ຕະຫລາດວັງທອງໄນພລາຊາ ທີ່ເລີ່ມເປີດໃຫ້ບໍລິການມາແຕ່ທ້າຍປີ 2009, ເຊິ່ງເປັນ ໄລຍະດຽວກັນກັບການສະເຫລີມສະຫລອງນະຄອນຫລວງວຽງຈັນຄົບຮອບ 450 ປີ, ເບື້ອງ ຕົ້ນງຽບເຫງົາຫລາຍຄົນບໍ່ສົນ ໃຈ ແຕ່ຫລັງຈາກຜູ້ບໍລິຫານປັບປ່ຽນກົນລະຍຸດໃຫມ່ປະຈຸບັນໄດ້ເປັນທີ່ຮູ້ຈັກກັນດີຂອງສັງຄົມໃນວົງກວ້າງຂຶ້ນທຸກມື້.
ຕະຫລາດວັງທອງໄນພລາຊາໄລຍະເປີດບໍລິການເບື້ອງຕົ້ນ ຜູ້ປະກອບການຫວັງສ້າງໃຫ້ເປັນສູນການຊື້-ຂາຍຂອງຄົນລະດັບກາງຂຶ້ນໄປ, ເຮັດໃຫ້ຜູ້ມາໃຊ້ບໍລິການມີຫນ້ອຍບໍ່ເປັນທີ່ເພິ່ງພໍໃຈຈິ່ງຕ້ອງປັບປ່ຽນກົນລະຍຸດໃຫມ່ ດ້ວຍການເພີ່ມເວລາການໃຊ້ບໍລິການກາງເວັນໃຫ້ເປັນສະຖານທີ່ພັກຜ່ອນບັນຍາກາດແບບສະບາຍໆໃນຍາມກາງຄືນຈົນເຖິງເວລາປະມານ 22-23 ໂມງ, ທີ່ ສຳຄັນມີສິນຄ້າສຳລັບທຸກຊັ້ນຄົນ.
ທ່ານ ຊາຍຄຳ ພົງສະຫວັດ ຜູ້ອຳນວຍການຕະຫລາດວັງທອງໄນພລາຊາໃຫ້ສຳພາດວ່າ: ໃນເບື້ອງຕົ້ນບັນຍາກາດໃຊ້ບໍລິການບໍ່ຄຶກຄື້ນສາເຫດຫລັກຍ້ອນເນັ້ນສິນຄ້າຂ້ອນຂ້າງແພງ, ຫ້າງຮ້ານຂາຍເຄື່ອງກໍ່ມີຫນ້ອຍ, ອັນເປັນສາເຫດໃຫ້ຄົນບໍ່ເຂົ້າມາໃຊ້ບໍລິການ, ຈາກນັ້ນ ຄະນະບໍລິຫານຈິ່ງຫາລື ແລະ ປັບປຸງການບໍລິການຕະຫລາດແຫ່ງນີ້ຄືນໃຫມ່, ຈາກເກົ່າທີ່ຈະໃຫ້ເປັນສູນການຊື້-ຂາຍຂອງຄົນຊັ້ນກາງຂຶ້ນໄປມາ ເປັນບ່ອນແລກປ່ຽນຊື້-ຂາຍຂອງມວນຊົນ ໂດຍຈັດໃຫ້ມີສິນຄ້າຫລາກຫລາຍລາຍການ ແລະ ຫລາຍລະດັບ ນັບແຕ່ຂອງກິນສຸກເປັນຕົ້ນແມ່ນເຂົ້າຫລາມປີ້ງໄກ່, ບ່ອນຫລິ້ນເດັກນ້ອຍ, ສິນຄ້າດ້ານຄວາມງາມ, ເສື້ອຜ້າ, ເຄື່ອງໃຊ້ຄົວເຮືອນ, ເຄື່ອງໃຊ້ໄຟຟ້າຄົບວົງຈອນ ແລະ ຮ້ານແລກປ່ຽນຊື້-ຂາຍເງິນຄຳຈະຫລອດເຖິງອັນ ຍະມະນີທີ່ມີລາຄາແພງມີຮ້ານຄ້າຂາຍສົ່ງ-ຂາຍຍ່ອຍ ເຊິ່ງເປັນທາງເລືອກສຳລັບທຸກເພດໄວ ແລະ ກຸ່ມຄົນ.
ຈາກຈຸດນີ້ ເຮັດໃຫ້ຕະຫລາດ 450 ປີ ວັງທອງໄນພລາຊາ ເປັນທີ່ຮູ້ຈັກກັນດີທັງພາຍໃນ ແລະ ຕ່າງປະເທດ ໂດຍສະເພາະຕອນກາງເວັນມີລົດຂົນສົ່ງນັກທ່ອງທ່ຽວເຂົ້າມາໃຊ້ບໍລິ ການສະເລ່ຍຕໍ່ວັນມີລົດເມໃຫຍ່ເຖິງ 20 ຄັນ ແລະ ລົດຕູ້ປະມານ 70 ຄັນທີ່ເຂົ້າມາທ່ຽວຊົມຊື້ສິນຄ້າ, ຂາຍດີສຸດແມ່ນປະເພດເຄື່ອງທີ່ລະນຶກ ແລະ ກະເປົ໋າ.
ຢ່າງໃດກໍ່ຕາມ ທ່ານ ຊາຍ ຄຳ ກ່າວວ່າ: ປະຈຸບັນເຖິງຈະມີຄົນເຂົ້າມາໃຊ້ບໍລິການຫລາຍຂຶ້ນ ແຕ່ກໍ່ຍັງບໍ່ເປັນທີ່ເພິ່ງພໍໃຈເທື່ອ, ເນື່ອງຈາກວ່າຕຶກອາຄານຍັງຫ່າງໄກກັນ (ບໍ່ຕິດຈອດກັນ) ເຮັດໃຫ້ການເລາະຫາຊື້ເຄື່ອງຂອງຜູ້ທີ່ເຂົ້າມາໃຊ້ບໍລິການບໍ່ສະດວກເຕັມທີ່, ສະນັ້ນ ຄະນະບໍລິການພວມສະເຫນີລັດຖະບານ ເພື່ອຂໍອະນຸຍາດເຊື່ອມຕໍ່ຕຶກເຂົ້າຫາກັນພ້ອມທັງສ້າງອາຄານຈອດລົດທີ່ສາມາດບັນຈຸລົດໃຫຍ່ ໄດ້ 250 ຄັນ, ຖ້າໂຄງການທີ່ສະເຫນີໃຫມ່ນີ້ຫາກໄດ້ຮັບການອະນຸມັດຈາກລັດຖະບານເຊື່ອວ່າ ຕະຫລາດວຽງຈັນ 450 ປີ ວັງທອງໄນພລາຊາ ຈະເປັນສູນການຄ້າກາງໃຈເມືອງທີ່ຫລາຍຄົນຢາກເຂົ້າແວ່.
ຂໍຖາມຜູ້ຮູ້ແດ່ ດຽວນີ້ປະເທດລາວມີການແບ່ງຊົນຊັ້ນກັນແລ້ວຫວ່າ ?
ແລ້ວເຂົາເຈົ້າເອົາກົດເກນຫຍັງມາວັດແທກ ວ່າຄົນລະດັບສູງ ກາງ ຕ່ຳ
Anonymous wrote:ຂໍຖາມຜູ້ຮູ້ແດ່ ດຽວນີ້ປະເທດລາວມີການແບ່ງຊົນຊັ້ນກັນແລ້ວຫວ່າ ?ແລ້ວເຂົາເຈົ້າເອົາກົດເກນຫຍັງມາວັດແທກ ວ່າຄົນລະດັບສູງ ກາງ ຕ່ຳ
ຊັ່່ງນ້ຳຫນັກກະເປົາຂອງຜູ້ເຂົ້າມາເລາະ ....
