ອທີ່ 48 ກວ່າເຮັກຕາ. ປະຈຸບັນການກໍ່ສ້າງສໍາເລັດແລ້ວໂດຍພື້ນຖານ, ຄາດວ່າຈະເປີດບໍລິການໃນຕົ້ນປີ 2014.
ທ່ານ ເກດ ທິບພະຈັນ ຜູ້ອໍານວຍການບໍລິສັດທ່ອງທ່ຽວ ວິສິດ ເອເຊຍ (Visit Asia Travel) ໃຫ້ຮູ້ວ່າ: ໂຄງການກໍ່ສ້າງຣີສອດ ຢູ່ບ້ານດອນຄໍາ ເມືອງປາກແບ່ງ ແຂວງອຸດົມໄຊ ນັບວ່າເປັນໂຄງການທີ່ໃຫຍ່ເທົ່າທີ່ມີຢູ່ໃນເຂດດັງກ່າວ ໂດຍຈະເນລະມິດໃຫ້ສະຖານທີ່ດັ່ງກ່າວກາຍເປັນແຫລ່ງທ່ອງທ່ຽວ, ພັກຜ່ອນ ແລະ ການບໍລິການແກ່ນັກທ່ອງທ່ຽວພາຍໃນ ແລະ ຕ່າງປະເທດເປັນຕົ້ນແມ່ນ: ເຮືອນພັກ, ຮ້ານອາຫານ, ຫ້ອງຮັບແຂກ, ສະຖານທີ່ອອກກໍາລັງກາຍ, ສະລອຍນ້ໍາ, ນວດ ແລະ ອື່ນໆ. ນອກຈາກນັ້ນ ຍັງເປັນສະຖານທີ່ຊົມທັດສະນີຍະພາບທີ່ສວຍງາມຢູ່ແຄມນ້ໍາຂອງໂດຍຜ່ານຣີສອດແຫ່ງດັ່ງກ່າວ. ໂຄງການກໍ່ສ້າງຣີສອດມີມູນຄ່າການລົງທຶນຫລາຍກວ່າ 3,5 ລ້ານໂດລາສະຫາລັດ ໃນການບຸກເບີກເນື້ອທີ່ 48 ກວ່າເຮັກຕາ. ເຊິ່ງການກໍ່ສ້າງໄດ້ດໍາເນີນງານມາແຕ່ຕົ້ນປີ 2011 ປະຈຸບັນການກໍ່ສ້າງສໍາເລັດໄປແລ້ວໂດຍພື້ນຖານຍັງເຫລືອແຕ່ວຽກຕົກແຕ່ງເລັກນ້ອຍເທົ່ານັ້ນເປັນຕົ້ນແມ່ນ: ການຕົກແຕ່ງ ແລະ ປະດັບປະດາສະຖານທີ່. ໃນເບື້ອງຕົ້ນຄາດວ່າຈະເລີ່ມເປີດບໍລິການໃນທ້າຍປີ 2013 ນີ້, ແຕ່ເນື່ອງຈາກການກະກຽມຍັງບໍ່ພ້ອມເລີຍຕັດສິນໃຈເລື່ອນໄປເປັນປີຫນ້າຈິ່ງຈະເປີດບໍລິການ.
ທ່ານຜູ້ອໍານວຍການກ່າວຕື່ມອີກວ່າ: ການຕັດສິນໃຈລົງທຶນສ້າງຣີສອດແຫ່ງນີ້ເນື່ອງຈາກປະຈຸບັນທາງປະເທດມຽນມາໄດ້ເປີດປະເທດຂອງຕົນໃຫ້ນັກລົງທຶນ ແລະ ນັກທ່ອງທ່ຽວຕ່າງປະເທດເຂົ້າໃນປະເທດຫລາຍຂຶ້ນ. ເມືອງປາກແບ່ງ ຈິ່ງກາຍເປັນທາງຜ່ານຂອງນັກລົງທຶນ, ນັກທ່ອງທ່ຽວທີ່ຈະເຂົ້າມາ ສປປ ລາວ ແລະ ນັກທ່ອງທ່ຽວທີ່ຈະອອກໄປປະເທດມຽນມາ, ເຂດສາມຫລ່ຽມຄໍາ ແລະ ສປ ຈີນ. ເພາະສະນັ້ນທາງບໍລິສັດກໍາລັງສ້າງຢູ່ນີ້ຈະເປັນຈຸດພັກເຊົາທີ່ສຳຄັນໃຫ້ແກ່ນັກທ່ອງທ່ຽວທີ່ຈະຕ້ອງໄດ້ພັກເຊົາຄາດວ່າຫລັງຈາກເປີດບໍລິການຈະສາມາດດຶງດູດເອົານັກທ່ອງທ່ຽວຈາກປະເທດເພື່ອນບ້ານ ໂດຍສະເພາະໃນອາຊີ ແລະ ເຂດເອີຣົບເຂົ້າມາໃຊ້ບໍລິການ, ພ້ອມນັ້ນ ກໍ່ຈະເປັນການສົ່ງເສີມໃຫ້ຂະແຫນງການທ່ອງທ່ຽວຢູ່ໃນເຂດດັ່ງກ່າວມີທ່າຂະຫຍາຍຕົວຂຶ້ນເລື້ອຍໆ.
Small houses help keep the surrounding areas more natural and look better than tall buildings. They need to also plant more trees on the surrounding hills.
