ຂ່າວ: ຣັດສະຫມີ
ຕະຫລາດຫລັກຊັບລາວ ຈະເປີດນຳໃຊ້ອຸປະກອນທັນສະໄຫມເຂົ້າໃນການຊື້ຂາຍຮຸ້ນ ໂດຍຜ່ານອິນເຕີເນັດໃນມໍ່ໆນີ້, ເພື່ອເພີ່ມຄວາມສະດວກແກ່ນັກລົງທຶນ.
ເພື່ອບັນລຸແຜນດັ່ງກ່າວ ໃນວັນທີ 18 ພຶດສະພາທີ່ອາຄານ ຕະຫລາດຫລັກຊັບລາວໄດ້ຈັດໃຫ້ມີພິທີເຊັນສັນຍາຂໍ້ຕົກລົງການຊື້ອຸປະກອນຂອງລະບົບການແລກປ່ຽນຊື້ຂາຍຮຸ້ນຜ່ານ ອິນເຕີເນັດ ແລະ ການບໍລິການການບຳລຸງຮັກສາລະບົບໄອທີລະຫວ່າງຕະຫລາດຫລັກຊັບລາວກັບກຸ່ມບໍລິສັດໂກເຣຍ ເທເລຄອມ (KT) ເຊິ່ງຕາງຫນ້າໃຫ້ແກ່ຝ່າຍລາວໂດຍແມ່ນທ່ານ ວຽງຄຳ ວັນສີລາລົມ ຫົວຫນ້າພະແນກຄຸ້ມຄອງ ແລະ ບໍລິຫານຕະຫລາດຫລັກຊັບລາວ, ທາງຝ່າຍ ສ.ເກົາຫລີ ໂດຍແມ່ນທ່ານ ຊໍມູນ ກຶ່ນ ຫົວຫນ້າພະແນກການເງິນຂອງກຸ່ມບໍລິສັດໂກເຣຍ ເທເລຄອມ ໂດຍການເຂົ້າຮ່ວມ ເປັນສັກຂີພິຍານຂອງທ່ານ ເດດພູວັງ ມູລຣັຕນ໌ ປະທານຄະນະກຳມະການ, ຜູ້ອຳນວຍການໃຫຍ່ ແລະ ທ່ານ ໂຮຈົງປາກ ຮອງປະທານ, ຮອງຜູ້ອຳນວຍການໃຫຍ່ຕະຫລາດຫລັກຊັບລາວ ພ້ອມທັງບັນດາຄະນະນຳຂອງຕະຫລາດຫລັກຊັບລາວ ແລະ ບໍລິສັດໂກເຣຍເທເລຄອມ.
ເຊັນສັນຍາດັ່ງກ່າວກໍ່ເພື່ອເປັນການຢືນຢັນການສະຫນອງລະບົບ ແລະ ອຸປະກອນຂອງລະບົບການແລກປ່ຽນຊື້ຂາຍຮຸ້ນຜ່ານອິນເຕີເນັດຂອງຕະຫລາດຫລັກຊັບລາວທີ່ຈະເປີດນຳໃຊ້ ໃຫ້ແກ່ນັກລົງທຶນລາວ ແລະ ຕ່າງປະເທດ, ການເຊັນຍາຍັງມີເປົ້າຫມາຍກ່ຽວກັບການຮ່ວມມືສາກົນເພື່ອໂອນຖ່າຍຄວາມຮູ້ຄວາມສາມາດດ້ານການພັດທະນາລະບົບໄອທີ ແລະ ການສື່ສານໃຫ້ແກ່ພະນັກງານຄົນລາວຢູ່ໃນຕະຫລາດຫລັກຊັບລາວ.
ບໍລິສັດໂກເຣຍ ເທເລຄອມ (KT) ເປັນບໍລິສັດທີ່ຫນ້າເຊື່ອຖືໃນການສະຫນອງການບໍລິການ ແລະ ເຕັກໂນໂລຊີ ທີ່ໄດ້ມາດຕະຖານອັນຈະເຮັດໃຫ້ລະບົບໄອທີ ແລະ ລະບົບການແລກປ່ຽນຊື້ຂາຍຮຸ້ນຜ່ານອິນເຕີເນັດຂອງຕະຫລາດຫລັກຊັບລາວ ໄດ້ມາດຕະຖານສາກົນ ແລະ ສົ່ງຜົນໄປເຖິງການສ້າງຄວາມຫມັ້ນໃຈ ເປັນທີ່ຍອມຮັບໃຫ້ແກ່ນັກລົງທຶນໃນທົ່ວໂລກໃນອະນາຄົດມໍ່ໆນີ້.
ກຸ່ມບໍລິສັດດັ່ງກ່າວໄດ້ຮັບການສ້າງຕັ້ງຂຶ້ນໃນປີ 1981 ເຊິ່ງໄດ້ກາຍເປັນຜູ້ນຳ (ໃນການໃຫ້ການບໍລິການສື່ສານແບບຜ່ານສາຍ ແລະ ແບບບໍ່ມີສາຍ) ໃນການພັດທະນາຂະແຫນງ ເສດຖະກິດການສື່ສານຂອງປະເທດສາທາລະນະລັດເກົາຫລີ.
ກຸ່ມບໍລິສັດໂກເຣຍ ເທເລຄອມ ຍັງໄດ້ເຮັດທຸລະກິດໃນຫລາຍດ້ານມີທັງຫມົດ 44 ບໍລິສັດ, ມີລາຍໄດ້ລວມ 4,85 ພັນລ້ານໂດລາສະຫະລັດ ແລະ ໃນປີ 2010 KT ມີລາຍໄດ້ເຖິງ 11.719 ລ້ານໂດລາສະຫະລັດ ແລະ ມີກອງທຶນທັງຫມົດ 241.010 ລ້ານໂດລາສະຫະລັດ ແລະ ກໍ່ເປັນຄັ້ງທຳອິດທີ່ບໍລິສັດດັ່ງກ່າວໄດ້ມາເຄື່ອນໄຫວຢູ່ ສປປ ລາວ ກໍ່ຄືຢູ່ໃນຂົງເຂດນີ້ ແລະ ຍັງມີແຜນດຳເນີນການເຄື່ອນໄຫວທຳທຸລະກິດໃນຂົງເຂດດັ່ງກ່າວເຊັ່ນດຽວກັນ.
