ພາຍຫລັງທີ່ມີການຜ່ານໂຄງການວາງຜັງເມືອງລະອຽດເຂດໃຈ ກາງເມືອງເອກຂອງແຂວງວຽງຈັນ ຄັ້ງທີ 2 ທີ່ອອກແບບໂດຍບໍລິສັດນິກເກັງເຊັກເກວິສະວະກຳ ຈຳກັດ, ປະເທດຍີ່ປຸ່ນ; ໃນວັນທີ 12 ຕຸລາ 2012 ນີ້, ທີ່ຫ້ອງວ່າການປົກຄອງແຂວງວຽງຈັນ; ໂດຍອຳນາດການປົກຄອງ ແຂວງໄດ້ເຫັນດີເອກະພາບ ແຕ່ຍັງມີບາງຈຸດທີ່ຈະຕ້ອງໄດ້ແກ້ໄຂເຊັ່ນ: ລະບົບເສັ້ນທາງ, ລະບົບສາຍສົ່ງໄຟຟ້າ ແລະ ລະບົບນ້ຳປະປາ, ຈັດສັນສະຖານທີ່ເພື່ອສ້າງເຮືອນຕຳແຫນ່ງໃຫ້ບັນດາຫົວຫນ້າພະແນກການ ແລະ ຕາມສຳນັກງານຈະໄດ້ເພີ່ມຮ້ານອາຫານບໍລິ ການຢູ່ໃກ້ໆ, ຄາດວ່າຈະໄດ້ພາບຈຳລອງເຂດໃຈກາງ ເມືອງເອກດັ່ງກ່າວແບບສົມບູນໃນທ້າຍເດືອນຕຸລາ 2012 ນີ້.
ທ່ານ ນາງ ໂອຍະມະ ອາກິ (OYAMA AKI) ວິຊາການພະແນກອອກແບບ ແລະ ວາງແຜນໂຄງລ່າງຜັງເມືອງຂອງບໍລິສັດນິກເກັງເຊັກເກວິສະວະກຳ ຈຳກັດ, ປະເທດຍີ່ປຸ່ນ ທີ່ຂຶ້ນ ລາຍງານກ່ຽວກັບແຜນຜັງ ເຂດໃຈກາງເມືອງເອກຂອງແຂວງວຽງຈັນວ່າ: ການວາງແຜນຜັງລະອຽດເຂດໃຈກາງເມືອງເອກຂອງແຂວງວຽງຈັນ, ມີເນື້ອທີ່ທັງຫມົດ 750 ເຮັກຕາ, ໃນນີ້ຈະເປັນເຂດພື້ນທີ່ເກົ່າ 25% ແລະ ພື້ນທີ່ພັດທະນາໃຫມ່ 75%, ໂດຍແບ່ງໃຫ້ມີເຂດເຮືອນຕ່ຳ, ອາພັດເມັນ, ເຮືອນຮ້ານ, ສູນການຄ້າ, ສະຖານີລົດເມ, ເຂດພື້ນທີ່ສຳນັກງານຫ້ອງການ, ໂຮງຫມໍ, ໂຮງຮຽນ, ສວນສີ ຂຽວ, ເນີນສີຂຽວ, ສວນກີລາ, ສວນສາທາລະນະ; ເຂດພື້ນທີ່ອຸດສາຫະກຳ.
ນອກນີ້ ຍັງຈະມີການສ້າງເຂດຈຸດສຸມທີ່ມີຄວາມຄຶກຄັກ ເຊັ່ນ: ສວນສາທາລະນະ, ສ້າງຈຸດສຸມຂອງທິວທັດ (ກຳນົດເຂດສັນຍະລັກ), ປູກຕົ້ນໄມ້ເປັນຮົ່ມ, ຕົ້ນໄມ້ປະດັບໃສ່ແຄມທາງ; ສ້າງແກນຂອງທິວທັດ ໂດຍຈະກຳນົດໃຫ້ເປັນເຂດພື້ນທີ່ເປີດທີ່ມີຄວາມກວ້າງ 20 ແມັດ, ເຊິ່ງເຂດດັ່ງກ່າວ ຈະສາມາດຈັດງານຕະຫລາດນັດ ແລະ ຈັດເທດສະການໄດ້; ນອກນີ້ ຍັງໄດ້ມີການສ້າງແຜນປ້ອງກັນນ້ຳຖ້ວມ, ແຜນລະບາຍນ້ຳຝົນ, ແຜນສະຫນອງນ້ຳປະປາ, ແຜນບຳບັດນ້ຳເປື້ອນ, ສະຖານທີ່ຖິ້ມຂີ້ເຫຍື້ອ ແລະ ອື່ນໆ, ນອກນີ້ຜູ້ເຂົ້າຮ່ວມຍັງໄດ້ພ້ອມກັນປະ ກອບຄຳຄິດຄຳເຫັນໃສ່ບາງຈຸດທີ່ເຫັນວ່າຈະຕ້ອງໄດ້ແກ້ໄຂຕື່ມອີກ ເພື່ອໃຫ້ບໍລິສັດເປັນຜູ້ແກ້ໄຂໃນຕໍ່ຫນ້າ.
ທ່ານ ຄຳເມິງ ພົງທະດີ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ໄດ້ກ່າວວ່າ: ອຳນາດການປົກຄອງເຫັນດີຕາມໂຄງການວາງຜັງເມືອງລະອຽດເຂດໃຈກາງ ເມືອງເອກຂອງແຂວງຄັ້ງທີ 2 ທີ່ອອກແບບໂດຍບໍລິສັດນິກເກັງເຊັກເກ ວິສະວະກຳ ຈຳກັດ, ປະເທດຍີ່ປຸ່ນ ແຕ່ຍັງມີບາງຈຸດທີ່ຈະຕ້ອງໄດ້ແກ້ໄຂເຊັ່ນ: ລະບົບເສັ້ນທາງ, ລະບົບສາຍສົ່ງໄຟຟ້າ ແລະ ລະບົບນ້ຳປະປາ ຕ້ອງມີ ການຈັດວາງລະອຽດເພື່ອບໍ່ໃຫ້ ມີບັນຫາຕາມມາທີ່ຫລັງ, ຈັດສັນ ສະຖານທີ່ເພື່ອສ້າງເຮືອນຕຳ ແຫນ່ງໃຫ້ບັນດາຫົວຫນ້າພະ ແນກການ ແລະ ຕາມສຳນັກງານທີ່ຈະໄດ້ເພີ່ມຮ້ານອາຫານບໍລິການຢູ່ໃກ້ໆ; ທັງຫມົດນີ້ບໍລິສັດຈະໄດ້ເປັນຜູ້ແກ້ໄຂໃຫ້ສຳເລັດ ແລະ ຄາດວ່າ ຈະໄດ້ພາບຈຳລອງເຂດໃຈກາງເມືອງເອກດັ່ງກ່າວ ແບບສົມບູນໃນທ້າຍເດືອນຕຸລາ 2012 ນີ້.
ເຂົ້າຮ່ວມໃນຄັ້ງນີ້ ມີທ່ານ ຄຳເມິງ ພົງທະດີ ເຈົ້າແຂວງໆວຽງຈັນ, ມີບັນດາການນຳຂອງແຂວງ, ເຈົ້າເມືອງ 4 ຕົວເມືອງທົ່ງພຽງ, ຫົວຫນ້າພະແນກທີ່ກ່ຽວຂ້ອງ ນາຍບ້ານ 8 ບ້ານ ພາຍໃນເທດສະບານ, ແລະ ທ່ານຫົວຫນ້າພະແນກພັດທະນາຕົວເມືອງຂອງບໍລິສັດນິກເກັງເຊັກເກວິສະວະກຳ ຈຳກັດ, ປະເທດຍີ່ປຸ່ນ, ພ້ອມດ້ວຍຄະນະເຂົ້າຮ່ວມ.
