Mr. David Lewis ຜູ້ຊ່ຽວຊານປະຈໍາສໍານັກງານຄວບຄຸມຢາເສບຕິດ ແລະອາດຊະຍາກໍາແຫ່ງອົງການສະຫະປະຊາຊາດ ຫຼື UNODC ຖະແຫຼງວ່າບັນຫາຢາເສບຕິດຢູ່ສາມຫຼ່ຽມຄໍາ ຊຶ່ງເປັນເຂດຊາຍແດນໃນແມ່ນໍ້າຂອງ ລະຫວ່າງມຽນມາລາວ ແລະໄທນັ້ນ ໄດ້ເພີ່ມລະດັບຄວາມຮຸນແຮງຫຼາຍຂຶ້ນນັບມື້ ທັງໃນດ້ານການຜະລິດ ການຄ້າ ແລະການຊົມໃຊ້ຢາເສບຕິດ ໂດຍສະເພາະແມ່ນສະຖານະການ ກ່ຽວກັບຢາບ້າໃນປັດຈຸບັນນີ້ ສາມາດກ່າວໄດ້ວ່າ ເຂດສາມຫຼ່ຽມຄໍາໄດ້ກາຍເປັນສູນກາງ ຫຼືແຫຼ່ງຜະລິດຢາບ້າ ທີ່ໃຫຍ່ທີ່ສຸດໃນໂລກໄປແລ້ວ ດັ່ງທີ່ທ່ານໄດ້ກ່າວເນັ້ນຢໍ້າວ່າ: “ທັງນີ້ໂດຍ UNODC ເຊື່ອວ່າການຜະລິດຢາບ້າຢູ່ເຂດສາມຫຼ່ຽມຄໍາ ມີປະລິມານລວມຫຼາຍກວ່າ 2,000 ລ້ານເມັດໃນແຕ່ລະປີ ຊຶ່ງສວນໃຫຍ່ກໍເປັນການລັກລອບຜະລິດໂດຍກອງກໍາລັງຊົນກຸ່ມນ້ອຍ ໃນເຂດປະເທດມຽນມາ ຫຼືພະມ້າ ແລ້ວຈຶ່ງລັກລອບຂົນສົ່ງຕໍ່ໄປຍັງຕ່າງປະເທດ ໂດຍສະເພາະແມ່ນລາວນັ້ນ ນັບເປັນເຂດທາງຜ່ານທີ່ສໍາຄັນທີ່ສຸດ ເນື່ອງຈາກລາວເປັນປະເທດດຽວທີ່ສາມາດເຊື່ອມຕໍ່ກັບປະເທດ ໃນເຂດລຸ່ມແມ່ນໍ້າຂອງດ້ວຍກັນໄດ້ໃນທຸກທິດ ທຸກທາງ ແລະ ໃນຂະນະດຽວກັນ ທາງການລາວກໍຍັງມີຄວາມອາດສາມາດໃນການປາບປາມຢ່າງຈໍາກັດ ທັງໃນດ້ານບຸກຄະລາກອນ ເຄື່ອງໄມ້ເຄຶ່ອງມືແລະງົບປະມານອີກດ້ວຍນັ້ນ ຂະບວນການຄ້າຍາເສບຕິດຂ້າມຊາດ ຈຶ່ງສວຍໂອກາດໃຊ້ລາວເປັນທາງຜ່ານຫຼາຍຂຶ້ນນັບມື້.”
ກ່ອນໜ້ານີ້ ຄະນະກໍາມະການຄວບຄຸມແລະກວດກາຢາເສບຕິດແຫ່ງຊາດລາວກໍ ໄດ້ທໍາການເຜົາທໍາລາຍຢາເສບຕິດນໍ້າໜັກລວມຫຼາຍກວ່າ 2,240 ກິໂລ ຊຶ່ງເປັນຢາເສບຕິດທີ່ຍຶດໄດ້ຈາກນັກຄ້າຢາເສບຕິດຈໍານວນ 53 ຄົນ ໃນການປະຕິບັດການປາບປາມການລັກລອບຂົນສົ່ງ ແລະຄ້າຢາເສບຕິດ 20 ຄັ້ງ ທີ່ສາມາດຍຶດໄດ້ 12.5 ກິໂລ ຢາບ້າ 470 ກິໂລ ກັນຊາແຫ້ງ 1,535 ກິໂລ ແລະສານເຄມີທີ່ໃຊ້ໃນການຜະລິດຢາເສບຕິດ 226 ກິໂລ ຕາມລໍາດັບ. ແຕ່ຢ່າງໃດກໍຕາມ ການເຜົາທໍາລາຍຢາເສບຕິດໃນຄັ້ງນີ້ ກໍບໍ່ປາກົດວ່າມີຢາຝິ່ນ ລວມຢູ່ດ້ວຍແຕ່ຢ່າງໃດ ຫາກແຕ່ອິງຕາມລາຍງານປະຈໍາປີ 2012 ຂອງອົງການຄວບຄຸມຢາເສບຕິດ ແລະອາດຊະຍາກໍາແຫ່ງສະຫະປະຊາຊາດ ຫຼື UNODC ກໍໄດ້ລະບຸຢ່າງຊັດເຈນວ່າ ຜົນຜະລິດຈາການລັກລອບປູກຝິ່ນໃນລາວຍັງມີທ່າອຽງ ເພີ່ມຂຶ້ນຢ່າງຕໍ່ເນື່ອງ ໂດຍພື້ນທີ່ລັກລອບປູກຝິ່ນໃນລາວໄດ້ເພີ່ມຂຶ້ນຈາກ 1,500 ເຮັກຕ້າ ໃນປີ 2007 ມາເປັນ 4,100 ກວ່າເຮັກຕ້າ ໃນປີ 2011 ນັ້ນຄິດເປັນ ອັດຕາສ່ວນທີ່ເພີ່ມຂຶ້ນເກີນກວ່າ 170%. ສາເຫດສໍາຄັນທີ່ເຮັດໃຫ້ມີການລັກລອບປູກຝິ່ນເພີ່ມຂຶ້ນດັ່ງກ່າວນັ້ນ ທາງການ ລາວກໍຢືນຢັນວ່າ ເປັນຍ້ອນບັນຫາຄວາມຍາກຈົນຂອງປະຊາຊົນລາວ ທີ່ໄດ້ຮັບການຊ່ວຍເຫຼືອຈາກຕ່າງປະເທດຕໍ່າກວ່າລະດັບຄວາມຕ້ອງການທີ່ເປັນຈິງ ແລະໃນຂະນະດຽວກັນ ລາ ຄາຝິ່ນກໍໄດ້ເພີ່ມສູງຂຶ້ນຢ່າງຕໍ່ເນື່ອງອີກດ້ວຍ ຈຶ່ງເຮັດໃຫ້ປະຊາຊົນລາວບັນດາເຜົ່າທີ່ໄດ້ພາກັນປະລະຈາກການປູກຝິ່ນແລ້ວນັ້ນ ກັບຄືນມາປູກຝິ່ນອີກເທື່ອໃໝ່ຫຼາຍຂຶ້ນນັ້ນເອງ.
ທັງນີ້ UNODC ໄດ້ລາຍງານກ່ຽວກັບສະພາວະການລັກລອບປູກຝິ່ນໃນເອເຊຍຕາເວັນອອກສຽງໃຕ້ວ່າ ມຽນມາ ຍັງຄົງເປັນປະເທດທີ່ມີການລັກລອບປູກຝິ່ນຫຼາຍທີ່ສຸດ ສ່ວນລາວນັ້ນກໍຖືເປັນປະເທດທີ່ມີການລັກລອບປູກຝິ່ນເພີ່ມຂຶ້ນສູງທີ່ສຸດເມື່ອທຽບກັບມຽນມາແລະໄທ. ນອກຈາກນີ້ UNODC ຍັງໄດ້ລະບຸດ້ວຍວ່າລາວເປັນປະເທດນຶ່ງທີ່ມີສະຖານະເປັນທັງເຂດຜະລິດ ເຂດທາງຜ່ານແລະເຂດຮອງຮັບຢາເສບຕິດຢ່າງຄົບຖ້ວນແລ້ວ ຈຶ່ງເຮັດໃຫ້ຕ້ອງປະເຊີນກັບບັນຫາທີ່ກ່ຽວກັບຢາເສບຕິດຫຼາຍຂຶ້ນນັບມື້ນັ້ນເອງ.
http://lao.voanews.com/content/golden-triangle-become-to-yaba-center-while-laos-face-more-trouble/1498981.html
Mr. David Lewis ຫາກໍ່ຮູ້ນີ້ຫວາ?
