ອຳນາດການປົກຄອງກໍ່ຄື ເຈົ້າຫນ້າທີ່ເມືອງວັງວຽງໃຊ້ມາດຕະການຄຸມເຂັ້ມ, ປະຕິບັດລະບຽບຢ່າງເຂັ້ມງວດໂຈະ ກິດຈະການສະຖານບັນເທີງ 24 ແຫ່ງຊົ່ວຄາວ ໃນ 4 ເຂດທ່ອງ ທ່ຽວສຳຄັນຂອງເມືອງວັງວຽງ ຫລັງ ຈາກມີສຽງຮຽກຮ້ອງຈາກພໍ່ແມ່ປະ ຊາຊົນ ແລະ ນັກທ່ອງທ່ຽວທີ່ເດີນທາງມາທ່ຽວໃນເຂດດັ່ງກ່າວເກີດຄວາມບໍ່ພໍ ໃຈຍ້ອນຜູ້ປະກອບການ ຝືນລະບຽບປ່ອຍໃຫ້ສະຖານບັນເທີງສ້າງຄວາມ ເນື່ອງນັນໃນຍາມຄໍ່າຄືນທັງເປັນບ່ອນມົ້ວສຸມ.
ຕໍ່ບັນຫາທີ່ເກີດຂຶ້ນ ທ່ານ ພູວຽງ ສີໄກສອນ ຫົວຫນ້າຫ້ອງການທ່ອງທ່ຽວເມືອງວັງວຽງໄດ້ກ່າວຕໍ່ທີມຂ່າວສັງຄົມໃນມື້ຜ່ານມາວ່າ: ສະຖານບັນເທີງຈຳນວນ 24 ແຫ່ງຂອງເມືອງ ວັງວຽງທີ່ນອນໃນເຂດຖ້ຳດົ້ງ, ເຂດພູດິນແດງ, ເຂດດອນກາງ ແລະ ແຄມນ້ຳຊອງ ໂດຍສະເພາະແມ່ນສະຖານທີ່ກະໂດດນໍ້າ, ຂີ່ສະລິງ, ສະໄລເດີຕ່າງໆໄດ້ສັ່ງປິດກິດຈະການຊົ່ວຄາວ ນັບແຕ່ກາງເດືອນສິງຫາຜ່ານມາ ແລະ ເລື່ອນ ໄລຍະເວລາອອກໄປ ໂດຍບໍ່ມີກຳນົດເປີດ. ປະຈຸບັນເຂດດັ່ງກ່າວ ກຳລັງປັບປຸງຄືນໃຫມ່ ໂດຍການຈັດສັນໃຫ້ເປັນລະບຽບ ແລະ ແບ່ງ ອອກເປັນຫລາຍເຂດຄື: ເຂດແຫລ່ງທ່ອງທ່ຽວ, ສະຖານບັນເທີງ, ຮ້ານອາຫານ, ຕະຫລາດກາງຄືນ, ທາງຄົນຍ່າງ ແລະ ອື່ນໆອີກຫລາຍຈຸດ ເພື່ອເຮັດໃຫ້ນັກທ່ອງທ່ຽວໄດ້ປະທັບ ໃຈກັບການປ່ຽນແປງ ທີ່ມີຫລາຍສີສັນ ແລະ ມີທາງເລືອກຫລາຍຂຶ້ນ. ຈາກນັ້ນ ກໍ່ມີລະບຽບການຄຸ້ມຄອງຢ່າງເຂັ້ມງວດ ໂດຍໄດ້ປະສານສົມທົບກັບ ກຸ່ມທຸລະກິດໂຮງແຮມ, ຮ້ານອາ ຫານ, ກຸ່ມຜູ້ໃຫ້ບໍລິການເຮືອຈັກ ຫາງຍາວ, ກົງເບັງ ແລະ ເຮືອກາຍັກ.
ໄລຍະຜ່ານມາ ເຈົ້າຫນ້າທີ່ ກ່ຽວຂ້ອງໄດ້ອອກລະບຽບການ ຕໍ່ຜູ້ປະກອບການຫລາຍຄັ້ງດ້ວຍ ການສຶກສາອົບຮົບ, ເຮັດບົດບັນທຶກໃຫ້ຜູ້ດຳເນີນກິດຈະການໄດ້ ເຂົ້າໃຈກ່ຽວກັບ ການ ປະຕິບັດລະ ບຽບຂອງການບໍລິການ, ການໂຄສະນາປະຊາສຳພັນ ແລະ ອື່ນໆ ແຕ່ຜູ້ປະກອບການບາງ ຮ້ານຍັງຝຶນລະບຽບຢູ່ ດັ່ງນັ້ນ ໃນກາງເດືອນສິງຫາຜ່ານມາ ຈິ່ງມີ ມາດຕະການສັ່ງປິດຊົ່ວຄາວ. ຄຽງຄູ່ກັນນັ້ນ ກໍ່ເພື່ອກະກຽມຕ້ອນຮັບກອງປະຊຸມອາເຊັມ 9 ທີ່ຈະມາເຖິງ ທາງພາກສ່ວນ ກ່ຽວຂ້ອງໄດ້ມີການປັບປຸງເສັ້ນທາງບາງເສັ້ນຄືນໃຫມ່, ຍົກຍ້າຍປ້າຍໂຄສະນາທີ່ບໍ່ເຫມາະ ສົມຕາມສາຍທາງ, ປັບປຸງໄຟ ເຍືອງທາງ ແລະ ສະຖານທີ່ທ່ອງທ່ຽວໃຫ້ສະອາດສວຍງາມເພື່ອຕ້ອນຮັບແຂກທີ່ຈະເດີນທາງມາທ່ຽວໃນງານສຳ ຄັນໃນທ້າຍປີນີ້. ທ່ານຫົວຫນ້າຫ້ອງການ ທ່ອງທ່ຽວເມືອງວັງວຽງໃຫ້ຮູ້ ຕື່ມອີກວ່າ: ໃນ 9 ເດືອນຕົ້ນປີ 2012 ມີນັກທ່ອງທ່ຽວເຂົ້າ ເມືອງວັງວຽງທັງຫມົດ ປະມານ 177.191 ຄົນ, ຍິງ 91.502 ຄົນ, ໃນນີ້ ນັກທ່ອງທ່ຽວພາຍໃນ 48.915 ຄົນ ແລະ ນັກທ່ອງທ່ຽວຕ່າງປະເທດ 128.276 ຄົນ, ຍິງ 56.996 ຄົນ ເຊິ່ງສາ ມາດສ້າງລາຍຮັບໄດ້ປະມານ 71 ຕື້ກວ່າກີບ.
