ພິທີມອບ-ຮັບເຮືອນ ແລະ ດິນໃຫ້ແກ່ຄອບຄົວທ່ານ ສີທອງ ວິລະຊົນແຫ່ງຊາດ ໄດ້ຈັດຂຶ້ນໃນວັນເສົາທີ່ຜ່ານມາ ຢູ່ທີ່ຫ້ອງການປົກຄອງນະຄອນຫຼວງວຽງຈັນ ເປັນກຽດຂຶ້ນມອບໂດຍທ່ານ ສົມວັນດີ ນາຖາວົງ ຮອງເຈົ້າຄອງນະຄອນຫຼວງວຽງຈັນ ເຊິ່ງເປັນກຽດຂຶ້ນຮັບໂດຍທ່ານ ປ້າ ປະທຸມມາ ສີທຸມທອງ ພ້ອມດ້ວຍທ່ານ ສະຫຼອງ ສີທຸມທອງ ໂດຍມີຫົວໜ້າຈັດຕັ້ງ ຄະນະພັກ ຫົວໜ້າພະແນກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ອີງຕາມກົດໝາຍວ່າດ້ວຍທີ່ດິນ ແລະ ອີງຕາມການຕົກລົງເຫັນດີຂອງທາງຂັ້ນເທິງ ວ່າດ້ວຍການປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີ ເຂົ້າໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ຈຶ່ງໄດ້ຕົກລົງເຫັນດີມອບທີ່ດິນ ແລະ ເຮືອນຂອງລັດ ໃຫ້ເປັນສິດນຳໃຊ້ຂາດຕົວໃຫ້ແກ່ທ່ານ ສະຫຼອງ ສີທຸມທອງ (ລູກຊາຍຜູ້ສືບທອດ ວິລະຊົນສີທອງ) ດິນລັດດັ່ງກ່າວ ໄດ້ຕັ້ງຢູ່ບ້ານຫັດສະດີໃຕ້ ເມືອງຈັນທະບູລີ ນະຄອນຫຼວງວຽງຈັນ ຕາມໃບຕາດິນເລກທີ 50ເນື້ອທີ່ 381ຕາແມັດ ແລະ ໃບຕາດິນລັດ ເລກທີ 107ເນື້ອທີ່ 63ຕາແມັດ ເຊິ່ງນະໂຍບາຍດັ່ງກ່າວ ແມ່ນການປະຕິບັດນະໂຍບາຍວິລະຊົນ ສີທອງ ມອບໃຫ້ທ່ານ ສະຫຼອງ ສີທອງ ຜູ້ເປັນລູກຄີງ ເປັນຜູ້ຮັບ.
ທ່ານ ສີທອງ ວິລະຊົນແຫ່ງຊາດ ເປັນຜູ້ໜຶ່ງທີ່ມີຄຸນງາມຄວາມດີປະກອບເຂົ້າໃນພາລະກິດປະຕິວັດຊາດ ປະຊາທິປະໄຕ ຕິດພັນກັບການຕໍ່ສູ້ກູ້ຊາດ ແລະ ການປະຕິວັດຕະຫຼອດມາ ຍອມເສຍສະຫຼະຊີວິດເລືອດເນື້ອເຂົ້າໃນພາລະກິດປະຕິວັດຊາດປະຊາທິປະໄຕ ຍາດເອົາເອກະລາດມາສູ່ປະເທດຊາດ ເຊິ່ງຄຸນງາມຄວາມດີ ແລະ ສິນທຳປະຕິວັດໄດ້ຈາລຶກໄວ້ໃນປະຫວັດສາດຂອງຊາດລາວຕະຫຼອດໄປ.
