Pasalao

ຄະນະ​ໂຄສະນາ​ສຶກສາ​ສູນ​ກາງຂອງ​ຫວຽດນາມ ​ແລະ ກົມ​ໃຫຍ່​ການ​ເມືອງ​ກອງທັບ​ປະຊາຊົນ​ຫວຽດນາມ ​ໄດ້​ຈັດ​ພິທີ​ເປີດ​ບັ້ນປະ​ກວດ "ກາ​ນຊອກ​ຮູ້ປະຫວັດສາດ​ການ​ພົວພັນ​ແບບ​ພິ​ເສດ ຫວຽດນາມ-ລາວ, ລາວ-ຫວຽດນາມ" ຢູ່​ໃນ​ກອງ​ກຳລັງ​ປະກອບ​ອາວຸດ​ປະຊາຊົນ ຂຶ້ນ​ເມື່ອ​ວັນ​ທີ 21 ມິຖຸນາ​ນີ້, ​ໂດຍ​ພິທີ​ໄດ້​ຈັດ​ຂຶ້ນທີ່​ວິທະຍາຄານ​ປ້ອງ​ກັນ​ອາກາດ-ກອງທັບ​ອາກາດ (ກະຊວງ​ປ້ອງ​ກັນ ຊາ​ດຫວຽດນາມ).

ທ່ານ ບູ່​ຍ​ເຖ້ດຶກ, ຮອງ​ຫົວຫນ້າ​ຄະນະ​ໂຄສະນາ​ສຶກສາ​ສູນ​ກາງຂອງ​ຫວຽດນາມ ກ່າວ​ຊີ້​ແຈງ​ຕໍ່​ພິທີ​ດັ່ງກ່າວ ວ່າການ​ປະ​ກວດ​ດັ່ງກ່າວ ​ແມ່ນ​ເພື່ອ​ເປັນ​ການ​ສະຫນອງ​ຕອບ​ຕໍ່ "ປີ​ແຫ່ງ​ຄວາມ​ສາ​ສາມັກຄີ​ມິດຕະພາບ ຫວຽດນາມ-ລາວ 2012", ຂ່ຳນັບ​ຊົມ​ເຊີຍ​ວັນ​ຄົບຮອບ 50 ປີ​ແຫ່ງ​ການ​ສ້າງສາ​ຍພົວພັນ​ການທູດ ​ແລະ ຄົບຮອບ 35 ປີ​ແຫ່ງ​ວັນ​ເຊັນ​ສົນທິສັນຍາ​ມິດຕະ ພາບຮ່ວມ​ມື​ລະຫວ່າງ​ສອງ​ປະ​ເທດ. ການ​ປະ​ກວດ​ນີ້ ​ເປັນການ​ປະກອບສ່ວນ​​ເຂົ້າ​ໃນ​ການ​ໂຄສະນາ, ສຶກສາ​ມູນ​ເຊື້ອປະຕິ ວັດ, ຕົ້ນຕໍ​ກໍ​ແມ່ນ​ຄົນ​ລຸ້ນຫນຸ່ມ​ນ້ອຍ​ຂອງ​ທັງ​ສອງ​ປະ​ເທດ ກ່ຽວ​ກັບ​ສາຍ​ພົວພັນ​ມິດຕະພາບ​ແບບ​ພິ​ເສດ ຫວຽດນາມ-ລາວ, ລາວ-ຫວຽດນາມ ​ໃນ​ຂະ​ບວນການ​ຕໍ່ສູ້​ປົດ​ປ່ອຍ​ຊາດ ​ແລະ ສ້າງສາ​ສັງຄົມ​ນິຍົມ​ຢູ່​ໃນ​​ແຕ່ລະ​​ປະ​ເທດ. ການ​ປະ​ກວດ ຍັງ​ເພື່ອ​ເປັນ​ການ​ເພີ່ມ​ພູນ​ຄູນ​ສ້າງ ສາຍ​ພົວພັນ​ອັນ​ບໍລິສຸດ​ຜຸດ​ຜ່ອງ ລະຫວ່າງ​ສອງ​ພັກ, ສອງ​ລັດ ​ແລະ ປະຊາຊົນ​ສອງ​ປະ​ເທດ ຫວຽດນາມ ​ແລະ ລາວ; ​ເປັນ​ການ​ຕໍ່ຕ້ານ​ກັບ​ຖ້ອຍ​ທຳນອງ​ໃສ່​ຮ້າຍ​ປ້ານ​ສີ, ບິດ​ເບືອນ​ປະຫວັດສາດ, ສ້າງ​ຄວາມ​ແຕກ​ແຍກ​ຄວາມ​ສາມັກຄີ​ມິດຕະພາບ​ແບບ​ພິ​ເສດ ຫວຽດນາມ-ລາວ ທີ່​ກະທຳ​ໂດຍ​ອິດ​ທິກຳລັງ​ເປັນ​ປໍ​ລະ​ປັກ.

ການ​ເປີດ​ຂະ​ບວນການ​ດັ່ງກ່າວ ຢູ່​ທີ່​ວິທະຍາຄານ​ປ້ອງ​ກັນ​ອາກາດ-ກອງທັບ​ອາກາດ ຈະ​​ເປັນ​ການ​ປະກອບສ່ວນ ​ເຮັດ​ໃຫ້​ວຽກ​ງານ​ໂຄສະນາ​ໃຫ້​ແກ່​ການ​ປະ​ກວດ ​ໄດ້​ມີ​ຄວາມ​ອຸດົມສົມບູນ​ຫລາຍ​ຂຶ້ນ, ຈະ​ເປັນ​ການ​ສ້າງ​ການ​​ເຜີຍ​ແຜ່​ທີ່​ກ້ວາງ​ຂວາງ ​ແລະ ​ເລິກ​ເຊິ່ງ ຢູ່​ໃນ​ກອງ​ກຳລັງ​ປະກອບ​ອາວຸດ​ປະຊາຊົນ ​ແລະ​ໃນ​ທົ່ວ​ສັງຄົມ, ຊຶ່ງ​ຕົ້ນຕໍ​ກໍ​ແມ່ນ​ໄວ​ຫນຸ່ມ. ພົນ​ຈັດຕະວາ ຟ້າ​ມ​ແທັງ​ລຽມ, ຜູ້​ຊີ້ນຳ​ວຽກ​ງານ​ການ​ເມືອງ ຂອງວິທະຍາຄານ​ປ້ອງ​ກັນ​ອາກາດ-ກອງທັບ​ອາກາດ ຫວຽດນາມ ​ເວົ້າວ່າການ​ເຂົ້າ ຮ່ວມ​ການ​ປະ​ກວດ​ດັ່ງກ່າວ ​ເປັນ​ການ​ຊ່ວຍ​ໃຫ້​ໄວ​ຫນຸ່ມ​ ​ໃນ​ກອງ​ກຳລັງ​ປະກອບ​ອາວຸດ ​ໄດ້​ຍົກ​ສູງ​ຄວາມ​ຮັບ​ຮູ້, ກຳ​ແຫນ້ນ​ທັດ ສະນະ, ​ແນວທາງ​, ນະ​ໂຍບາຍພົວພັນ​ກັບ​ຕ່າງປະ​ເທດ​ຂອງ​ພັກ, ຂອງ​ກອງທັບ ກ່ຽວ​ກັບ​ປະຫວັດສາດ​ອັນ​ເປັນ​ມູນ​ເຊື້ອ ຂອງ​ຊາດ​ນັ້ນ​ໃຫ້​ດີ​ກ່ວາ​ເກົ່າ. ນີ້ຍັງ​ເປັນ​ໂອກາດ​ເພື່ອ​ເພີ່ມ​ທະວີ​ຄວາມ​ເຂົ້າ​ໃຈ, ຄວາມ​ສາມັກຄີ ມິດຕະພາບ, ການ​ຮ່ວມ​ມື​ຮອບ ດ້ານ ລະຫວ່າງ​ນັກຮຽນ​ນັກ​ສຶກສາ​ຂອງ​ລາວ ກັບ​ພະນັກງານ, ນັກຮົບ ​ໃນວິທະຍາຄານ​ປ້ອງ​ກັນ​ອາກາດ-ກອງທັບ​ອາກາດຫວຽດ ນາມ, ຊຶ່ງ​ຜ່ານ​ຈາກ​ນັ້ນກໍ​ເປັນ​ການ​ຍົກ​ສູງ​ຄຸນ​ນະພາ​ບດ້ານ​ການ​ສຶກສາ, ກໍ່ສ້າງ​ໃຫ້​ວິທະຍາຄານ​ນັບ​ມື້ນັບ​ແຂງ​ແກ່ນ​ຮອບ ດ້ານ