ທຶນຊ່ວຍເຫລືອລ້າ ທີ່ຫາກໍ່ຖືກຮັບຮອງຫລ້າສຸດນີ້ ໄດ້ຢັ້ງ ຢືນເຖິງການສະໜັບສະໜູນຢ່າງຕໍ່ເນື່ອງ ຂອງທະນາຄານໂລກ ໃຫ້ແກ່ ສປປ. ລາວ ໂດຍມີເປົ້າໝາຍແນໃສ່ປັບປຸງປະສິດທິພາບ ແລະ ປະສິດທິຜົນ ຂອງວຽກງານພາສີ ແລະ ສ້າງລະບຽບການພາ ສີ ໃຫ້ມີຄວາມກະທັດຮັດ ທັງເປັນການຊ່ວຍຫລຸດຜ່ອນ ບັນດາຂັ້ນຕອນທີ່ຊ້ຳຊ້ອນ ແລະ ບໍ່ຈຳເປັນ, ຫລຸດຜ່ອນຄ່າໃຊ້ຈ່າຍທາງທຸລະກຳ ແລະ ເວລາໃນການກວດແຈ້ງພາສີ. ໂຄງການອຳນວຍຄວາມສະດວກດ້ານພາສີ ແລະ ການຄ້າ ຍັງແນໃສ່ສະໜັບສະໜູນ ບັນດາເປົ້າໝາຍຂອງລັດຖະບານ ເພື່ອໃຫ້ບັນລຸລະດັບການຂະ ຫຍາຍ ຕົວຂອງເສດຖະກິດ ຊຶ່ງ ຈະຊ່ວຍຂັບເຄື່ອນການຫລຸດຜ່ອນຄວາມທຸກຍາກຢ່າງທົ່ວເຖິງ, ຊ່ວຍປັບປຸງຄວາມໂປ່ງໃສໃຫ້ໜັກແໜ້ນ.
ໂຄງການອຳນວຍຄວາມສະດວກດ້ານພາສີ ແລະ ການຄ້າ ເປັນໂຄງການໜຶ່ງ ທີ່ນອນໃນແຜນງານຊ່ວຍເຫລືອທາງດ້ານການຄ້າ ໃນ ສປປ. ລາວ ທີ່ສະ ໜັບສະໜູນໂດຍທະນາຄານໂລກ ຮ່ວມມືກັບ ອົດສະຕາລີ, ສະຫະ ພາບເອີຣົບ, ເຢຍລະມັນ ແລະ ໄອແລນ. ແຜນງານດັ່ງກ່າວ ຍັງໄດ້ກວມເອົາໂຄງການກອງທຶນຊ່ວຍເຫລືອລ້າຫລາຍຝ່າຍ ເພື່ອພັດທະ ນາດ້ານການຄ້າໄລຍະສອງ ( TDF-2 ) ແລະ ໂຄງການຊ່ວຍເຫລືອທາງວິຊາການ ເພື່ອກຽມພັດທະນາລະບົບບໍລິການປະຕູດຽວ ທາງດ້ານພາສີແຫ່ງຊາດ. ທຶນຊ່ວຍເຫລືອລ້າເພີ່ມຕື່ມນີ້ ຈະສະໜັບສະໜູນກົມພາສີລາວ ຜັນຂະຫຍາຍບັນດາແຜນງານຂອງລັດ ຖະບານທີ່ຕິດພັນກັບວຽກງານການອຳນວຍຄວາມສະດວກທາງດ້ານການຄ້າ ແລະ ການສ້າງຄວາມສາມາດໃນການແຂ່ງຂັນກັບສາກົນ,ສຸມໃສ່ສືບຕໍ່ສະໜັບສະໜູນບັນດາໜ້າວຽກທີ່ສຳຄັນ ເພື່ອຈັດຕັ້ງປະຕິ ບັດກົດໝາຍພາສີສະບັບປັບປຸງໃໝ່ ໃຫ້ມີປະສິດທິຜົນ ແລະ ຜັນຂະຫຍາຍສ້າງເປັນລະບຽບການ ແລະ ຫັນເປັນລະບົບພາສີທີ່ທັນສະໄໝ. ນອກນັ້ນ ຍັງໄດ້ສະໜັບ ສະໜູນການສ້າງຂໍ້ກຳນົດກົດລະ ບຽບ ເພື່ອໃຫ້ສອດຄ່ອງກັບມາດ ຕະຖານສາກົນ ແລະ ນຳໃຊ້ແບບແຜນວິທີການເຮັດວຽກທີ່ດີທີ່ຖືກຮັບຮອງມາແລ້ວ. ທຶນດັ່ງກ່າວ ຍັງຈະໄດ້ຊ່ວຍເຫລືອໃນການພັດ ທະນາຄວາມອາດສາມາດຂອງກົມພາສີໃນໄລຍະຍາວ ເພື່ອໃຫ້ມີຄວາມສາມາດຈັດຕັ້ງຝຶກອົບຮົມ ແລະ ພັດທະນາບຸກຂະລາກອນ ພາຍໃນຂອງຕົນ. ພ້ອມກັນນັ້ນ ຍັງສຸມໃສ່ສະໜັບສະໜູນ ການຂະຫຍາຍຕິດຕັ້ງລະບົບການແຈ້ງພາສີທັນສະໄໝແບບອັດຕະໂນມັດ ໃນດ່ານພາສີຂະໜາດນ້ອຍທີ່ຍັງເຫລືອ ໃນຂອບເຂດທົ່ວປະເທດ ແລະ ສ້າງຄວາມເຂັ້ມແຂງໃຫ້ແກ່ກົມພາສີລາວ ເພື່ອໃຫ້ມີຄວາມສາມາດໃນການບູລະນະ ແລະ ບຳລຸງຮັກສາບັນ ດາພື້ນ ຖານໂຄງລ່າງ ແລະ ລະບົບເຕັກໂນໂລຊີ ຂໍ້ມູນຂ່າວສານຕ່າງໆຂອງຕົນຢ່າງມີປະສິດທິຜົນ.
ພັດທະນາລາວ
