ເພື່ອແກ້ໄຂບັນຫາຄວາມແອອັດຢູ່ສຳນັກງານໃຫຍ່ທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ໃນປະຈຸບັນ, ທຄຕລ ຈິ່ງພະຍາຍາມຫາວິທີແກ້ໂດຍການສ້າງສຳນັກງານໃຫຍ່ໃຫມ່ໃຫຍ່ກວ່າເກົ່າເປັນອາຄານພານິດ 25 ຊັ້ນສະຖານທີ່ກວ້າງກວ່າ 4 ເຮັກຕາ ຢູ່ຖະຫນົນ T4 ບ້ານໂພນປ່າເປົ້າເມືອງສີສັດຕະນາກ, ໂດຍວານນີ້ກໍ່ໄດ້ວາງສີລາລືກລົງມືກໍ່ສ້າງແລ້ວ ເຊິ່ງແມ່ນບໍລິສັດສີເມືອງກຣຸບ ເປັນຜູ້ຮັບເຫມົາກໍ່ສ້າງ ແລະ ລົງທຶນກ່ອນ.
ທ່ານ ວັນຄຳ ວໍລະວົງ ຜູ້ອຳນວຍການໃຫຍ່ທະນາຄານການຄ້າຕ່າງປະເທດລາວ ມະຫາຊົນ ກ່າວວ່າ: ຍ້ອນສະພາບຄວາມຫຍຸ້ງຍາກຕົວຈິງຂອງສະຖານທີ່ໆມີຢູ່ປະຈຸບັນບໍ່ວ່າຈະເປັນສະຖານທີ່ບໍລິການ, ສະຖານທີ່ຈອດລົດຂອງລູກຄ້າ ແລະ ພະນັກງານເພື່ອເປັນການຮອງຮັບການຂະຫຍາຍຕົວດ້ານການບໍລິການຂອງ ທຄຕລ ແລະ ເພື່ອສ້າງ ຄວາມສະດວກໃຫ້ແກ່ລູກຄ້າ, ທະນາຄານຈິ່ງຕັດສິນໃຈກໍ່ສ້າງສຳນັກງານໃຫມ່ຫລັງໃຫຍ່ຂຶ້ນ, ເຊິ່ງສຳນັກງານໃຫມ່ແຫ່ງນີ້ມີເນື້ອທີ່ກວ້າງ 40.764 ຕາແມັດ (4 ເຮັກຕາກວ່າ), ຕົວອາຄານຈະເປັນອາຄານພານິດ 25 ຊັ້ນ, ກວ້າງ 41,5 ແມັດ ແລະ ຍາວ 63,2 ແມັດ, ທີ່ມີການອອກແບບໂຄງສ້າງ-ການຕົກແຕ່ງທັນສະໄຫມເປັນເອກະລັກຂອງ ທຄຕລ ເອງ.
ນີ້ເປັນການຮັບເຫມົາ ແລະ ລົງທຶນກ່ອນຂອງບໍລິສັດສີເມືອງກຣຸບ ດ້ວຍມູນຄ່າການລົງທຶນ 85 ລ້ານໂດລາສະຫະລັດ, ທ່ານ ເອກະພັນ ພະພິທັກ ປະທານກຸ່ມບໍລິສັດສີເມືອງກຣຸບ ຈຳກັດ ກ່າວ: ບໍລິສັດມີຄວາມພ້ອມທຸກດ້ານບໍ່ວ່າຈະເປັນດ້ານການເງິນ, ແຮງງານ, ເຄື່ອງຈັກ ແລະ ອຸປະກອນຮັບໃຊ້ຕ່າງໆທີ່ຈະສຸມໃສ່ໃນການກໍ່ສ້າງໂຄງການນີ້ໃຫ້ສຳເລັດຕາມແຜນກໍ່ຄືສຳເລັດຕາມໄລຍະເວລາທີ່ກຳນົດໄວ້ປະມານ 3 ປີ, ນີ້ເປັນການປະກອບສ່ວນທີ່ດີເພື່ອການພັດທະນາເສດຖະກິດ-ສັງຄົມຂອງປະເທດໃຫ້ມີການພັດທະນາ ແລະ ຂະຫຍາຍຕົວໄວ້ຂຶ້ນຕາມທິດຫັນເປັນອຸດສາຫະກຳ ແລະ ທັນສະໄຫມເທື່ອລະກ້າວ.
ເຂົ້າຮ່ວມໃນການວາງສີລາລືກຄັ້ງນີ້ ໂດຍທ່ານ ຄຳວົງ ທິບພະວົງ ຮອງຜູ້ວ່າການທະນາຄານແຫ່ງ ສປປ ລາວ, ທ່ານ ວັນຄຳ ວໍລະວົງ ຜູ້ອຳນວຍການໃຫຍ່ທະນາຄານການຄ້າຕ່າງປະເທດລາວ ມະຫາຊົນ, ທ່ານ ເອກະພັນ ພະພິທັກ ປະທານບໍລິສັດສີ ເມືອງກຣຸບ ຈຳກັດ ພ້ອມດ້ວຍຄະນະບໍລິຫານ ແລະ ພະນັກງານ ທຄຕລ, ທັງ ແຂກກິດຕິມະສັກເຂົ້າຮ່ວມ.
