ຄິດວ່າທຸກຄົນເມື່ອອອກເດີນທາງກໍ່ຢາກໄປສະດວກ, ສະນັ້ນກ່ອນເດີນທາງຕ້ອງມີການວາງແຜນໃຫ້ສະດວກທີ່ສຸດ, ປະຢັດເວລາທີ່ສຸດ, ຖ້າໄປພົບສີ່ແຍກໄຟແດງກໍ່ຕ້ອງເລືອກທາງທີ່ລ້ຽວຂວາໄດ້, ແຕ່ກໍ່ຕ້ອງໃຈເຢັນເພາະປ້າຍບອກວ່າ “ລ້ຽວຂວາ ໄດ້” ແຕ່ໄປບໍ່ໄດ້ຍ້ອນຜູ້ໃຊ້ລົດໃຊ້ຖະໜົນຍັງຈອດລົດບໍ່ເປັນລະບຽບ.
ເພື່ອນຜູ້ອ່ານຫລາຍຄົນສ່ອງແສງມາຍັງຄໍລຳສ້າງສັນສັງຄົມຂອງພວກເຮົາເລື່ອງການຈອດລົດລໍຖ້າໄຟຂຽວ, ທ່ານຂໍຮ້ອງເຂົ້າມາວ່າ: ຢາກໃຫ້ຜູ້ໃຊ້ລົດໃຊ້ຖະໜົນຈົ່ງເຫັນອົກເຫັນໃຈ ເຊິ່ງກັນ ແລະ ກັນ, ເປັນແບບຢ່າງໃຫ້ແກ່ກັນໃນການປະຕິບັດກົດລະບຽບຈະລາຈອນໂດຍສະເພາະແມ່ນການຈອດລົດລໍຖ້າຢູ່ແຍກໄຟແດງ.
ຕໍ່ບັນຫານີ້ “ຄໍລຳສ້າງສັນສັງຄົມ” ຂອງພວກເຮົາໄດ້ສຳພາດ ທ່ານ ພຕ. ຍຸດຕະພົງ ສຸວັນນະສິງ ຮອງ ຫົວຫນ້າພະແນກຈະລາຈອນນະຄອນຫລວງວຽງຈັນ, ເຊິ່ງທ່ານໃຫ້ຄຳເຫັນມາຍັງຄໍລຳຂອງພວກເຮົາໃນວັນ ທີ 14 ມີນາ 2012 ຜ່ານມານີ້ກ່ຽວກັບ “ປ້າຍລ້ຽວຂວາໄດ້” ວ່າ: ເມື່ອກ່ອນແມ່ນຕິດປ້າຍລ້ຽວຂວາ ໄດ້ໃສ່ທຸກໆທາງແຍກ, ແຕ່ເຫັນວ່າຍັງບໍ່ໄດ້ຮັບຜົນດີເທົ່າທີ່ຄວນ, ຕໍ່ມາເຈົ້າຫນ້າທີ່ຈະລາຈອນຂອງພວກເຮົາ ຈິ່ງໄດ້ກວດກາຄືນ ໂດຍອີງຕາມສະພາບຕົວຈິງຂອງເສັ້ນທາງທີ່ມີຂະໜາດນ້ອຍໃຫຍ່ຕ່າງກັນ, ດັ່ງນັ້ນ ທາງແຍກໃດເປັນທາງເສັ້ນນ້ອຍ (ແຄບ) ຈິ່ງໄດ້ຮື້ຖອນປ້າຍລ້ຽວຂວາໄດ້ອອກຄືນ, ມາເຖິງປະຈຸບັນກໍ່ຍັງເຫັນວ່າປະຊາຊົນສ່ວນຫລາຍຍັງບໍ່ເປັນເຈົ້າການໃນການປະຕິບັດກົດລະບຽບເທົ່າທີ່ຄວນ, ຈິ່ງຢາກໃຫ້ພໍ່ແມ່ປະຊາຊົນຜູ້ໃຊ້ລົດໃຊ້ຖະໜົນທັງຫລາຍ ຈົ່ງປະກອບສ່ວນໃນການປະຕິບັດກົດຈະລາຈອນຢ່າງຕັ້ງໜ້າ ໂດຍສະເພາະການຈອດລົດລໍຖ້າໄຟຂຽວກໍ່ຢາກໃຫ້ປະຕິບັດຕາມເສັ້ນຂີດສີຂາວທີ່ພະແນກໂຍທາທິການ ແລະ ຂົນສົ່ງເພິ່ນໄດ້ຂີດແບ່ງໄວ້, ສຳລັບຜູ້ຂັບຂີ່ທີ່ມີຈຸດປະສົງຢາກລ້ຽວຂວາກໍ່ຢາກໃຫ້ປະຕິບັດຕາມປ້າຍທີ່ຕິດບອກໄວ້ຕາມແຄມທາງ (ຄວາມຫມາຍວ່າຖ້າຫາກແຍກໃດບໍ່ມີປ້າຍບອກລ້ຽວຂວາກໍ່ຕ້ອງໄດ້ປະຕິບັດຕາມໄຟອຳນາດ) ທ່ານ ພຕ. ຍຸດຕະພົງ ກ່າວ.
“ຄົນລາວເປັນຄົນມີນ້ຳໃຈໂອບເອື້ອອາລີ” ດັ່ງນັ້ນ ທຸກຄົນກໍ່ຄວນຈະຕ້ອງເຫັນອົກເຫັນໃຈເຊິ່ງກັນ ແລະ ກັນ, ໃຫ້ກຽດກັນແລະເຄົາລົບນັບຖືກັນ, ອີກຢ່າງໜຶ່ງເຖິງປ້າຍບອກວ່າ “ລ້ຽວ ຂວາໄດ້” ແຕ່ກໍ່ຍັງມີ “ຕ້ອງລະວັງ” ກໍ່ຄືຢ່າຂັບຂີ່ໄວເກີນໄປ ເພາະບາງເທື່ອອາດມີຄົນຂ້າມທາງ ຫລື ມີສິ່ງກີດຂວາງຕ່າງໆ ທີ່ເຮົາບໍ່ສາມາດແນມເຫັນ, ນີ້ກໍ່ອາດຈະເກີດອຸບັດເຫດໄດ້ເຊັ່ນດຽວກັບການຈອດລົດລໍຖ້າຢູ່ແຍກໄຟອຳນາດກໍ່ບໍ່ຄວນຈອດລົດຢຽບເສັ້ນ ຫລື ຈອດກາຍເສັ້ນຈົນເກີນໄປ “ບ່ອນທີ່ລ້ຽວຂວາ ໄດ້ກໍ່ຢາກໃຫ້ຈົ່ງທາງໄວ້ໃຫ້ຜູ້ມີຈຸດປະສົງລ້ຽວຂວາໄດ້ຜ່ານ” ເຖິງຈະກາຍເສັ້ນອອກມາເລັກນ້ອຍແຕ່ກໍ່ພໍມີທາງໃຫ້ຜ່ານໄດ້ຍັງຈະດີກວ່າເນາະ ! ຂໍຮຽກຮ້ອງເຖິງຜູ້ໃຊ້ລົດໃຊ້ຖະຫນົນທັງຫລາຍຈົ່ງເຫັນອົກເຫັນໃຈ ເພື່ອຄວາມສະດວກປອດໄພຂອງຫມົດທຸກຄົນ.
ນັກທ່ອງທ່ຽວຕ່າງປະເທດ ຂ້າມຫົນທາງບໍ່ໄດ້ ກໍ່ຍ້ອນປ້າຍອັນນີ້ ນີ້ແຫຼະ
