(ຂປລ): ກຸ່ມບໍລິສັດດາວເຮືອງ ໄດ້ໃຫ້ການສະໜັບສະໜູນທຶນ ໃນການກໍ່ສ້າງເສັ້ນທາງເບຕົງເສີມເຫລັກ ຂຶ້ນສູ່ສູນປະຕິບັດທຳ ແລະ ເຂດພັດທະນາເປັນແຫລ່ງທ່ອງທ່ຽວທຳມະ ຊາດ ພູສະເຫລົ້າ ເມືອງໂພນທອງ ແຂວງຈຳປາສັກ ຊຶ່ງຮັບເໝົາໂດຍບໍລິສັດ ແອລທີວີ ກໍ່ສ້າງຂົວທາງ ປະຈຸບັນສຳເລັດແລ້ວເກືອບ 100%, ມູນຄ່າການກໍ່ສ້າງທັງໝົດ 27 ຕື້ ກວ່າກີບ ເພື່ອພັດທະນາໃຫ້ເປັນແຫ່ງທ່ອງທ່ຽວສຳຄັນ ຟື້ນຄືນຕຳນານຮັກລະຫວ່າງ ທ້າວ ບາຈຽງ ແລະ ນາງ ມະໂລງ ແນໃສ່ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວແຂວງຈຳປາສັກ ໃຫ້ຫລາຍຂຶ້ນ.
ທ່ານ ສີ ສຸພັນທອງ, ຮອງຜູ້ອຳນວຍການ ບໍລິສັດ ແອລທີວີ ເປີດເຜີຍຕໍ່ນັກຂ່າວວ່າ: ການກໍ່ສ້າງເສັ້ນທາງສາຍນີ້ ໄດ້ເລີ່ມຈັດຕັ້ງປະຕິບັດແຕ່ຕົ້ນປີ 2011 ເປັນທາງເບຕົງເສີມ ເຫລັກ, ມີຄວາມໜາ 1,8 ຊັງຕີແມັດ, ກວ້າງ 8 ແມັດ ແລະ ຍາວ 6 ກິໂລແມັດ, ປະຈຸບັນຍັງເຫລືອ ໜ້າວຽກປັບປຸງຢຽບແໜ້ນສອງຝາກຂ້າງທາງ ແລະ ສ້ອມແປງຮ່ອງລະບາຍ ນ້ຳຕ່າງໆ ໃຫ້ມີຄວາມຮັບປະກັນການຊຸໄຫລຂອງນ້ຳເຮັດໃຫ້ທາງມີຄຸນນະພາບໃຊ້ໄດ້ຍາວນານ ແລະ ຈະໄດ້ມີການມອບ-ຮັບໃນໄວໆນີ້. ອັນໄດ້ອຳນວຍຄວາມສະດວກສະບາຍໃຫ້ແກ່ ມວນຊົນ ຫລື ນັກທ່ອງທ່ຽວ ທີ່ມີຄວາມຕັ້ງໃຈຂຶ້ນໄປທ່ຽວ ແລະ ສັກກາລະບູຊາສິ່ງສັກສິດ ຊຶ່ງຢູ່ເທິງພູສະເຫລົ້າ ໃນປະຈຸບັນ ກຳລັງມີການກໍ່ສ້າງອາຄານສູນປະຕິບັດທຳ, ຫໍກອງ, ພະພຸດທະຮູບອົງຕື້ ຂະໜາດໃຫຍ່ ແລະ ມີພະພຸດທະຮູບ ຂະໜາດນ້ອຍສົມໂພດແລ້ວ 108 ອົງ.
ສຳລັບນັກທ່ອງທ່ຽວທີ່ຂຶ້ນໄປເບື້ອງເທິງ ຈະຫລຽວເຫັນທິວທັດທຳມະຊາດທີສວຍງາມ ຂອງຕົວເມືອງໂພນທອງ, ສາຍນ້ຳຂອງ ແລະ ຂົວຂ້າມນ້ຳຂອງ, ຕົວເມືອງປາກເຊ, ເມືອງ ບາຈຽງຈະເລີນສຸກ ແລະ ບໍລິເວນອ້ອມຮອບ. ສິ່ງສຳຄັນຈະຊອກຮູ້ເຖິງສະຖານທີ່ເກົ່າແກ່ ຕາມທີ່ເຄີຍໄດ້ຍິນໃນນະວະນິຍາຍ ຫລື ພົງສະວາດານ ຕະຫລອດເຖິງການເລົ່າຂານ ກັນມາ ແມ່ນເປັນແຫລ່ງອະລິຍະທຳຕຳນານຮັກ ທີ່ບໍ່ສົມຫວັງຂອງທ້າວບາຈຽງ ແລະ ນາງ ມະໂລງ ແຕ່ສະໄໝດຶກດຳບັນ ທີ່ຫລາຍຄົນໄດ້ຮູ້ມາແຕ່ດົນນານ./.
