Pasalao

ເພື່ອເປັນການຢັ້ງຢືນ ແລະ ຮັບຮູ້ເຖິງຜົນງານການປະກອບສ່ວນຊີ້ນຳ-ນຳພາປວງຊົນລາວທັງຊາດ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຢ່າງມີຜົນສຳເລັດ ໃນໄລຍະແຫ່ງການປ່ຽນແປງໃໝ່ ແລະ ເຊື່ອມໂຍງກັບສາກົນ.

ພິທີມອບໃບປະກາສະນີຍະບັດ ປະລິນຍາເອກກິດຕິມະສັກຂອງ ມະຫາວິທະຍາໄລເສດຖະກິດແຫ່ງຊາດ ສ.ສ ຫວຽດນາມ ໃຫ້ແກ່ບັນດາສະຫາຍການນຳຂັ້ນສູງແຫ່ງ ສປປ ລາວ ໄດ້ມີຂຶ້ນຕອນບ່າຍວັນທີ 25ຕຸລາ 2012ຢູ່ທີ່ສຳນັກງານຫ້ອງວ່າການລັດຖະບານ ເຊິ່ງໃນພິທີອັນສຳຄັນ ແລະ ມີກຽດຄັ້ງນີ້ ມີສະຫາຍ ທອງສິງ ທຳມະວົງ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ ສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດລາວ ແລະ ສະຫາຍ ອາຊາງ ລາວລີ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ແລະ ສະຫາຍ ພົນໂທ ດວງໃຈ ພິຈິດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີວ່າການ ກະຊວງປ້ອງກັນປະເທດ ໄດ້ຮັບປະກາສະນີຍະບັດປະລິນຍາເອກກິດຕິມະສັກ (ລວມທັງໝົດ 4ສະຫາຍ) ໃຫ້ກຽດມອບຄັ້ງນີ້ ໂດຍສະຫາຍ ສຈ.ດຣ. ຫງວຽນ ວັນນາມ ເລຂາຄະນະພັກ ອະທິການບໍດີມະຫາວິທະຍາໄລເສດຖະກິດແຫ່ງຊາດ ສ.ສ ຫວຽດນາມ ເຊິ່ງມີບັນດາລັດຖະມົນຕີວ່າການ ຊ່ວຍວ່າການ ແລະ ຜູ້ແທນຂັ້ນສູງສອງຝ່າຍເຂົ້າຮ່ວມ.

ໂອກາດດັ່ງກ່າວ ສະຫາຍ ທອງສິງ ທຳມະວົງ ໄດ້ກ່າວບາງຕອນສຳຄັນວ່າ: ການມອບປະກາສະນີຍະບັດ ປະລິນຍາເອກກິດຕິມະສັກ ໃຫ້ແກ່ບັນດາການນຳຂັ້ນສູງຄັ້ງນີ້ ກໍເປັນການຊຸກຍູ້ປຸກລະດົມພວກຂ້າພະເຈົ້າ ໃຫ້້ມີມານະຈິດ ແລະ ຄວາມຮັບຜິດຊອບໃນໜ້າທີ່ສູງຂຶ້ນຕື່ມອີກ ເພື່ອຕັ້ງໜ້າປະຕິບັດອຸດົມການຂອງພັກ ເປັນຕົ້ນແມ່ນການສ້າງສາພັດທະນາປະເທດຊາດ ໃຫ້ມີຄວາມເຂັ້ມແຂງ ສັງຄົມມີຄວາມສີວິໄລ ຍຸຕິທຳ ແລະ ປະຊາຊົນບັນດາເຜົ່າມີຄວາມຮັ່ງມີຜາສຸກ ພ້ອມນີ້ຍັງເປັນການຮ່ວມສະເຫຼີມສະຫຼອງ ສອງວັນປະຫວັດສາດ ແຫ່ງສາຍພົວພັນອັນເປັນມູນເຊື້ອ ລະຫວ່າງ ລາວ-ຫວຽດນາມ ໃຫ້ກ້າວສູ່ລະດັບສູງຍິ່ງໆຂຶ້ນຕື່ມອີກ.